ने. सं. ११४४ कछलागा द्वादशी -

देवत्वकरणं लाकिगु लिच्वः

‘हर हर महादेव’ ! हिन्दु धर्मालम्बीतय्सं महाद्यः प्रति सम्मान व आस्था प्वंकाः धाइगु छपु जप खः । हरण खँग्वःपाखे वःगु हरया अर्थ कयायंकीगु खः । ‘हर हर महादेव’ या अर्थ झीगु पीडा कयायंकेत महाद्यःयात याइगु अनुनय खः । भारतया वाराणासी शहरय् च्वंपिंसं ‘हर हर महादेव’ न्हियान्हिथं अभिवादन याइगु इलय् तकं छ्यली । वहे वाराणासी शहरय् सन् २०१४ य् ‘हर हर महादेव’ या पलेसा ‘हर हर मोदी’ धयागु नारा थ्वल । भारतीय जनता पार्टी (भाजपा) या नेता नरेन्द्र मोदीया नां प्रधानमन्त्रीया निंतिं प्रचार जुयाच्वंगु इलय् भाजपया कार्यकर्तातय्सं महाद्यःया थासय् मोदी खँग्वः तयाः नारा थ्वयेकेगु ज्या यात । वहे दँय् मोदी भारतया प्रधानमन्त्री पदय् निर्वाचित जुल ।

मोदी भारतया १४ क्वःगु प्रधानमन्त्री जुइधुंकाः सन् २०१५ य् गुजरातया राजकोटय् मोदीया नामं छगः देगः तकं दयेकल । राजकोट जिल्लाया कोथाडिया गामय् न्हापा मोदीया किपा जक तयाः पुजा याइगु खःसा प्रधानमन्त्री जुइधुंकाः धाःसा झ्वताः तयाः हे पुजा यायेगु ज्या सुरु जूगु खः । अथेहे दक्षिण भारतया तिरुचिरापपाली गामय् नं प्रधानमन्त्री मोदीया झ्वाताः सहितया देगः दयेकूगु दु । अनया छम्ह किसानं मोदीया सम्मानय् अज्याःगु देगः दयेकूगु खः ।

गुजरातया मुख्यमन्त्रीया कार्यकाल लिपा प्रधानमन्त्री कथं भाजपां न्ह्यःने हयेधुंकाः मोदीयात थज्याः कथं देवत्वकरण यायेगु ज्या जुल कि वं याःगु ज्याय् असहमति क्यनीपिं फुक्कं गलत धकाः क्यनेगु कुतः जुल । मोदी प्रधानमन्त्री जुइधुंकाः भारतीय संचार ख्यलय् राज्यपाखें लगानी यानाः मोदीं याःगु ज्या फुक्कं पाय्छि धाइगु हेजेमोनी निर्माण यात । राष्ट्रिय स्वयम सेवक संघ व भारतीय जनता पार्टीया कार्यकर्ता निसें राष्ट्रिय संचार माध्यमय् तकं मोदीया अन्धभक्त जुयाः पिहांवःगु फलस्वरुप वया दुने थज्याःगु अहमता ब्वलना वल की थम्हं न्ह्याःगु याःसां ज्यू, थःत तक्कर बीपिं, हाथ्या बीपिं सुं मदु धयागु भाःपिया न्ह्याः वनेत स्वल ।

फलतः थौं भारतय् किसानतय् समस्या विकराल जुयाच्वंगु दु । धार्मिक सहिष्णुता स्यनावनाच्वंगु दु, मुस्मांतय्सं थःगु देशय् हे थःत असुरक्षित महसुस यानाच्वंगु दुसा स्वयम सैनिक भर्तीया न्हूगु नियमं भारतीय सेनाय् तरगं हयाच्वंगु दु । थज्याःगु इलय् नं प्रधानमन्त्री मोदी न्ह्याःगु थाय् वंसा कार्यकर्तातपाखें ‘हर हर मोदी’, ‘जय मोदी’ धायेगु दिउगु मदुनि । अन्धभक्तत थःगु रफ्तारय् ‘ज्यू, हजुर’ यानाच्वंगु दुसा वहे लिधंसाय् मोदी छगू लिपा मेगु लोकतान्त्रिक अधिकारयात कुण्ठित यायेगुपाखे न्ह्याः वनाच्वंगु दु ।

संसरया न्ह्याःगु थासय् नं राजनीतिक नेतृत्वया पं लिनाच्वंपिंस सहि तरिकां सल्लाह, सुझाव व झकझके यायेगु ज्या मजुुलधाःसा अज्याःगु नेतृत्वय् अहमता अप्वयावनीगु दसु दु । अले अज्याःगु अहमताया हुनिं नेतृत्वं छगू लिपा मेगु गल्ति याइगु व नेतृत्व स्वयम नं निरंकुश जुइगु खतरा ब्वलनाच्वनी । नेपालय् नं अज्याःगु हे प्रवृत्तिया विकास जुयावःगु दु । म्हिगः राजनीतिक पार्टी दुने नेतृत्वनाप सतिक च्वनेगु निंतिं उमिसं न्ह्याःगु ज्या याःसां ‘एस म्यान’ जुइगु प्रवृत्ति ब्वलंगु खः । व हे कारणं राजनीतिक दलतय्सं जनताया अपेक्षा कथं यायेमाःगु ज्याखँ यायेत गन चुके जुल धकाः नेतृत्वं गुब्लें बिचाः यायेमफुत । न्ह्याबलें थःपिंसं याःगु ज्यायात जनतां साथ व समर्थन यानाच्वंगु भ्रमय् च्वनाच्वन ।

थौं व हे भ्रमया कारणं राजनीतिक दलतय् विकल्पय् स्वतन्त्र उम्मेदवारतय् उदय जुल । जनतानाप सतिक च्वने मफुगु निसें जनहितया ज्या यायेमफुगुलिं ब्यालेट मार्फत राजनीतिक दलया विकल्पय् स्वतन्त्रत त्यानावल । तर राजनीतिक दलतय् दथुइ ब्वलंगु अज्याःगु विकृत प्रवृत्ति म्हो ईया दुने हे स्वतन्त्र उम्मेदवार जुयाः त्यनावःपिं दथुइ नं खनेदुगु दु । थ्व छगू तःधंगु विडम्बना खः । न्हापा ‘आई लभ यु केपी बा’ धकाः राजनीतिक नेतृत्वयात देवत्वकरण यायेगु ज्या थौं ‘बालेन, बालेन’ धासें स्वतन्त्र उम्मेदवार तक थ्यंगु दु ।

येँ महानरपालिकाया मेयरय् स्वतन्त्र उम्मेदवारया रुपं त्याःम्ह बालेन्द्र शाहया चर्चा थुलि जुयाच्वंगु दु कि थौं बालेन शाहं याःगु न्ह्याःगु ज्या नं पाय्छि खः धयागु कथंया भ्रम ब्वलंका बिउगु दु । मेयरय् उम्मेदवार बिउगु इलं निसें हे चर्चाया शिखरय् थ्यंम्ह बालेन शाह थौं येँ महानगरपालिकाया ज्याखँया कारणं चर्चा जुयाच्वंगु दु । अनाधिकृत रुपं सार्वजनिक जग्गाय् च्वनाच्वंपिंत चीकेगु निसें फुटपाथ पसः तयेके मबिउगुलिं मेयरया तारिफ जुयाच्वंगु जुल । तर थ्वहे झ्वलय् तुकुचाया उत्खन्न यायेगु धासें कानून पूवंकाः, मापदण्ड कथं दयेकातःगु नीजि छेँ निसें मस्त ब्वनाच्वंगु इलय् ब्वनेकुथिइ तकं डोजर चले यायेगु ज्या जुल । अथेखःसां बालेन शाहयात देवत्वकरण यानाच्वंपिंसं नीजि छेँ नं थुनेमाः, मुआब्जा नं बीम्वाः, मस्त ब्वनाच्वंगु जुइमाः वा बिरामिं वासः न्यानाच्वंगु पसः जुइमाः न्ह्याथाय् नं न्ह्याःगु इलय् डोजर चले यायेमाः धकाः प्रोत्सहान यायेगु ज्या जुयाच्वंगु दु ।

मेयर बालेन शाहयात बियाच्वंगु थुकथंया प्रोत्साहनया हे कारणं अदालतया आदेशयात तकं बेवास्ता यासें तुकुचा उत्खननया नामय् नीजि सम्पत्तिइ डोजर चले यानाच्वन । कानून कथं माःगु दक्वं भ्वँ दुसां अज्याःगु भ्वँया छुं अर्थ मदु धासें बालेन शाहया टिमं क्यंगु अहमता व हे देवत्वकरणया लिच्वः खः । झी निष्पक्ष जुयाः मुल्यांकन यायेमाः । येँ देय्यात व्यवस्थित, सफा व बांलाःगु सहर दयेकेगु ज्याय् मेयर बालेनयात महानगरवासीपिंसं समर्थन याःगु नं खः, याना नं च्वनी । तर मखुगु खँय् धाःसा झीसं सः थ्वयेके हे माः । विरोध याये हे माः । रचनात्मक सुझाव व सल्लाह बियांतुंच्वने माः ।

‘बालेन, बालेन’ धकाः सार्वजनिक थासय् समर्थकतय्सं नारा थ्वयेकेवं फुक्कं ज्या पाय्छि साबित जुइमखु । जब झीसं मखुगु खँयात नजरअन्दाज याइ, उकिं कन्हय् शासन यानाच्वंपिंके अंहकार ब्वलंकी । नेतातय् देवत्वकरण यायेगु ज्यां ब्वलनीगु अहंकारं अन्त्वगत्वा जनताया हक कुण्ठित जुइगु व संवैधानिक अधिकार तकं हनन् जुइगु खतरा ब्वलनाच्वनी । उकिं शासकतय् प्रत्येक पलाःयात सतिक च्वनाः स्वयाः सहि व गलतया मुंल्याकन यायेफयेकेमाः । अले जक झीसं बिचाः याना कथं लोकतान्त्रिक समाजया निर्माण जुइफइ ।