जनताया उपचारया दायित्व सरकारया खः
संघीय लोकतान्त्रिक गणतन्त्र देय् नेपाः । लोकतन्त्रय् जनताया आधारभूत आवश्यकता सरकारं पूवंकेमाःगु मान्यता दु। थ्व मान्यता हलिंन्यकं हे न्यनाच्वंगु दु। उकथं हे थःगु देय्या जनताया आधारभूत आवश्यकता पूवंकेगु ज्या सरकारया खः । नेपाःया संविधानय् नं शिक्षा, स्वास्थ्ययात सरकारं निःशुल्क बीमाःगु न्ह्यथनातःगु दु। तर नेपाःया संविधानय् न्ह्यथनातःगु अधिकारं तकं थौं वयाः जनता बञ्चित जुइमाःगु अवस्था ब्वलंगु दु। विश्व कोरोना भाइरसया महामारीइ लानाच्वंगु दु। उकी नेपाः अपवाद मखु। तर नेपाःया सरकारं कोरोना संक्रमणयात न्यूनिकरण यायेगु वा उकियात व्यवस्थापन याये फयाच्वंगु मदु। सरकारया उचित नीति मदुगुलिं यानाः थौं जनता स्वास्थ्य सेवां तकं बञ्चित जुइमाःगु अवस्था ब्वलंगु दु ।
कोरोना भाइरस संक्रमण नेपालय् लुइधुंका नेपाल सरकारं सरकारी अस्पतालय् निःशुल्क वासः यायेगु व्यवस्था याःगु खः । तर थौं वयाः सरकारं आः जनतायात निःशुल्क वासः याये फइमखु धकाः ल्हाः ल्ह्वंगु दु। अथे धइगु आः जनतां कोरोनाया वासः यायेमाःसा थःपिंसं हे खर्च यायेमाःगु अवस्था वःगु दु। तर जनताया हैसियत वासः याये फइगु अवस्था दु वा मदु धइगु बिचाः सरकारं याःगु मदु। खतुं नेपालय् कोरोना भाइरसया संक्रमण लुइवं सरकारं ज्वनेमाःगु रणनीति मज्वंगुया परिणाम हे थौं देय्न्यंकं कोरोना संक्रमण अप्वया वंगु खः । तर सरकारं थःगु कमजोरीयात अझ नं स्वीकार यायेत अस्वीकार याना वयाच्वंगु दु ।
देशय् कोरोना संक्रमित लुइवं हे सरकारं थ्व ल्वय् छुं हे कथंया तच्वःगु ल्वय् मखु धकाः हावादारी गफ याःगु लिच्वः थौं देय् आक्रान्त जूगु खः । तर नं सरकारं माःगु रणनीति दयेकेगु ज्या धाःसा आः तक नं याये फयाच्वंगु मदु। थौं संक्रमित अप्वया देय्या फुक्कं धयाथें अस्पतालय् विरामी तये फइगु अवस्था मदु धकाः सरकारं धायेगु यानाच्वंसां नं माक्वः आइसोलेसन सेन्टर, आईसीयु व भेन्टिलेटर तकं व्यवस्था याये फयाच्वंगु मदु। संक्रमित विरामीयात वासः यायेत ध्यबा मदु धकाः धाःम्ह सरकारं मोहनि नखःया इलय् सांसदपिंत मोहनि भत्ता इनेगु ज्या यात ।
प्रम ओली सरकारं जनताया वासः यायेमखु धकाः धयागु मखु। आर्थिक रुपं सम्पन्न जूपिंत वासः याये मखु धयागु खः धकाः स्पष्टिकरण बीगु ज्या यात । थ्व धइगु हाकनं छकः जनताया ध्वं लायेत स्वःगु खः । सरकारी धापू लिपा आः वयाः छगू न्ह्यसः ब्वलना धात्थें नेपालय् गुलि प्रतिशत जनता आर्थिक रुपं सम्पन्न दु? खुला न्हय्ला तकं लजगा तंकेमाःपिं जनता गुलि सम्पन्नपिं खः ।
अथे ला थ्व सरकारं आः तक याना वयाच्वंगु धयागु थज्याः थज्याःगु हे जक ज्या खः । देशय् कोरोना भाइरस संक्रमित लुइधुंकाः उमित व्यवस्थापन यायेगु स्वयां अप्वः सरकारं थःगु पद ल्यंकेगु निंतिं पार्टी तछ्यायेगु विधेयक हयेगु ज्या यात। वयां लिपा पार्टी दुने हे थीथी कथंया विवाद पिकयाः खुला ई अथें सितिं छ्वल । तर कोरोना भाइरस नियन्त्रणया निंतिं छुं हे कथंया ज्या मयाः । बरु कोरोनाया बारे अनेक कथंया फय्गं खँ ल्हायेगुलिइ थःगु ई सितिं छ्वयाच्वन । अले आः वयाः सरकारयाके विरामीया वासः यायेत ध्यबा मदु धकाः धयाच्वंगु दु। थ्व धइगु पूर्ण रुपं सरकारया नालायकीपन खः ।
आः नं सरकारयाके ध्यबा मदु धकाः धयाच्वंगु दु। तर सरकारी तथ्यांक स्वयेगु खःसा अझ नं सरकारी ढुकुटी २ खर्ब स्वयां अप्वः ध्यबा दु। तर जनतायात वासः यायेत ध्यबा मदु धकाः जनतायात ध्वं लायेगु ज्या सरकारं यानाच्वंगु दु। जनताया जीवन रक्षा यायेगु दायित्व सरकारया खः । तर सरकारं जनताया जीवन रक्षा यायेगु स्वयां नं थःपिनिगु पद ल्यंकेगुलिं ब्वाँय् जुयाच्वंगु आभास आम जनतां यानाच्वंगु दु। सरकारं जनतायात वासः यायेत ध्यबा मदु धकाः धयाच्वंगु दु। तर सरकारी तथ्यांक कथं स्वलाया दुने जक सरकारं साधारण खर्च जक निगू खर्ब यायेधुंकूगु दु। तर विकास निर्माणया ज्या धाःसा खास हे जुयाच्वंगु मदु। तर नं सरकारं ध्यबा मदु धकाः धायेगु धइगु जनताया हिचःति हायेकाः कयातःगु करया दुरुपयोग खः । जनताया जीवन स्वयां विकास निर्माण आवश्यकता खः कि मखु धइगु न्ह्यसः नं थौं ब्वलनाच्वंगु दु। जब जनता हे म्वाय् मखनिगु खःसा विकास निर्माण छु यायेत ?
अथे जुयाः पुलांम्ह प्रधानमन्त्री बाबुराम भट्टराई नं सरकारयात इनाप यानाच्वंगु दु। कि सरकारयाके जनतायात वासः यायेत ध्यबा मदुगु खःसा विकास निर्माणया ध्यबा रकमान्तर यानाः जूसां जनताया वासः यायेगु व्यवस्था याः । तर सरकारं थुखेपाखे ध्यबा बीगु कुतः यानाच्वंगु मदु। उलि जक मखु सांसद विकास कोषया नामय् नं खुगू अर्ब स्वयां अप्वः ध्यबा ल्यनाच्वंगु दु। अज्याःगु ध्यबायात नं थौं वयाः सदुपयोग यायेमाःगु आवश्यकता जुयाच्वंगु दु। खय्त ला गुलिखे सांसदपिंसं अज्याःगु ध्यबा रकामान्तर यानाः कोरोनाया महामारी नियन्त्रणया निंतिं छ्यलेत सरकारयात इनाप याःगु खः । तर सरकारं सांसदपिनिगु सःयात नं बेवास्ता यानाच्वंगु थौंया अवस्था खः ।
कोरोना भाइरस नेपालय् दुहां वये न्ह्यः सरकारं स्वला तक लकडाउन यात। गुकिं यानाः देय् या अर्थ व्यवस्थाय् लिच्वः लात। गुलिखे जनतां थःगु लजगाः तकं त्वःतेमाःगु अवस्था वल । वयां लिपा हाकनं सरकारं निषेधाज्ञा जारी यात। उकिया लिच्वः आपालं सर्वसाधारण जनता फ्वनाः तकं नयेत बाध्य जुल । थःगु हिचःति हायेकाः स्वाभिमान जीवन हनाच्वंपिं जनता थःगु स्वाभिमान तकं तंकेमाःगु अवस्था वल । तर थौं वयाः उकथं निरिह जुयाच्वंपिं जनता छुं जुयाः संक्रमित जुल धाःसा उमित वासः सरकारं याये फइ मखु धकाः गुगु धाल थ्व धइगु सरकारया निर्लजता खः । राज्य सुयागु निंतिं खःसा जनताया निंतिं खः ।
जनताया करं चले जुयाच्वंगु राज्य सत्तां जनताया समस्यापाखे बिसिउँ वनेगु उचित मखु। थ्वहे झ्वलय् प्रम ओली सरकारं जनताया वासः यायेमखु धकाः धयागु मखु। आर्थिक रुपं सम्पन्न जूपिंत वासः याये मखु धयागु खः धकाः स्पष्टिकरण बीगु ज्या यात। थ्व धइगु हाकनं छकः जनताया ध्वं लायेत स्वःगु खः । सरकारी धापू लिपा आः वयाः छगू न्ह्यसः ब्वलना धात्थें नेपालय् गुलि प्रतिशत जनता आर्थिक रुपं सम्पन्न दु? खुला न्हय्ला तकं लजगा तंकेमाःपिं जनता गुलि सम्पन्नपिं खः । थुकिया लिसः सरकारं बीमाः मखुसा सरकारयात लाथेपाथें न्ववायेगु अधिकार मदु। खः आः नं सरकारं उचित पलाः मल्ह्वनेगु खःसा उकिया लिसः गथे जुइ धकाः धायेफइगु अवस्था मदु। जनताया करं चले जुयाच्वंगु सरकार खः । महामारीया इलय् जनताया निःशुल्क वासः यायेगु दायित्व सरकारया हे खः । थ्व दायित्व बिसिउँ वनेगु उचित मखु ।
LEAVE YOUR COMMENTS