मेगु छगू फ्लप
फिल्मया हलिमय वन मोर फ्लप यानिकी मेगु छगू नं फ्लप धइगु खँत्वाः सदां चर्चाय् वयांतुं च्वं । झन् नेपाःया खस फिल्म ख्यलय् ला थौंकन्हय् थ्व खँत्वाः सकसिया धइथें म्हुतुइ घानाच्वंगु दु । थुगुसी आःतक रिलिज जूगु खस नेपाली भाय्या फिल्मय् ‘जात्रै जात्रा’, ‘छ माया छपक्कै’ व ‘कबड्डी कबड्डी कबड्डी’ जक हे हिट फिल्मया धलखय् लाःगु खःसा मेगु दक्वं फ्लप ।
उकिं थौंकन्हे ‘मेगु छगू फ्लप’या खँत्वाः बय्बय् जुयाच्वंगु खः । आर्यन सिग्देल धयाम्ह छम्ह तसकं चर्चित व लोकंह्वाःम्ह हिरो खः । तर दँबदँ न्ह्यवंनिसें वयागु फिल्म फ्लप जुया च्वंगु दुसा थुगुसी वंगु वालय् रिलिज जूगु “चचहुइ” नांयागु न्हूगु फिल्म नं फ्लप हे जूगु दु । थ्वसिबें न्ह्यः वयागु रुद्रपिया व कायरा नं फ्लप हे जूगु खःसा आः वया “चचहुइ” नं फ्लप जूबलय् वयागु निंतिं ‘वन मोर फ्लप’ जुया बिउगु दु ।
थ्व “चचहुइ” आर्यनया निंतिंजक मखसे थ्व फिल्मया निर्देशक साम्तेन भुटियाया निंतिं नं मेगु छगू फ्लप फिल्म साबित जुयाबिउगु दु । थ्वसिबें न्हापा साम्तेनया तान्द्रो, साढे सात, अनागत, लेटर नं फ्लप हे जूगु फिल्म खः । उलिजक मखसे “चचहुइ” मिरुना मगर नांयाम्ह हिरोइनया निंतिं नं छगू मेगु फ्लप जुयाबिउगु दु ।
लालपुर्जा, रोज व साइनो फिल्म म्हितेधुंकूम्ह मिरुनाया थ्व फिल्म नं फ्लप हे जुल । आर्यन सिग्देलया फ्लप फिल्म “कायरा” हिरोइन साम्राज्ञी आरएल शाहया नं वन मोर फ्लप फिल्म खः । अनमोल के.सी.लिसे “ड्रिम्स” थेंज्याःगु हिट फिल्मया हिरोइन साम्राज्ञीया लिपांगु इलय् रिलिज जूगु फिल्म “कायरा” धुंका “मारुनी” फ्लप जुलसा छुं ई न्ह्यः रिलिज जूगु “रातो टिका निधारमा” मेगु छगू फ्लप फिल्म जुयाबिउगु दु ।
“ड्रिम्स” लगायतया हिट सुपरहिट फिल्मया हिरो अनमोल के.सी.या “गाजलु” , “होस्टेल” व “जेरी” थेंज्याःगु हिट फिल्म दयेकुम्ह निर्देशक हेमराज बिसिं अनमोल के.सी. बिना दयेकूगु फिल्म “सम्बोधन” व “ग्यांगस्टर ब्लुज” फ्लप जूगु खःसा छुं ई न्ह्यःतिनि रिलिज जूगु वयागु न्हूगु फिल्म “घामड शेरे” वयागु मेगु छगू फ्लप फिल्म जुयाबिल ।
“घामड शेरे” या हिरोइन स्वस्तिमा खडकाया नं थ्व छगू मेगु फ्लप फिल्म खः । फिल्मय् हिरोइन जुया म्हितुसां निसें आपालं फ्लप फिल्म म्हिते धुंकूम्ह स्वस्तिमाया आःतकया दुने “जय भोले” छगू हे जक हिट फिल्म खः । वयात राष्ट्रिय अन्तर्राष्ट्रिय अवार्ड तकं बिइकेत ताःलागु “बुलबुल” नांयागु फिल्मया चर्चा यक्व हे जूसां फिल्म धाःसा फ्लप हे जूगु खः ।
“ड्रिम्स” थेंज्याःगु हिट फिल्मया हिरोइन साम्राज्ञीया लिपांगु इलय् रिलिज जूगु फिल्म “कायरा” धुंका “मारुनी” फ्लप जुलसा छुं ई न्ह्यः रिलिज जूगु “रातो टिका निधारमा” मेगु छगू फ्लप फिल्म जुयाबिउगु दु
थथे मेगु छगू फ्लपया यात्राय् लानाच्वंपिं यक्व दु । नेपाली फिल्मया हिरोया दर्जा कयातःम्ह रेखा थापाया तकं लिपांगु इलय् छगू लिपा मेगु फिल्म फ्लप जुयाच्वंगु दुसा रेखा थापाया दर्जाय् थ्यनीम्ह धकाः बय्बय् यानातःम्ह प्रियंका कार्कीया फिल्म नं उलि हिट मजू । दिपकराज गिरी व दिपाश्री निरौलाया “वडा नं ६” अले “छक्का पञ्जा”या सिक्वेल बाहेक वयागु हिट फिल्म धइगु “नाईं नभन्नु ल” सिक्वेल नं खः तर वयागु बटरफ्लाइ, प्रेमदिबस, हजार जुनीलाई थेंज्याःगु फिल्म छगू धुंका मेगु फ्लप हे जुयाच्वंगु दु ।
वया यज्जु आयुष्मान देशराज जोशीया फिल्म नं अथेहे छगू धुंकाः मेगु फ्लप जुयाच्वंगु दु । आयुष्मानया किजा आशिरमानया नं फ्लप जुया वयाच्वंगु दु । कलिउडय् आयुष्मान, आशिरमानयात थें हे तुं अनमोल के.सी.या विकल्पया रुपय् कयातःपिं आकाश श्रेष्ठ व शुशील श्रेष्ठया नं हविगत छुं मपाः ।
अनमोल के.सी.या मां सुष्मिता बोम्जनं फिल्म दयेकूबलय् थः हे काय्यात हिरो कथं कायेगु इच्छा पूमवंबलय् “म त तिम्रै हुँ” फिल्मय् अनमोल के.सी.या विकल्प कथं आकाश श्रेष्ठयात हिरो दयेकूगु खः । आकाशया डेब्यु फिल्म हे फ्लप फिल्म खःसां आःतक वयागु फिल्म हिट मजूनि । छुं न्हि न्ह्यः पिहां वःगु “पोई प¥यो काले” नं हिट जुइमफुत ।
थ्वहे फिल्मय् म्हितूपिं सौगात मल्ल व सृष्टि श्रेष्ठया निंतिं नं थ्व फिल्म वन मोर फ्लप साबित जुयाबिउगु दु । थ्व सिबें न्हापा सृष्टिया बाँध मायाले , रोमियो एन मुना फ्लप जूगु खः । सौगात मल्लया नं छगू धुंका मेगु फिल्म फ्लप जुयाच्वंगु दु । नम्रता श्रेष्ठ नांयापिं निम्ह हिरोइन नं थथे वन मोर फ्लपया धलखय् न्ह्यःने लाना च्वंगु दु ।
“सानो संसार” नांयागु फिल्मय् झिनिंदँति न्ह्यः हिरोइन जुया वःम्ह नम्रताया “मेरो एउटा साथी छ” थेंज्याःगु छुं छुं फिल्म हिट जूगु खःसा लिपांगु इलय् वयागु फिल्म छगू धुंकाः मेगु फ्लप जूगु खः । खय्तला थगुने वयागु “प्रसाद” नांयागु छगू फिल्म धाःसा हिट हे जूगु खः तर थुगुसी वयागु थःगु होम प्रोडक्शनय् दयेकूगु “जायरा” हिट जुइमफुत ।
थ्व फिल्मय् नम्रतालिसे हिरो जुयाः म्हितूम्ह अनुप बिक्रम शाहीया निंतिं नं मेगु छगू फ्लप साबित जुयाबिल । थुम्ह नम्रता श्रेष्ठयात कलिउडय् बीग नम्रता धकाः धायेगु यानातःगु दुसा मेम्ह छम्ह नं नम्रता श्रेष्ठ नांयाम्ह हिरोइन दु । थुम्ह नम्रता श्रेष्ठया मेगु फिल्म “जानी नजानी” नं फ्लप हे जूगु खः ।
आः वयागु छगू न्हूगु फिल्म “माछामाछा” याकनं हे रिलिज जुइत्यंगु दु । वयागु थ्व “माछामाछा” फिल्मय् सौगात मल्ल हिरो जुयाः म्हिताच्वंगु दु । थ्व ल्याखं सौगात मल्ल व कान्छिम्ह नम्रता श्रेष्ठया निंतिं “माछामाछा” छगू अग्निपरिक्षाया रुपय् न्ह्यःने वःगु दु । अले सौगात व नम्रता निम्हं थ्व फिल्मं थःपिंत बांलाक लबः बिइ धइगु खँय् तसकं हे आसकुति जुयाच्वंगु दु ।
वन मोर फ्लपया धलः दयेकेगु खःसा तसकं ताहाः जुइफु । छाय्धाःसा हिट फिल्म धइगु म्हो हे जक दु । थःगु डेब्यु फिल्म “होस्टेल” निसें “ड्रिम्स”, “गाजलु” थेंज्याल्गु लगातार हिट फिल्म बियाच्वंम्ह लोकंह्वाम्ह हिरो जुइत ताःलाम्ह अनमोल के.सी.या “कृ” फ्लप जुलसा व धुंकाः “क्याप्टेन” नं फ्लप जूबलय् ला वयात नं वनमोर फ्लपया धलखय् तयेधुंकूगु खः ।
तर लिपा वना वयागु “ए मेरो हजुर ३” हिट जूबलय् तिनि वयात भतिचा राहत जूगु खः । वन मोर फ्लपया धलखय् लानाच्वंम्ह हिरो धइम्ह छम्ह निखिल उप्रेती नं खः । छगू इलय् कलिउडया एक्शन स्टारया दर्जाय् लानाच्वंपिं बिराज भट्ट व निखिल उप्रेती मध्ये निखिलं कमब्याक कथं म्हितूगु “भैरव” छगू हिट जुलसा व धुंकाः वयागु फिल्म “संरक्षण”, “लुटेरा”, “भिलेन”व “पिंजडा बाय्क अगेन” थेंज्याःगु फिल्म छगू धुंका मेगु फ्लप जुलसा बिराजया कमब्याक फिल्म “जय परशुराम” नं फ्लप हे जुल ।
कलिउडय् स्टारजक मखु निर्देशकतय्गु नं छगू धुंकाः मेगु फिल्म फ्लप जुया वयाच्वंगु दु । नेपाःया फिल्म ख्यलय् न्हूगु सवाःया फिल्म दयेकीम्ह धकाः बय्बय् जूम्ह दिपेन्द्र के खनालया “पशुपतिप्रसाद” छगू माइलस्टोन फिल्म खः ।
“चपली हाइट”यात नं छगू च्वछायेबहगु फिल्म कथं कायेमाः । तर लिपांगु इलय् वयागु धनपति, चंगाचेट, घर थेंज्याःगु फिल्म छगू धुंकाः मेगु फ्लप फिल्म खः । दकलय् न्हापांगु थ्रीडी नेपाली फिल्म “भिजिलान्टे थ्रीडि” दयेकूम्ह निर्देशक दिपेन्द्र के खनालया न्हूगु फिल्म “आमा” थ्वहे वइगु फागुन महिनाय् रिलिज जुइगु क्वछिना तःगु दु ।
LEAVE YOUR COMMENTS