एक्टिंग कासाय् उत्कृष्ट जूपिंत सिरपाः

येँ- सुखावति मल्टि प्रोडक्सन प्रा. लि.या ग्वसालय् जूगु ‘जि नं एक्टिंग याये सः’ कासाय् उत्कृष्ट जूपिंत छगू ज्याझ्वःया दथुइ सिरपाः लःल्हाःगु दु । कोरोना संक्रमण रोकथाम व नियन्त्रणया निंतिं तयातःगु लकडाउनया ईयात सदुपयोग यायेगु ल्याखं भर्चुअल माध्यमं उगु कासा ग्वसाः ग्वःगु खः ।

कासाय् ११ दँ दुम्ह सिम्रिक श्रेष्ठ न्हाप लाःगु खःसा सबिन शाक्य व समन शाक्य लिउ व विधान तुलाधर व मोहिनी तुलाधर लियांलिउ लाःगु खः । दकलय् बांलाःम्ह मिजं प्याखंम्वःया सिरपाः अमु शाक्य व मिसा प्याखंम्वःया सिरपाः कृष्णशोभा उलकं त्याकादीगु खःसा दकलय् क्वकालिम्ह प्याखंम्वःकथं च्यादँ दुम्ह सजगता मानन्धरं सिरपाः त्याकादीगु खः ।

न्हाप सिरपाः त्याकेत ताःलाःम्ह श्रेष्ठयात हे मूपाहां यानाः न्ह्याकूगु ज्याझ्वलय् यल महानगरपालिका १६ वडाअध्यक्षनापं म्येच्वमि व संकिपा निर्माता निर्मलरत्न शाक्य, फिल्म वितरक गोपालकाजी कायस्थ, नेवाः खलः इजरायलया नरेश श्रेष्ठ, पोर्चुगलया गंगा नेम्कुल पाहांकथं झायादीगु खः ।
कासाय् नांजाःम्ह निर्देशक, कलाकार आर्यम नकःमि, नांजाःम्ह निर्देशक, च्वमि, कलाकार रामकृष्ण खड्गी, नायिका हिसिला महर्जन निर्णायकमण्डलय् च्वनादीगु खः ।