हरेक क्षेत्र बिस्कं बिस्कं मापदण्ड दयेमाः

येँ (नेपालभाषा टाइम्स) – स्वनिगलय् न्हियान्हिथं कोरोना संक्रमिततय् ल्याः अप्वया वनाच्वंगु दु। स्वनिगलय् न्यना वनाच्वंगु संक्रमण नियन्त्रण हे यायेमफइ कथं न्ह्याः वनाच्वंगु दु। सरकारं नं आः स्वनिगलय् विशेष सतर्कता नालेमाःगु खँ धायेधुंकूगु दु। मन्त्रिपरिषद्या निर्णय सार्वजनिक यायेगु झ्वलय् सरकारया प्रवक्ता परराष्ट्रमन्त्री प्रदीप ज्ञवालीं नं स्वनिगलय् कोरोना उच्च जोखिमय् लानाच्वंगु धासें सतर्कता नालेत धाःगु दु। वय्कलं आः देय्न्यंकं संक्रमण खनेदुपिं मध्ये बछिं मल्याक हे स्वनिगलय् हे खने दयाच्वंगु धासें स्वनिगलय् च्वंपिंसं उच्च सतर्कता नालेमाःगु खँ धयादीगु दु ।

सरकारं सतर्कता नालेमाः धकाः धाःसां सरकार थःम्हं हे थःपिनिगु निर्देशन पालना जू मजू निगरानी यायेगु, कार्यान्वयन योकेगु निंतिं छुं नं याना मच्वंगु खँ विज्ञतय्सं धाःगु दु। उकिं जनस्तरं नं सुरक्षाया निंतिं थप उपायत नालेमाःगु विज्ञतय् धापू दु। नखः चखः न्ह्यःने वःगुलिं नं आः सतर्कता तच्वयेकेमाःगु विज्ञतय् धाःगु दु ।

विज्ञतय्सं जोखिम तच्वया वंबलय् आः सरकारं जोखिम म्हो यायेत तत्काल हे हरेक क्षेत्रय् बिस्कं बिस्कं हे मापदण्ड दयेकाः लागू यायेमाःगु खँ धाःगु दु। बिबिसीलिसे खँ ल्हासें जनस्वास्थ्य विज्ञ भोगेन्द्र डोटेलं धयादीगु, ‘संक्रमण समुदायस्तरय् थ्यनेधुंकल, छेँय् हे आइसोलेसनय् च्वनेमाःगु अवस्था वयेधुंकाः तर स्वास्थ्य मन्त्रालयं हरेक खँय् स्वास्थ्य मापदण्ड दयेकाःलागू यायेमाःगु खः । हवाइजहाज संचालन यायेत मापदण्ड दयेकू थें हरेक क्षेत्रय् बिस्कं बिस्कं हे मापदण्ड दयेकेमाः ।’

अथेहे जनस्वास्थ्य विज्ञ बाबुराम मरासिनी भीडभाड अप्वयाः संक्रमणया जोखिम नं तच्वया वःगु धासें आः सरकारी ज्याकू, सपिब मल, रेष्टुराँ थें जःगु भीड जुइगु थासय् वयेगु लँ व लिहां वनेगु लँ बिस्कं बिस्कं हे तयेमाःगु सुझाव बियादीगु दु। वय्कलं धयादी, ‘सुयां ख्वाः चूमलायेक, लिउनें जक खनेदइ कथं वयेगु व वनेगु व्यवस्था याये हथाय् जुइधुंकूगु दु ।’

अथेहे विज्ञतय्सं फयांफतले छेँय् नं पिहां मवनेगु हे बांलाःगु खँ धाःगु दु। लकडाउनया अवस्था मदुबलय् जनसमुदायं हे सचेत जुयाः म्वायेकं म्वायेकं पिहां वनेमजिउगु विज्ञतय् सुझाव दु। विज्ञतय्सं कोरोनां बचे जुइगु निंतिं भौतिक दूरी कायम यायेगु, साब्वनं ल्हाः सिलेगु मास्क तया जुइगु सुझाव दोहरे यानाः धाःगु दु। अथेहे छेँय् दुने हे पिनेयापिं मनूत वल धाःसा मास्क तयाः च्वनेगु यायेमाःगु विज्ञतय् सुझाव दु ।