जस्टिन–बाल्डविन इन्गेजमेन्ट
क्यानाडाया पप स्टार जस्टिन बीबरं अमेरिकी मोडल हेली बाल्डविनलिसे इन्गेजमेन्ट याःगु दु । बीबरं बहमाजया छगू रिसोर्टय् हेलीयात इहिपाया निंतिं तःगु प्रस्ताव स्वीकार यायेवं निम्हेसिया दथुइ इन्गेजमेन्ट जूगु खः । बीबरं इन्गेजमेन्ट यायेवं वया छेँजःपिं धाःसा लसतां झूचायाच्वंगु दु ।
बीबरया अबु जेरमीं कायया किपा इन्स्टाग्रामय् पोस्ट यानाः च्वःगु दु, ‘वइगु न्हिया निंतिं तसकं उत्साहित दु ।’बीबर छगू इलय् थःलिसें चर्चित जूम्ह गायिका सेलेना गोमेजया मतिनाय् तक्यनाच्वंगु खः । उपिं निम्हेसिया दथुइ ब्रेकअप जुइधुंकाः बीबर मोडल बाल्डविनया सतिक वःगु खः ।
ल्याय्म्हतय् धुकधुकी जुयाच्वंम्ह बीबर लिसे इन्गेजमेन्ट याःम्ह बाल्डविनयात नं छक्वः म्हसीके । बाल्डविन ‘बर्न अन द फोर्थ जुलाई, द युजुअल सस्पेक्टर’, ‘द फ्लिनस्टोंस इन वाइवा रक भेगास’ थेंज्याःगु फिल्म म्हितेधुंकूम्ह हलिउड अभिनेता–निर्माता स्टिफन बाल्डविनया म्ह्याय् खः ।
अथेहे राष्ट्रपति डोनाल्ड ट्रम्पया क्यारिकेचर यायेगुलिइ नांजाःम्ह अभिनेता एलेक बाल्डविनया म्ह्याय्चा खः । लिसें व थः हे लोकंह्वाःम्ह मोडल नं खः । हेली बाल्डविनं अमेरिकन भोग, मेरि क्लेयर लिसें स्पेनिस पत्रिका हार्पर्सया निंतिं मोडलिङ यायेधुंकूगु दु । अथेहे गुलिखे टेलिभिजन शो, म्युजिक भिडियो व विज्ञापनय् नं खनेदयेकः वयेधुंकूम्ह खः ।
LEAVE YOUR COMMENTS