उत्पीडित आन्दोलनया मेगु नां पद्मरत्न
देशय् न्हूगु संविधान वयेधुंकाः न्हूगु संविधानय् नेपाःया आदिवासी जनजाति, मधेसीनिसें उत्पीडित समुदाययात विभेद यानातःगु दु धकाः सतकय् सः तयेगु ज्या मजुयाच्वंगु अबलेया ई । उगु इलय् नेवाः प्रदेशय् आदिवासी जनजाति जागरण अभियान संचालन यायेगु निंतिं न्हापांगु ज्याझ्वलय् आदिवासी जनजाति नापं उत्पीडित समुदायया मंकाः नेता कथं पद्मरत्न तुलाधर जुइ धइगु तायेकाः वय्कःयात पाहां कथं ब्वना वय्कःया खँ सतकय् तयेके बीगु कुतः याना ।
संविधानय् विभेद दु धकाः यक्व मनूतय्सं धाये हे मछालाच्वंगु इलय् संविधानय् जुयाच्वंगु विभेदयात कयाः सतकय् वयाः थम्हं न्ववाये धकाः गुगु कथं जिमिगु प्रस्तावयात वय्कलं स्वीकार यानादिल उकिं यानाः जिपिं तसकं उत्साहित जुया वयागु खः । अबले रत्नपार्कय् दनाः वय्कलं न्ववानादीगु खँ थौं तक नं लुमं ।
अधिकारया ग्यारेन्टी जुइमाः, भाषिक, सांस्कृतिक, जातीय अधिकारय् समानता जुइमाः । मानव अधिकारया दृष्टिकोणं भाषिक, जाति, सांस्कृतिक आधारय् वा छुं नं कथंया विभेद याये दइ मखु धकाः न्ववासें थ्व संविधानय् न्ह्याथाय् स्वःसां विभेदया विभेद दु, भाषिक विभेद यथावत दु, जातीय विभेद यथावत दु, सांस्कृतिक, धार्मिक विभेद यथावत याःगु दु, मूर्ख जक मखु महामूर्खतय्सं थें थ्व संविधानयात ब्याख्या नेतातय्सं यानाच्वंगु दु ।
अले थ्वहे संविधानयात उत्कृष्ट संविधान धाल इमिसं । उकिं झीगु नितिं झी सकलें जानाः आन्दोलन यायेमानि धकाः तकं स्पष्ट रुपं वय्कलं धयादीगु खः । अबले नेवाःत जक मखु आदिवासी जनजाति नापं उत्पीडित समुदायया थीथी मनूत तकं वय्कः तुलाधरया खँ न्यनाः नेवाः प्रदेशय् आदिवासी जनजाति जागरण अभियानयात थप उर्जा बियादीगु खः ।
थौं उत्पीडित समुदायया मुक्तिया नितिं मंकाः कथं सकलें न्ह्याः वनाः देशय् भाषिक, जातीय, सांस्कृतिक नापं फुक्क ख्यलय् समानता हयेगु कथंया आन्दोलन यायेफत धाःसा जक धात्थें पद्मरत्न तुलाधरया भावना कथं झीपिं न्ह्याः
वनागु जुइ धकाः थुइकेमाः ।
सतक विस्तारया सवालय् सर्वोच्च अदालतं वःगु फैसलाया पूर्णपाठ मवयाच्वंगु अवस्थाय् गैर न्यायिक सतक विस्तार विरुद्धया आन्दोलनया झ्वलय् पद्मरत्न तुलाधरया छेँय् वनाः आन्दोलनया प्रतिबद्धता प्वंके बीकेगु नितिं वय्कःया ल्हाःचिं कायेत वनागु खःसा छुं ई लिपा वय्कःयात नागरिक अभिनन्दन यायेगु झ्वलय् पत्रकारिता ख्यलय् वय्कलं यानादीगु योगदानयात कयाः थुइकेगु नितिं वय्कःया छेँ लाजिम्पाटय् वनाः नापलानाः यक्व हे खँ जूगु खः ।
अले वय्कः माइतिघर मण्डलाय् जुइगु प्रदर्शनय् तकं सहभागी जुइ धकाः बचं बियादिल । अले आन्दोलनय् सहभागी तकं जुयाः वय्कलं मानव अधिकार, आदिवासी जनजातिया अधिकार, भूमि सम्बन्धि अधिकार नापं नेवाःतय्गु अधिकारयात कयाः थःगु खँ सतकय् हे च्वनाः तयादीगु खः ।
पद्मरत्न तुलाधरया जब ज्याःजंक्वया झ्वलय् नागरिक अभिनन्दन यायेगु तयारी जुल अबले हाकनं जि लाजिम्पाटय् च्वंगु पद्मरत्न तुलाधरया छेँय् वना । अबले वय्कलं पत्रकारिता ख्यलय् यानादीगु योगदानया बारे खँ जुल । वय्कलं नेपाःया पत्रकारिता ख्यलय् थम्हं नीन्यादँ तक ज्या यानागु खँ कनादिल ।
अथे हे वय्कलं गबलें नं पेशागत पत्रकारिता यानामदी । भाषाया सेवा यायेगु भावना कथं साहित्यिक पत्रकारिता सुरु यानादीम्ह वय्कः लिपा वनाः नेपालभाषा पत्रिकार न्हिपौया सम्पादक तकं जुयादीगु खः । झी पत्रिकाया नं सम्पादक जुयादीम्ह वय्कःयात पत्रकारिता यात्रां राजनीतिक पार्टीया नेतातलिसे स्वापू बांलाक तयेगु माध्यम तकं जुया बिल ।
उकिं यानाः पद्मरत्न तुलाधरया ब्यक्तित्वया निंतिं नं तःधंगु तिबः जूगु खँ कनादीगु थौं थें हे लुमंनि । पद्मरत्न तुलाधरलिसे थ्व स्वक्व जक मखु तःक्वःमछि हे छेँय् वनाः नापलायेगु ज्या याना । टेलिभिजनया निंतिं अन्तर्वार्ता कायेगु झ्वलय् बाय् मेगु छुं नं कथंया सहलह ब्याकेगु झ्वलय् वय्कःया छेँय् वनासा थीथी ज्याझ्वलय् नापलाइगु इलय् जक मखु टेलिफोनं तकं यक्व खँ ल्हाये नं ।
२०६२÷०६३ सालया जनक्रान्तिया इलय् ला झन यक्व हे टेलिफोनं खँ जुइगु वय्कःलिसे । उलि जक मखु जनयुद्धया इलय् आःया नेपाल कम्युनिष्ट पार्टी (नेकपा) या नेता (न्हापा माओवादीया नेतातय्गु सुचं तकं वय्कलं हयादी अले वय्कलं जितः फोन यानाः माओवादी नेतातय्गु खँ छेँजःपिंत थ्यंकेगु निंतिं कनादी जिं सम्बन्धित नेताया छेँय् वनाः कनेगु तकं याना ।
थुगु कथं पद्मरत्न तुलाधरनापया जिगु स्वापू दयाच्वंगु खः । पद्मरत्न तुलाधर नेपाल संवत् आन्दोलनया प्रणेता, नेवाः, आदिवासी जनजाति नापं उत्पीडित समुदायया न्ह्यलुवा जक मखु शान्ति प्रक्रियाया दूत नापं साहित्यकार, नागरिक आन्दोलनया न्ह्यलुवा, मानवअधिकारवादी नं खः ।
थुगु ल्याखं बहुआयामिक ब्यक्तित्व पद्मरत्न तुलाधर खःसा वय्कः वास्तवय् नेपाःया उत्पीडनया मुक्तिया नितिं जीवनभर न्ह्याः वनादीम्ह जनताया नेता खः । थीथी नेतात राजनीतिक दलया नेता जुयादीगु खःसा पद्मरत्न तुलाधर गबलें नं पार्टीया नेता जुयामदी अले जनताया नेता हे जुयादीगु खः ।
न्ह्याबलें थः छम्ह जनताया सिपाइँ खः धयादीम्ह पद्मरत्न तुलाधरं गबलें नं थः तःधंम्ह मनू धकाः मधाः अले न्ह्याबलें छम्ह साधारण मनू खः धकाः धयादी । छम्ह साधारण मनू तायेकाः हे जुइमाः छकः ला वय्कलं भोताहितिइ लागाय् लँय् खँल्हाल्हां वयाच्वनागु इलय् ख्वख्वं हे थः उखे थुखे वनेत थाकु, काय्पिन्त दुःख बी नं मास्ति मवः, आर्थिक रुपं नं थाकु धकाः कनादीगु थौं तक नं लुमंनि ।
देय् व उत्पीडित जनताया नितिं नापं नेपाःया राष्ट्रियताया नितिं निरन्तर रुपं न्ह्याः वनादीम्ह अले जीवनया अन्तिम इलय् तक नं अधिकारया नितिं संघर्ष यायेमानि धकाः सन्देश बियादीम्ह पद्मरत्न तुलाधर खः । अले उत्पीडित समुदायया मुक्तिया नितिं जुइगु आन्दोलनया मेगु नां हे पद्मरत्न तुलाधर खः धइगु सवालय् सुयां नं निगू मत तयेफइगु अवस्था मदु ।
उकिं थौं उत्पीडित समुदायया मुक्तिया नितिं मंकाः कथं सकलें न्ह्याः वनाः देशय् भाषिक, जातीय, सांस्कृतिक नापं फुक्क ख्यलय् समानता हयेगु कथंया आन्दोलन यायेफत धाःसा जक धात्थें पद्मरत्न तुलाधरया भावना कथं झीपिं न्ह्याः वनागु जुइ धकाः थुइकेमाः ।
LEAVE YOUR COMMENTS