संघीय प्रणालीया शिक्षा नीति ग्व ?

येँ – देशय् संघीय व्यवस्था कार्यान्वयनय् वयेधुंकूगु दु । तर देय्या शिक्षा प्रणालीइ धाःसा संघीय व्यवस्था अझं दुहां वने खंगु मदुनि । संघीय प्रणालीइ शिक्षा व्यवस्था गज्याःगु जुइमाः धइगु खँ निर्धारण यायेत सरकारं गठन यानातःगु आयोग छुं हे ज्या मयासे भंग जुइगु अवस्थाय् थ्यंगु दु ।थनिं न्याला न्ह्यः संघीय व्यवस्थाया शिक्षा नीति गज्याःगु जुइमाः धकाः नीति निर्धारण यायेत सरकारं उगु आयोग गठन याःगु खः । थ्व आयोगयात संघीय व्यवस्थाया शिक्षा नीति व पाठ्यक्रम समेत तयार यायेगु म्याण्डेट बिउगु खः ।

तर वंगु न्यालाया दुने थ्व आयोगं अज्याःगु प्रतिवेदन दयेकेगु ला त्वःता हे छ्वये, न्हूगु शिक्षा नीति सम्बन्धी मस्यौदाया नं छगू खाका जक तयार यानागु खँ धाःगु दु । थःपिनि म्याद सिधःगु इलय् लाकाः आयोगया बैठक च्वनाः आः थःपिनि म्याद मेगु प्यला थपे याना बी माल धकाः सरकारयात इनाप याःगु दु । तर शिक्षाविद्तय्सं धाःसा न्यालाया दुने केवल छगू खाका जक तयार जुल धायेबलय् आः प्यलाया दुने पूरा नीति तयार याये फइगु सम्भावना मदु धयाहःगु दु । देशय् वःगु सम्पूर्ण परिवर्तनया खँ शिक्षाय् दुथ्यायेमाःगु खँ विज्ञतय्सं धाःगु दु ।