सरकारया प्रशंसा छाय् मजुल ?

‘सरकारं याःगु ज्यायात खाली विरोध जक यात, प्रशंसा यायेगु धाःसा गबलें नं मयाः’ धकाः प्रधानमन्त्री केपी शर्मा ओलीं नुगलय् स्याकादीगु दु । नेकपाया अध्यक्ष प्रधानमन्त्री केपी शर्मा ओली नेतृत्वया बहुमतया स्थायी सरकारया पालय् आम नेपाःमिं लाभा किलां ८०० तका पुलाः नये मालाच्वंगु दु । अले प्याज किलों २०० तका पलाः नयाच्वंगु दु ।

महँगी थहां वनाः सगरमाथाया च्वकाय् थ्यने धुंकल । यदि विदेशं खाद्यान्न आयात मयात, महल वा मवल धाःसा नेपाःमि जनतां नयेतकं मखनीगु खःला धइगु चिउताः तयेमाःगु अवस्था वयेधुंकल । धायेत ला नेपाः कृषि प्रधान देय् धकाः धाइ । तर थन खाद्यान्ननिसें कयाः हरेक सामान विदेशं आयात यायेमालाच्वंगु दु ।

खय् भासं ‘नुन देखि सुन सम्म’ धाःथें हरेक सामान विदेशं हयेमाःगु अवस्था दु । उकिं आः नेपाःयात ‘कृषि प्रधान’ मधासे ‘आयात प्रधान’ देय् धकाः धाःसां जिल धकाः नं धायेगु यानाच्वंगु दु । नेपाः देय् झनझन परनिर्भर जुइमाःगु अवस्थाय् वनाच्वंगु दु । थज्याःगु अवस्थाय् ओली नेतृत्वया सरकार सफल धायेगु कि असफल ?

खय्तला थज्याःगु स्थिति ओली नेतृत्वया सरकारया पालय् जक वःगु धाःसा पक्का नं मखु । अथेखःसां ओली नेतृत्वया सरकारया थ्व निदँया कार्यकाल सफल कि असफल धकाः बहस हे चले जुयाच्वंगु दु । सत्तासिन दलतय्सं सफल धकाः दावी याना वयाच्वंसां विपक्षी दलतय्सं धाःसा असफल धया वयाच्वंगु दु । थ्व आः जक मखसे न्हापांनिसें चले जुया वयाच्वंगु प्रवृत्ति खः ।

झी प्रधानमन्त्री केपी ओलीं नं निदँतक सरकार चले जूगु धइगु हे सरकारया सफलता खः धकाः दावी याना वयाच्वनादीगु दु । अथे हे ओलिया लिउलिउ जुइपिं अले थः नेताया मलद्वारयात नं हरिद्वार खंकीपिं नेता कार्यकर्ता धाःपिंसं नं सरकार निदँतक चले जूगु धइगु हे सरकारया सफलता खः धयाच्वंगु दु ।

२०४८ सालय् नेपाली कांगे्रसया बहुमतया सरकार स्वदँ तक चले जूगु खःसा वयां लिपा निदँतक चले जूगु सरकार धइगु वर्तमान ओली नेतृत्वया सरकार हे खः । थ्व दथुइ गुलाय् छक्वः सरकार हिलेगु याना वयाच्वंगु खः । अथे खःसा निदँतक चले जूगु सरकारयात सफल मधासे छु धायेगु झीसं ? नेकपाया बहुमतया एकमना सरकार गठन जुइधुंकाः वयां लिपा आम नागरिकं गुलि अपेक्षा याःगु खः व धाःसा आतक नं पूवंगु मदुनि ।

खतुं आम नेपाःमि नागरिकं अपाय्सकं तःधंगु अपेक्षा नं याःगु मदु थ्व सरकारपाखें । मात्र न्हियान्हिथंया निंतिं माःगु अत्यावश्यकीय सरसामान, सर्वसुलभ तरिकां आपूर्ति जूसा गाः धइगु हे जक खः । आम नागरिकया जनजीविकाया निंतिं आवश्यक खाद्यान्नलिसें शिक्षा, स्वास्थ्य,रोजगार, यातायातय् आम नागरिकया सुलभ पहुँच दयेमाःगु व आपूर्ति सहज जुइमाः धइगु जक खः ।

तर ओली नेतृत्वया सरकार थ्व खँय् थ्व निदँया अवधिइ असफल जूगु खने दु धाःसां जिउ । नेकपाया अध्यक्ष ओली नेतृत्वया थ्व हे सरकार गठन जूगु इलय् मेलम्ची आयोजनाया ज्या ६ प्रतिशत जक ल्यं दुगु खः । तर सरकारया निदँया अवधि दुने थ्व ६ प्रतिशतया ज्या नं पूवंके मफुत । आः धयादिसँ थ्व सरकारयात सफल धायेगु कि असफल ? देय्या राजधानी थेंज्याःगु थासय् हे लःया समस्या दु ।

स्वनिगःवासीत त्वनेगु लःया निंतिं लिटरं स्वीतका पुलाः त्वने मालाच्वंगु दु । लाभा किलों च्यासः, प्याज किलों निसः, दुरु १ लिटरया सछि पुलेत बाध्य जुयाच्वंगु दु । आम जनता महँगीया मारय् लानाच्वंगु दु । तर सरकार धाःसा म्हगस जक क्यनाः लय् तायाच्वंगु दु । लः जहाज, रेल, मेट्रो रेल, स्मार्ट सिटी, ४ गू करोडया धरहरा दयेकेगु, अन्तर्राष्ट्रि क्रिकेट रंगशाला दयेकेगु आदि ज्याय् जक थ्व सरकार तक्यनाच्वंगु दु ।

आम नागरकया निंतिं आवश्यक जूगु व इमिगु निंतिं प्राथमिकता बीमाःगु महँगी व भ्रष्टाचार नियन्त्रण, शिक्षा, स्वास्थ्य, रोजगार, यातायात थेंज्याःगु आधारभूत आवश्यकतायात सहज व सुलभ आपूर्ति यायेगु खँय् सरकारया ध्यान वनाच्वंगु खने मदु धइगु आम नागरिकया भनाइ खः । थ्व सरकारं न त महँगी नियन्त्रण याये फत न त लःया समस्या हे समाधान याये फत न चाबही–सक्व, गोकर्ण–सुन्दरीजलया लँ हे पिच यानाः क्यने फत ।

सरकारं बांलाःगु ज्या नं यानाच्वंगु दु, तर सरकारया बांलाःगु ज्यायात बांलाः धकाः धायेगु यानाच्वंगु मदु धकाः सत्तारुढ दल व वया मतियारतय्सं धायेगु याः । अथे खःसां आम नागरिक, नागरिक समाज, बुद्धिजीवि, व्यापारी उद्योगपति धाःपिं सरकारया ज्याखँयात असन्तुष्टि प्वंकेगु यानाच्वंगु दु ।

थ्व सरकार गठन लिपा प्रधानमन्त्री ओलीं ‘आः वैदेशिक रोजगार ज्याकू बन्द याःसां जिल’ धकाः धाःगु खः । प्रधानमन्त्रीया थ्व धापू धापुतिइ हे जक सीमित जुयाच्वंगु दु । तर आः नं न्हिं हे द्वःछिम्ह धइथें ल्यासेल्याय्म्ह वैदेशिक रोजगारया निंतिं वनेगु यानाच्वंगु दु । थ्व ल्याखं आःया अवस्थाय् सरकारया ज्या धइगु कृषि उत्पादन अप्वयेकेगु, बन्द उद्योगयात संचालन यायेगु, उद्योग धन्दायात विस्तार यानाः महँगी, भ्रष्टाचार नियन्त्रण यायेगुलिइ ध्यान बीमाःगु खनेदु ।

सम्बन्धित बुखँ

LEAVE YOUR COMMENTS