राजु पाण्डेयात प्रधानमन्त्री सचिवालयपाखें सचेत याकल
येँ (नेपालभाषा टाइम्स) – राष्ट्रिय स्वतन्त्र पार्टीया सांसद राजुनाथ पाण्डें गोकर्णय् सेनाया छम्ह अधिकृतयात याःगु व्यवहारयात कयाः प्रधानमन्त्री सचिवालयं सचेत याकूगु खँ सीदुगु दु । म्हिगः प्रधानमन्त्री बालेन शाहयात नापलायेत वंम्ह प्रधानसेनापति अशोकराज सिग्देलं प्रधानमन्त्रीयात सिंहदरबारय् नापलायेगु झ्वलय् सांसद पाण्डेयात कयाः असन्तुष्टि प्वंकादीगु खः ।
प्रधानसेनापति सिग्देलया असन्तुष्टि लिपा सचिवालयया छम्ह दुजलं तत्काल हे सांसद पाण्डेयात फोन यानाः प्रधानमन्त्री कार्यालय सःतूगु खः । प्रधानमन्त्री कार्यालय थ्यंम्ह पाण्डेयात सचेत याकेगु झ्वलय् ‘न्ह्याथाय् नं प्रधानमन्त्रीया नां कायेगु मखु, सांसद जुल धायेवं प्रधानमन्त्रीयात न्ह्याथाय् नं स्वायेगु ज्या मिले मजू, सुरक्षा निकायलिसे संवादया शैली नं बांलायेमाः’ धकाः सचेत याकूगु खँ धाःगु दु ।
प्रधानमन्त्री कार्यालयं सचेत याकेधुंकाः पाण्डें थःगु गल्ती स्वीकार याःगु खःसा वयां लिपा विज्ञप्ति जारी याःगु खः । विज्ञप्तिइ पाण्डें नेपाली सेनाप्रति थःगु उच्च सम्मान दुगु न्ह्यथँसें समन्वयया झ्वलय् छुं ई लिबागु दाबी याःगु खः । उकथं हे विज्ञप्तिइ सुरुइ भचा असमझदारी जूगु खःसां लिपा नेपाली सेनालिसे जानाः बागमति करिडोर विस्तारया ज्या क्वचाःगु धयातःगु दु ।
म्हिगः पाण्डे थम्हं हे डोजर ज्वनाः गोकर्णस्थित नेपाल ट्रस्टया जग्गाय् दुगु सेनाया विपद् व्यवस्थापन तालिम केन्द्रया पःखाः थुनेत वःगु इलय् सेनाया अधिकारी व पाण्डेया दथुइ भनाभन जूगु भिडियो सामाजिक सञ्जालय् भाइरल जूगु खः । माकलबारीं गोकर्णेश्वर वनेगु सतक विस्तारया झ्वलय् येँ क्षेत्र नम्बर ३ या सांसद पाण्डे जनप्रतिनिधिसहित डोजर ज्वनाः वंगु खः ।
पःखाः थुनेगु ज्या जुइवं सुरक्षाय् खटे जुयाच्वंम्ह सैनिक अधिकारीं आधिकारिक पौ माग यासें ब्यारेक व सुरक्षा संवेदनशीलताया खँ ल्ह्वंगु खः । तर सांसद पाण्डें भौतिक पूर्वाधकर मन्त्री नेपाल ट्रस्टया अध्यक्ष जूगु व छुं न्यनेमाःसा प्रधानमन्त्री ज्याकुथिइ स्वापू ति धासें सतक विस्तारया ज्या दीमखु धासें पःखाः थुनाः त्वःतेगु अडान काःगु खः ।
LEAVE YOUR COMMENTS