पाकिस्तानं भारतयात बिउगु लिसः

भारतं थगुने थःगु संविधानया धारा ३७० खारेज यानाः जम्मु व काश्मिरयात बियातःगु विशेष अधिकार खारेज यात । थःगु हे स्वतन्त्र कानून दयेके दइगु, नागरिकता, सम्पत्ति अधिकारलिसेंया मामिलाय् विशेष अधिकारसहितया जम्मु व काश्मिर आः राज्य तकं मखुत । केन्द्र शासित लागा जुल ।  हाकनं लद्दाखयात जम्मु काश्मिरपाखें फानाः मेगु केन्द्रशासित लागा दयेकल । मुक्कं काश्मिर क्षेत्रया जनतायात दुनिया वा विश्वपाखें ब्यागलं तयेत संचार विच्छेद व सेनाया तैनाथी यानाः भारतया मोदी सरकारं थ्व ज्या फत्ते यात । भारतया संसदं वंगु अगष्टं थ्व विधेयक पास याःगु खःसा सेनाया तैनाथी व लांलां तक संचार विच्छेद यानाः थगुने अक्टोबर ३१ निसें न्हूगु व्यवस्था लागू जूगु घोषणा याःगु खः । थ्वयां लिउ नोभेम्बर २ तारिखकुन्हु भारतं न्हूगु नक्सा जारी यात । नक्साय् भारत प्रशासित काश्मिर जक मखु पाकिस्तान प्रशासित आजाद काश्मिरयात नं दुथ्याकातःगु दु। थुकियात पाकिस्तान व चीनं विरोध ला यात तर गुगुं वाद प्रतिवाद जुयामच्वं ।

नेपालय् नं थुकिं तरंग पिथन । व छु धाःसा नेपाःया कालापानी, लिपुलेक, लिम्पियाधुरा लिसेंया लागायात नं भारतं थःगु नक्साय् न्ह्यब्वयातल । भारतं कब्जाय् कयातःगु लागा जूसां वास्तविक रूपं उगु लागा नेपाःया हे खः । थुकी विज्ञपिंसं खँ ल्ह्वनाच्वंगु हे खः, तर भारतं न्हूगु नक्सा पिथनेधुंकाः थ्व नेपाः दुने मामिलाया रूपय् न्ह्यःने वल व न्ह्यलं मचाःपिं नं न्ह्यलं चाल । नेपालं नं कालापानी, लिपुलेक व लिम्पियाधुरा दुथ्याःगु नक्सा पिथनेमाःगु माग जुल ।  अन्ततः भारतं नेपाःया भूमि जुयाः लँ दयेकल व अनया रक्षामन्त्री राजनाथ सिंहं उद्घाटन नं यात धकाः धाःबलय् नेपाः नं हथाय् चायाः नक्सा पिथन ।

आः वयाः नेपालं थें पाकिस्तानं नं नक्सा पिथंगु दु। वंगु मंगलवाः पाकिस्तानी प्रधानमन्त्री इमरान खानं जारी याःगु नक्साय् मुक्कं काश्मिर हे पाकिस्तानय् लाकाः क्यनातःगु दु। नापं काश्मिर विवादया समाधान यायेगु खःसा संयुक्त राष्ट्र संघं पारित यानातःगु निर्णयकथं जनमत संग्रह हे छगू जक उपाय खः धकाः न्ववाःगु दु। इमरान खानया थ्व ज्यायात मुक्कं पाकिस्तानीतसें समर्थन याःगु दु। अझ कराचीलिसें थीथी शहरय् ला सरकारसिकं न्ह्यःने वनाः उग्रवादीतसें प्रदर्शन यानाः भारतनाप ल्वायेगु उद्घोष याःगु दु। भारतं धाःसा थुकिया विरोध याःगु दु ।

सन् १९४७ य् भारत स्वतन्त्र जूगु इलय् अनया जुजु हरि सिंहयात काकाः जवाहरलाल नेहरूं भारतनाप स्वायेगुकथं भ्वं याकूगु खः । काश्मिरय् अबलय्निसें वजीर–ए–आलम धकाः प्रधानमन्त्री सरह दइगु व्यवस्था जुयाच्वंगु खः । सन् १९६५ लय् अन मेमेगु राज्यय् थें मुख्यमन्त्री च्वनीगु यानाबिलसा थगुने ला केन्द्र शासित क्षेत्र धकाः दयेकाबिल । थुकथं काश्मिरयात दयाच्वंगु छगूकथंया स्वायत्त अधिकार दिल्लीं भकाभक लाका कयाः अनया जनतायात दिल्लीया रैती दयेका बीधुंकूगु दु। छखे डिम्री कसे यात धाःसा मेथाय् नं कसे जुइगु ला स्वाभाविक हे खः । नेपाः, पाकिस्तान व चीनपाखें भारतयात गुगु हाथ्या वयाच्वन व धइगु हे दिल्लीया शासकतसें काश्मिरी जनतायात रैती दयेकूगु खँया हे लिच्वः खः धकाः थुइके थाकु मजू ।

भारतया गुजरात राज्यय् च्वंगु जूनागढ, मनवादर व सर क्रिक नं पाकिस्तानं दावी याःगु दु। मेखे भारतीय जनता पार्टीं जम्मु काश्मिरय् धारा ३७० व धारा ३५ क खारेज जूगु दछि पूवंगु लसताय् बुधवाःनिसें थीथी जश्न उत्सव यायेगु धकाः धाःगु दु। काश्मिरया हे गुलिखे थासय् धाःसा भारत सरकारं कफ्र्यु आदेश जारी याःगु दु। थुकथं भारत व पाकिस्तान आः निगू निखे टकरावया स्थितिइ लानावनाच्वंगु दु ।

‘थौं विश्वया न्ह्यःने पाकिस्तानया न्हूगु नक्सा न्ह्यब्वयाच्वना । आःया पाकिस्तानया नक्सां मुक्कं पाकिस्तानी जनताया आकांक्षाया प्रतिनिधित्व याइ । थ्व नक्सायात पाकिस्तानया मन्त्रिमण्डल, विपक्षी व काश्मिरी नेतृत्वं अनुमोदन यायेधुंकूगु दु। थुगु नक्सां भारतं थगुने अगष्ट ५ तारिखय् काश्मिरया सम्बन्धय् काःगु निर्णययात खारेज याना बिउगु दु’, पाकिस्तानी प्रधानमन्त्री इमरान खानं थथे धाःगु धइगु भारत सरकार व संसदं धारा ३७० खारेज याःगु खँया हे लिसलय् पिहां वःगु खः धकाः थुइकेत थाकु मजू ।

पाकिस्तानया न्हूगु नक्सायात कयाः भारतं धाःसा पाकिस्तानं राजनीतिक रूपं लाथेपाथे ज्या याःगु वा न्ह्यःने लाःथे अभ्यास याःगु धकाः धाःगु दु। ‘थुज्वःगु हास्यास्पद दावीया न छुं कानूनी मान्यता दु न त अन्तर्राष्ट्रिय विश्वसनीयता हे दइ, थुकिं ला सीमापार आतंकवाद न्यंकाः थःगु भूमि विस्तार यायेगु पाकिस्तानी मनसुवाःयात जक प्रतिविम्बित याइ’, धकाः भारतीय विदेश मन्त्रालयसं छगू विज्ञप्ति पिथनाः धाःगु दु ।

नेपालं नक्सा पिथनाः गथे नेपाःमि जनताया दथुइ कालापानी नेपाःया हे खः धइगु भावना न्यंकाबिल, झीगु भूमि झीत हे माः धइगु दावी जनतापाखें जुइगु अवस्था पिथनाबिल । अथे हे पाकिस्तानया न्हूगु नक्सा पिथनाः इमरान खानं नं यानाबिउगु दु। खतुं थुज्वःकथंया ज्या ला पाकिस्तान अधीनस्थ काश्मिरयात थःगु नक्साय् तयाः भारतं सुरु याःगु खः । तर भारतं पाकितान अधिनस्थ काश्मिरयात थःगु नक्साय् तःगुया लिउने अनया हे जनताया साथ मदु। तर नेपालं न्हूगु नक्सा पिथंगुया लिउने नेपाःमि जनताया व पाकिस्तानं नक्सा पिथंगुया लिउने पाकिस्तानी जनताया आकांक्षा स्वानाच्वंगु दु। प्रधानमन्त्री इमरान खानं थ्व न्हूगु नक्सा आः पाठ्यक्रमय् नं दुथ्याकेगु खँ धायेधुंकूगु दु। थुकिं यानाः भूमिया निंतिं पाकिस्तान व भारतया दथुइ ल्वापु मजुइ धकाः धायेफइमखु ।

मूलभूत खँ ला आः नेपाः, पाकिस्तान व चीन भारतया विरोधय् दु। थ्व नं कूटनीतिक व राजनीतिक तहय् महत्वपूर्ण खँ हे खः । चीनं ला २० म्ह भारतीय सैनिकतय्त व हे लद्दाखया सीमानाय् लाःगु गलवान गाः अर्थात् उपत्यकाय् स्याना नं बीधुंकूगु दु। उकिं भारतं जःलाःखःला देय्नाप दुश्मनी मोले यायेगु धइगु खँ छुं मू मदुगु खँ जुइमखु। मू ला पुले हे धुंकूगु दु व आः लिपा गुगु गुगु कथंया मू पुला वने मालीगु खँ स्वये खने दइ तिनि ।

सम्बन्धित बुखँ

LEAVE YOUR COMMENTS