राजनीतिक सौदावाजी याये मजिल

कोरोनाया प्रकोपं त्वःतूगु मदुनि । संकट यथावत हे तिनि । आकाश भय त्रासया सुपाचं त्वपुया तःगु हे दनि । तर विश्वया थाय्थासय् कोरोनाया विरुद्धया खोप तयार जूगु बुखँत वयाच्वंगु दु। गनं गनं ला खोप छ्यलेधुंकूगु खँ नं वइ । विश्वव्यापी संक्रमणया रुपय् खने दुगु कोरोनाया प्रकोपयात सीमित थासय्, सीमित पुचलय् खोप उपलब्ध जुइवं थुकियात विश्वव्यापी समाधानया रुपय् काये फइमखु । अय्नं खोप वल धइगु बुखँ कोरोनां भयभीत विश्व जनमानसय् छुं भचा जूसां आशाया जः लुइका बिउगु दु । न्ह्याक्व हे लिपा लाःसां छन्हु ला छन्हु खोप काये दइ ।  अल्पविकसित, गरिब देय्या जनता नं आशावादी जूगु दु । संक्रमणं गन थ्यंकी, छु याइ धइगु संत्रासंग्रस्त विश्वया जनतायात कोरोनाया खोप वल धाःगु खं उत्साहित याःसां खोप गबलें काये खनी धइगु अनिश्चिततां नुगः उतिकं क्वतुंकी ।

न्यने दु । कोरोनाया खोप नेपालय् प्यदँ लिपा जक थ्यनी हँ ! खोप वःगु बुखँ वसेंलि गुलिखे मनूत, थः स्वजनत, पासापिंलिसे याकनं हे न्हापालिपा थें सामान्य स्वापू तया च्वने दइ, आशावादी जुइ । ‘आः खोप वल निलाति लिपा झी नाप लाये दइ ।’ लां लां तक कोरोनाया त्रासं ख्वाः मखंम्ह पासां फोनं धाइ । खोपया आविष्कारं यक्वसिया नुगलय् स्वां ह्वयेका बी । खोपं मनूतय् म्हिगःया खिउँगु नुगलय् भति भति जलं खयेकाबी । तर जब झीगु देशय् खोप गबले वइ ? थ्यनी ? गुबले सर्वसुलभ जुइ ? कोरोनां मुक्ति काये खनी ? धइगु न्ह्यसः लुइ ……. जनमानसया नुगः हाकनं खिमिलां त्वपुइ ……. क्वतुनी ।

कारोनाया खोप विश्वन्यंकंया देय् यात आवश्यक जुइ । उकिं हरेक देय्त थुकिया उपलब्धिया निंतिं प्रयासरत जुइ । थःगु अवसरया लागि माःगु पहल याइ । आः खँ वइ । नेपालं विश्वय् विकास जुयाच्वंगु खोप नेपाली जनताय् फयांफछि याकनं थ्यंकेगु कुतः छु यानाच्वंगु दु? नेपाली जनतां नियमित रुपं सरकारपाखें सुचं काये दयेमाः । कूटनीतिक पहल यानाः खोप मीगु देय् तपाखें फयांफछि खोप याकनं कायेत स्वयेमाः । मखुसा प्यदँ न्यादं तिनि नेपालय् खोप वइगु खःसा कोरोनाया संक्रमणं नेपालं तःधंगु क्षति फयेमाली । खोप विश्व बजारय् दयां जक मजिउ । नेपालय् गथे यानाः थ्यंकेगु धइगु न्ह्यसः नं उतिकं विचाः यायेमाःगु खँ जुइ ।

थौं देय्या जिम्मेवार नेतातय्सं देय् व जनताया निंतिं छुं याये फुगु मखु। देशय् गरिबी, पछ्यौटेपन यथावत तिनि । जनताया निंतिं सँ छपु नं उखेथुखे याये फुगु मखु सरकारं ।

कोरोना जांच यायेगु सामान हयेगु खँय् सरकारया संरक्षणय् भ्रष्टाचार जूगु खँ ताजा हे तिनि। थज्याःगु आक्षेप विराधीतय्सं जक मखु, स्वयम सरकारया पार्टीया अध्यक्षं सरकार प्रमुख प्रधानमन्त्रीयात याइ । आक्रामक धंगं । गज्याःगु उच्चस्तरं भ्रष्टाचारया गम्भिर आरोप याःसां ख्याःला नी ला थें फासफुस जुया वनी । भ्रष्टाचारया आरोप नं राजनीतिक सहमतिया नामय् नेतातसें सम्झौता यायेत तयार जुइ । कोरोनाया खोप देशय् हयेगु जिम्मा सरकारं सरंक्षित निजी व्यापारीयात बिउगु खण्डय् जनतां थुकिया दुष्परिणाम भोगे याये माली । खोपया मूल्य भ्रष्टाचारी व्यापारीतय्सं मनोमानी धंगं तइ । आमजनतायात आर्थिक कष्टय् लाकाः अधिकतक आर्थिक लाभ काइ । जनतायात शोषण यानाः व्यापारीत मालामाल जुइ । कोरोनाया खोप धइगु धनीवर्गतय्त जक माःगु मखु। देय्या कुंकुलामय्च्वं पिं निम्न व गरिब जनतातय्त नं अनिवार्य जुइ । थज्याःगु मानवीयताया विषय जुयाच्वंगु खोपयात भ्रष्टाचारं गायेकाः जनतायात दुःख बीत स्वःसा अज्याःपिं दुष्टजनतय्त सरकारं मखु जनतां हे माःगु दण्ड बी दयेमाः ।

विदेशय् जनविरोधी राजनीतिक मनूतय्त, जनस्तरं भौतिक कसा बिउगु दृश्यत वः । खोप देशय् हयाः भ्रष्टाचारयासें जनतायात दुःख बीत स्वइपिं सरकारी व व्यापारी वर्गतय्त जनता स्वयमं कडा से कडा सजाय यायेमाः । मेगु खतरा नक्कली खोप नं वयेफु। अथे हे म्याद फुइधुंकूगु खोप नं बजारय् हयेफु। खोपत सुचुकाः कृत्रिम अभाव सृजना यानाः जनतायात अप्वः ध्यबा कयाः दुःख बी फु। कुनियतं ग्रस्तपिं मनूतय्सं थःगु स्वार्थया निंतिं न्ह्यागु नं यायेफु। जनताया दुःखयात थज्याःपिंसं चिउताः तइमखु ।

खोप गुलि फत उलि याकनं देशय् थ्यंकेत सरकारं माःगु दक्वं कुतः यायेमाः । तर भ्रष्टाचारीतय्त प्रश्रय बियाः सरकारं जनतातय्त यातना बीगु खःसा जनता सुम्क च्वनीमखु। सरकारं खोपया विषय छु छु यानाच्वन उकिया दैनिक जानकारी जनतायात बीमाः । गुगु माध्यमं खोप देशय् हयेत्यना, वितरण प्रणाली थुकथं जुइत्यन उकिया विस्तृत खाका जनतायात बीमाः । खोपयात न्यायोचित धंगं वितरण यायेत स्थानीय निकायतय्त सक्रिय यायेमाः । सरकारी तहं योजना दयेकूसां स्थानीय तहयात अधिकतम सहभागि यायेमाः । स्थानीय तहं थःगु स्थानीय जनताया हितया निंतिं हस्तक्षेपकारी भूमिका म्हितेत लिफः स्वये मजिउ ।

खतुं खोपया आविष्कार जुल । झी लसताया खँ जुइ । तर झी थाय् गबले थ्यनी । जब लिसः अनिश्चित जुइ । हाकनं झी खुसुक्क जुइ । दँ दँ बीगु खः ला ? निराश जुइ । खोप वःसां नं सुलभ जुइगु खः ला कि मखु ? चिन्ता जुइ । कोरोनाया संकटं थौं जनता बछि म्वाः, बछि सी जुया च्वंगु दु। सरकारं आवश्यक व्यवस्था यायेमाल । भ्रष्टाचार निर्मूल यायेमाल । आम जनतायात दुःख बीगु कोरोनाया भ्रष्टाचारयात प्रधानमन्त्री व अध्यक्ष दथुइ जूगु आरोप प्रत्यारोपयात थें राजनीतिक सौदावाजीया माध्यम जक याये मजिल ।

सम्बन्धित बुखँ

LEAVE YOUR COMMENTS