ने. सं. ११४६ चाैलागा आमै - माँया ख्वाःस्वयेगु

चिनिया पत्रिका ‘ग्लोबल टाइम्स’या खबर : नेपालय् भारतीय मिडिया, पश्चिमा देय् व कांग्रेस चीनविरुद्ध

येँ (नेपालभाषा टाइम्स) – चीनं नेपाःया भूमि मिचे याःगु समाचार प्रकाशन यायेगु ज्याय् भारतीय सञ्चार माध्यम, पश्चिमी शक्ति व नेपाली कांग्रेसया नेतात लगे जुयाच्वंगु द्वपं चीनं बिउगु दु ।

चिनियाँ सरकारया ख्वाःपौ ‘ग्लोबल टाइम्स’ य् ‘हु इज बिहाइन्ड द फ्याब्रिकेटेड प्रोभोकिङग नेपाल एगेन्स्ट चाइना ?’ शीर्षकया समाचारय् हुम्ला जिल्लालिसे सीमा स्वाःगु क्षेत्रय् चिनियाँ सेनां नेपाःया भूभाग मिचे यानाः भवन दयेकूगु द्वपं बीगु ज्या भारतीय व पश्चिमा सञ्चार माध्यमं पिथंगु खँ न्ह्यथनातःगु खः ।

उगु समाचारय् भारतया पक्ष तायेकातःगु नेपाली कांग्रेस व उकिया नेतात लगे जुयाच्वंगु द्वपं नं बियातःगु दु । कर्णाली प्रदेश कांग्रेस संसदीय दलया नेता व पुलांम्ह पर्यटन मन्त्री जीवनबहादुर शाहीं चीन विरोधी गतिविधिया नेतृत्व यानाच्वंगु द्वपं नं ग्लोबल टाइम्सय् बियातःगु दु । पत्रिकाय् न्ह्यथनातः कथं शाहीं सीमा मिचे याःगु धाःगु हुम्लाया अवलोकन यानाः चीनं सीमा मिचे याःगु धकाः पार्टीइ प्रतिवेदन लःल्हाःगु खः ।

उकथं हे ग्लोबल टाइम्सय् नेपालय् पश्चिमा गतिविधि अप्वया वंगुलिं नेपाःया बुद्धिजीवीतय्सं शंका प्वंकेगु यानाच्वंगु खँ नं न्ह्यथनातःगु दु । नेपालय् गैरसरकारी संस्थातय्सं राजनीति स्वार्थय् देय्न्यंकं गतिविधि यानाच्वंगु खँ नं पत्रिकाय् न्ह्यथनातःगु दुसा छुं छुं भारतीय टेलिभिजनं नेपाःया सार्वभौमसत्ता विरोधी खबर प्रशारण यानाः नेपाः व चीन सम्बन्धय् म्हितेत स्वयाच्वंगु खँ नं धयातःगु दु। अथे हे नेपाःया छुं सञ्चार माध्यम नं भारतीय शक्तिया प्रभावय् लानाः उमिसं नं चीनं सीमा मिचे याःगु समाचारयात प्राथमिकता बियाः छापे याःगु द्वपं नं बियातःगु दु ।

ग्लोबल टाइम्सया उगु समाचारय् नेपालय् अप्वः मात्राय् अदृश्य विदेशी लगानी दुगु चीधंगु देय् जूगु खँ नं न्ह्यथनातःगु दु । ग्लोबल टाइम्सय् च्वयातःगु दु, ‘यक्व अदृश्य वैदेशिक लगानी दुगु नेपाः चीधंगु देय् खः, गन भारतीय व पश्चिमी देशं थःगु प्रभाव अप्वयेकेगु कुतः यानाच्वंगु दु ।’

ग्लोबल टाइम्सय् पिहांवःगु खबर ब्वनेत थुगु लिंकय् क्लिक यानादिसँ ।