धरहरा कि अस्पताल

नुगःचुया ल्वगियात वीर अस्पतालय् आइसियु बेड खालि मदु धकाः भर्ना मकाः । सरकारी अस्पतालय् हे आईसियु बेडया अभाव जुयाच्वंगु दु । अथेहे कोरोना ल्वचं कःम्ह ल्वगियात नं अस्पतालय् भेन्टिलेटर मरु धकाः भर्ना मकाःगु कारणं ल्वगिया मृत्यु जूगु समाचार वयाच्वंगु दु। थुकिं सरकारयात लाय् बुयाच्वंगु दु ।

छखे देय्या अस्पतालय् बेडया अभाव जुयाच्वंगु दु, मेखे झी प्रधानमन्त्री धाःसा ‘मेरो धरहरा म आफै बनाउँछु’ धकाः ४ अर्ब खर्च यानाः २२ तल्लाया लिफ्टेड व्यावसायिक धरहरा दयेकाच्वंगु दु। कोरोनाया कहरं यानाः लकडाउन यायेमाःगु इलय् आमनागरिकयात सरकारं राहत बीगु व स्वास्थ्य सेवा बीमाःगु खः । तर सरकार धाःसा ४ अर्ब खर्च यानाः धरहरा दयकेगुलिइ हे व्यस्त जुयाच्वंगु दु। थुकिं यानाः सरकारया आलोचना जुइगु स्वाभाविक हे खः । देय्यात आवश्यकता मजूगु धरहरा दयेकाः देय्या ४ अर्ब दां खर्च यानाच्वन धकाः चर्चा जुयाच्वंगु दु। राजधानीया हे सरकारी अस्पतालय् आईसियु बेड मदु, तर आमनागरिकतय्त आवश्यक हे मजूगु धरहरा दयेकाः ४ अर्ब खर्च यानाच्वन । देय्यात शिक्षा, स्वास्थ्य, रोजगारी आवश्यक कि धरहरा ?

थौंकन्हय् देशय् नेकपा अध्यक्ष केपी ओलीया नेतृत्वय् बहुमतया एकमना सरकार दु। थ्व सरकारं देय् व जनतायात राहत बी कथंया ज्या न्ह्याकी, दैनिक आवश्यकतायात प्राथमिकताय् तयाः शिक्षा, स्वास्थ्य, रोजगारी, यातायात, लः आदिइ आमनागरिकया अःपुक पहँुच दइकथं ज्या याइधकाः आमनागरिकं तःधंगु अपेक्षा याःगु खः । तर आमनागरिकया अपेक्षा कथं बहुमत धाःगु सरकारं छु यानाः क्यने मफुत । अझ धाये यायेगु कुतः तकं याःगु खनेमन्त । सरकार धइगु देय् व जनताया लागि ज्या यायेत खः । गुलिखे आमनागरिकतय्त ला छछाः जा नयेत सुथंनिसें तिंख्यलय् वनाः लाइन च्वने माःगु अवस्था जुयाच्वंगु दु ।

तर ओली नेतृत्वया सरकार धाःसा आमनागरिकतय् आवश्यकता पूवंकेगु स्वयाः नं थःगु म्हगस पूवंकेगु कथंया ज्या यानाच्वंगु दु । म्वाःमीमदुगु म्हगस ज्वनाः देय्याा धुकुतिया ४ अर्ब दां खर्च यानाच्वंगु दु। आमनागरिकतय् आबश्यकतायात ध्याकुनयु वांछ्वयाः धरहरा जक मखु ततःजाःगु भ्यु टावर, रंगशाला, सभाहल पानीजहाज, रेल, मेट्रो रेल, मोनोरेल, २५ तल्लाया स्काइवाकर टावर, स्मार्ट सिटी आदि दयेकेगु धकाः जक ब्वाँय् जुयाच्वंगु दु। थज्याःगु ज्याय् हे थःगु ध्यान केन्द्रित यानाच्वंगु दु। छु आःया इलय् देय्या आवश्यकता खः ला । थ्व आम जनताया आवश्यक्ता स्वयां नं नेतातय् आवश्यकता खः । नेतातय् थज्याःगु अर्बौं तकाया परियोजना हयेगु, अले कमिशन नयेगु खेल जक खः । परियोजना हल, दयेकेगु धकाः बजेट फ्यात, ठेक्का बिल, अले कमिशन नल । ठेक्का बियाः कमिशन नयेधुंकल कि ज्याया ठेगाना दइमखु । नेतातय्सं थथे हे जक यानाः देय्या धुकुति स्वाहा यानाच्वंगु दु। अले थौंया कोरोनाया महामारीया अवस्थाय् नं जनतायात वासः यायेत, कोरोना परीक्षण यायेत तकं थःम्हं हे ध्यबा पुलेमाः धयाच्वंगु दु । जबकि महामारीया अवस्था जनताया स्वास्थ्यया जिम्मेवारी पूवंक सरकारं कयाः निःशुल्क परीक्षण, उपचारया व्यवस्था यायेमाःगु खः ।

झीथाय् नेतां जुइमा वा अभिनेतां, देय् व जनताया तत्कालया आवश्यकता छु धयागु तकं मसिउ थें च्वं । देशय् कोरोनाया संक्रमणया इलय्अ स्पताल, भेन्टिलेटर, आईसियु, प्रयोगशालाया अभाव जुयाच्वंगु दु। आः कोरोनाया महामारी वः थें भबिष्यय् मेमेगु नं थज्याःगु आपत–बिपत मवइ धकाः धाये फइमखु ।

अथे ला नेता जक मखु अभिनेता नं चन्दा उठे यानाः ४ अर्ब फुकाः २५ हजार दर्शक क्षमताया अन्तराष्ट्रिय क्रिकेट रंगशाला दयेकाच्वंगु दु । क्रिकेट रंगशाला दयेकाच्वंपिंसं नेपालय् दँय् ग्वःगु अन्तराष्ट्रिय क्रिकेट म्याच जुइ धकाःतकं मसिउ थें च्वं । नेता ला नेता, अभिनेता नं ध्वां जुयाच्वंगु दु । देय्या प्रधानमन्त्री ओलीं आः थःगु गृहजिल्ला झापाय् नं थथे हे अर्बौं तका खर्च यानाः भ्यूटावर दयेकेत्यंगु दु। प्रधानमन्त्री जक मखु, स्थानीय सरकार, सांसद, नेता, अभिनेतात सकलें थज्याःगु हे भ्यूटावर दयेकेगु, स्मार्ट सिटि दयेकेगु धकाः ब्वाँय् जुयाच्वंगु दु। तर देय्यात दयेकेमाःगु ‘भ्यु टावरया सिटि’ कि ।।।हेरिटेज सिटि’ । सम्पदा फुक्क स्यंकाः भ्यूटावर जक दयेकां छु याये । स्वयेगु हे छुं मन्त धाःसा भ्यूटावरया छु अर्थ । उकिं दयेकेमाःगु ला सम्पदा शहर (हेरिटेज सिटी) धकाः खः । तर स्वनिगःया सम्पदायात बेवास्ता यानाः भ्युटावर दयेकेगुली हे सरकार लगे जुयाच्वंगु दु ।

नेपाः देय् धयागु प्राकृतिक सौन्दर्यया अपार खानि ख । अथे हे स्वनिगः धइगु कला, संस्कृति, सांस्कृतिक सम्पदाया खानि खः । स्वनिगःया त्वाःत्वाः सम्पदायुक्त । येँ देय्या त्वाःत्वाःपतिकं सम्पदा धस्वाना च्वंगु दु। येँ देय्या कला, संस्कृति, सांस्कृतिक सम्पदात स्वेयत दँय्दसं ललौंलख बिदेशी पर्यटक वयेगु यानाच्वंगु दु । येँया सम्पदा हे नेपाःया म्हसिका खः । थज्याःगु कला, संस्कृति, सांस्कृतिक सम्पदायुक्त देय्यात आः वयाः भ्यु टावरया नगर, स्मार्ट सिटि दयेकेगु कुतः यानाच्वंगु दु सरकारं ।

२०७२ सालय् भुखाचं दुनावःगु तसकं महत्वं जाःगु ऐतिहासिक सम्पदात दु्रतगतिं पुनर्निर्माण यायेगु स्वयां नं देय्यात अनावश्यक आर्थिक भार क्वबिइकाः धरहरा धाःसा दु्रतगतिं निर्माण जुयाच्वंगु दु। धाथें ला धरहरा दयेकेत खर्च याइगु प्यंगू अर्ब ध्यबां देशय् ग्वःगू अस्पतालत दयेके फइगु खः, स्वस्थ्य चौकित दयेके फइगु खः, डाक्टर उत्पादन याइगु ग्वःगू कलेज दयेके फइगु खः धकाः लेखाजोखा यायेमाःगु खः । तर थज्याःगु लेखाजोखा याये मसःगु खः वा मयाःगु खः वा सिइकसिइकं बुझ पचे याःगु खः । थ्व न्ह्यसः न्ह्याब्लें ल्यना हे च्वनी । छम्ह व्यक्तिया म्हगस पूवंकेत देय्या ४ अर्ब खर्च यानाः धरहरा दयेकूगु खः धकाः चर्चा जुइगु याः । खः नं खः थ्व धरहरा दयेकेगु ज्या प्रधानमन्त्री ओलीया इच्छा पूवंकेत हे जक जुयाच्वंगु धाःसां ज्यु ।

नेपालय् बिदेशी पर्यटक वइगु नेपाःया कला, संस्कृति, सांस्कृतिक सम्पदा, प्राकृतिक मनोरम दृश्य स्वयेत वइगु खः, २२ तल्लाया धरहरा स्वयेत मखु । थज्याःगु २२ तल्लाया टावर ला उमिगु देशय् गुलि दु गुलि, झीथाय् वयाः स्वः वयेमाःगु आवश्यक मदु । झीथाय् नेतां जुइमा वा अभिनेतां, देय् व जनताया तत्कालया आवश्यकता छु धयागु तकं मसिउ थें च्वं । देशय् कोरोनाया संक्रमणया इलय् अस्पताल, भेन्टिलेटर, आईसियु, प्रयोगशालाया अभाव जुयाच्वंगु दु। सरकारं थुकिं नं शिक्षा कायेमाः थें च्वं । आः कोरोनाया महामारी वः थें भबिष्यय् मेमेगु नं थज्याःगु आपत बिपत मवइ धकाः धाये फइमखु ।

नरेन्द्रमान श्रेष्ठ ग्वंगःजु

च्वमिया मेमेगु

• विवादय् राष्ट्रपति
• अफाप सिद्ध बहुमतया सरकार
• दास मानसिकता गबलय तक ?
• गन सुलाच्वंगु दु नेवाः संघ संस्थात ?
• ओली सरकार असफल हे खः