जीवित द्यःपिं श्री गणेश व श्री भैरब प्रतिस्थापन
# संघरत्न शाक्य
थौं स्वयां २६० दँ न्ह्यः विक्रम संवत् १८१३ (नेपाल संवत् ८७७ ) य् दकलय् लिपांम्ह मल्ल जुजु जयप्रकाश मल्ल शासनकालया भदौ शुक्लपक्षया दिं कुन्हु तलेजु द्यःया प्रतीककथं शाक्यवंशया कुल पुत्रीपिंमध्ये छनौट यानाः दकलय् बांलाःगु जातःया लिधंसाय् योग्य व लक्षणयुक्त जीवित द्यःकथं श्री कुमारि स्थापना याःगु खः ।
अले रथय् तयाः कुमारिया जात्रा जुइगु जुसेंलि शाक्यवंशया कुलपुत्रपिं मध्ये योग्यम्ह कुलपुत्रयात श्री गणेश व श्री भैरव स्थापना यानाः येँदेया थःने क्वने सालाः जात्रा यायेगु परम्परा न्ह्यात । थ्व जात्रायात येँयाः जात्रा धायेगु यात । लिपा वनाः थ्व जात्रायात ‘ईन्द्रजात्रा’ धकाः धायेगु यानाहल । थौंकन्हय् येँयाः जात्रा धकाः छम्ह निम्ह नेवाःतसें बाहेक मेपिंसं धायेगु त्वःताहल ।
परापूर्वकालनिसें न्ह्याना वयाच्वंगु ऐतिहासिक, सांस्कृतिक, धार्मिक पर्व येँयाः जात्रास रथय् बिराजमान जुया बिज्याइपिं झीसं राष्ट्रिय जीवित द्यःकथं नाला वया च्वनापिं श्री कुमारि, श्री गणेश, श्री भैरव परम्पराकथं आतकया दुने तःक्वःमछि हे हिलेधुंकूगु दु । थथे द्यः जुयाः रथय् बिराजमान जुया बिज्याये धुंकूपिं गुम्ह पूर्व कुमारि, अले खुम्ह पूर्व श्री गणेश व न्हय्म्ह पूर्व श्री भैरवपिं जीवित व स्वस्थ अवस्थाय् दु ।
थथे द्यः भाजुपिं हिलेगु परम्पराकथं वर्तमान जीवित द्यः भाजु श्री गणेश व श्री भैरव ई, परिस्थिति व उमेरया हदया कारणं युवा अवस्थाय थ्यंगु अले तसकं तःधिकः जुल धइगु आपालं जन गुनासो वःगुलिं परम्पराकथं थुगुसी मोहनिबलय् वसपोलपिंत विदा बियाः न्हूपिं श्री गणेश, श्री भैरव प्रतिस्थापन यायेया लागि प्रकृया न्ह्याःगु खः ।
न्हापा न्हापा थथे द्यः भाजुपिं हिलीगु ज्या यायेत आधिकारिक समिति मदुगुलिं पूर्व द्यः जुया बिज्यापिनिगु परिवारपाखें सरोकारवाला बहाः–बहालय् सूचना जारी मजुसे थः दुनेया कुलपुत्रपिं ल्यज्या यानाः पदस्थान यायेगु प्रचलन जुया वयाच्वंगु खः ।
थथे याना द्यःपिं हिलेगु ज्या प्रजातान्त्रिक मजुल, सिन्डिकेट प्रथा थें जुल, मेपिं शाक्य कुलपुत्रपिंत अवसर हे मवल धइगु थेंज्याःगु खँ वयेवं थनिं निदँ न्ह्यः २०७४ साल आश्विन ९ गते सोमवाःकुन्हु गुथि संस्थानय् जीवित द्यः कथं अतिकं हनावयाच्वनाम्ह तत्कालीन श्री कुमारि माजु मतिना शाक्ययात विदा बियाः तृष्णा शाक्ययात कुमारि माजु स्थापना यायेत च्वनागु बैठकं हिला वना च्वंगु ई, परिस्थितियात ध्यानय् तयाः शाक्य महाविहार संघया सहकार्यय् स्वलाया दुने पदस्थापन कार्यनीति निर्माण यानाः छगू आधिकारिक जिम्मेवार निकायया रुपय् समिति गठन यायेगु निर्णय जूगु खः ।
व हे निर्णय कार्यान्वयन यायेगु व नेपाःया मौलिक पहिचानकथं कया च्वनापिं श्री गणेश, श्री भैरवयात ई, परिस्थितिकथं विदा बियाः न्हूपिं द्यःकथं पदस्थापन यायेया लागि वंगु २०७६ साल श्रावण १० गते गुथि संस्थानय् सरोकारवाला समूहया बैठक च्वंगु खः । उगु बैठकय् वर्तमान श्री गणेश, श्री भैरवया अभिभावकपिंसं थुगुसी मोहनिबलय् द्यःपिं महिलेगु अडान कायेवं यक्व वादविवाद लिपा हाकनं मेगु बैठकय् निर्णय यायेगुकथं बैठक स्थगित जुल ।
अथेला दछि न्ह्यःहे द्यः भाजुपिं हिलेगु खँ न्ह्याःगु खः । उगु ईलय् हिलेगु प्रक्रिया न्ह्याकेत ई भचा गाइ मखुला धइगु ल्याखं दछि लिपा थुगुसी मोहनिबलय् हिलेगु खँ क्वःजिउगु खः । येँयाः न्ह्यः श्रावण ४ गते जूगु बैठक लिपा श्री गणेश, श्री भैरवया अभिभावकपिंसं शाक्य महाविहार संघयात जिपिं मानसिक रुपं तयार मजूनि दछि लिपा हिलीगु जूसा जिमित सहमत दु धइगु खँ वल ।
थ्व खँयात बैठकं हे निर्णय यायेगु ल्याखं प्रतिवाद मयाःगु जुल । बैठक थौं जुइ कन्हय् जुइ धाधां येँयाः जात्रा वल । जात्रा नं जुल । उगु ईलय् द्यःपिं तसकं हे तःधिकः जुल, हिसि हे मंत आःला धइगु ब्यापक जन गुनासो व दबाव वयेवं आश्विन ८ गते बुद्धवाःकुन्हु गुथि संस्थानं सरोकारवाला समूहया बैठक सतल, बैठकय् हाकनं थुगुसी नं महिलेगु हे अडान काल ।
थुलि कम इलय् द्यः जुइपिं माले फइमखु धइगु तर्क तल । बैठकं शाक्य महाविहार संघयात द्यः जुइपिं मालाः मोहनि दुने प्रतिस्थापन याये फइला धइगु न्ह्यसः तल । जिमिसं यायेफु, ईलय् हे ज्या सम्पन्न जुइ धया । थ्व हे कथं आश्विन १४ गते मंगलवाः दुने श्री गणेश, श्री भैरव जुइपिं ल्यज्या यानाः सिफारिस पेश यायेत गुथि संस्थानं निर्देशनसहितया पौ बिल ।
छुं जुयाः मोहनि न्ह्यः ल्यज्या पूमवंकल धाःसा मेगु मोहनिबलय् जक हिलेगु सहमति व निर्णय नं जुल । शाक्य महाविहार संघं थःत बिउगु जिम्मेवारी पूवंकेत कर्तब्यनिष्ठ जुयाः तत्काल बैठक च्वनाः सरोकारवाला महाविहारत श्रीघः बहाः, नघः बहाः, असं बहाः, महाबू बहाः, तःधं बहाः, बिकमाः बहाः, स्वःबहाः, यता बहाः, क्वंसा बहाः, क्वहिति बहाः, लगं बहाः, गुभाः बहाः, सिख्वंमू बहाः, मखं बहाः, इतुंंबहाः, जनबहाः यानाः १६ गू विहारया शाक्य कुलपुत्रपिंत आश्विन १२ गते आइतवाः दुने ज्याकुथिइ थ्यनीकथं दरखास्त आव्हान यासे मापदण्डसहितया निवेदन फारम नं नापं छ्वयाबिया । अबलय् तकया दुने च्यागू निवेदन दुहां वल ।
निवेदनय् पूवनेमाःगु मापदण्ड
१. बिशुद्ध शाक्य कुल पुत्रपिं जुइ माःगु ।
२. जुम्ल्याहा बूपिं जुइ मजिउगु ।
३. छुं नं कथंया घाः, खू, दाग मदुपिं अले स्वस्थ जूगु जुइ माःगु ।
४. दीर्घरोग दुपिं जुइ मजिउगु ।
५. योग्य, लक्षणयुक्त व देय्या अवस्थानाप मेल जूगु जातः जुइ माःगु ।
६. मग्याम्ह व फुर्ति दुम्ह जुइ माःगु ।
मापदण्डकथंया निवेदन संकलन जुइवं आश्विन १३ गते छानविन व ल्यज्याया लागि बैठक च्वन । दुहां वःगु निवेदनयात कयाः मापदण्डकथं छगू, छगू दत्तले अध्ययन व छानविन यायेगु ज्या जुल । चार घण्टा तकया अध्ययन व छलफल लिपा मापदण्डकथं उपयुक्त ताःपिं श्री गणेशया लागि छम्ह व श्री भैरवया लागि छम्हेसिया नां ल्ययाः सरोकारवाला श्री कुमारि, श्री गणेश, श्री भैरव प्रतिस्थापन समितियात सिफारिस याना छ्वयेगु निर्णय जुल ।
थुकथं जिमित बिउगु ई दुने हे ल्यज्या यानाः श्री गणेश व श्री भैरवया निंतिं नां, सिफारिस पौ व दुहां वःगु मयअगmभलत फुक्कं निर्णयया लागि प्रतिस्थापन समितिइ छ्वयागु जुल । सिफारिस पौ व दुहां वःगु मयअगmभलत गुथि संस्थानय् थ्यनेवं उकुन्हु हे ४ बजे बैठक सःतल । फुक्क ज्या पूवने धुंकाः नं वर्तमान श्री गणेश व श्री भैरव द्यःया अभिभावकपिंसं हाकनं थगुसी लिकाये फइमखु धइगु अडान काल ।
लिकाये मफइगु ठोस कारण नं क्यने मफुत । तच्वःगु वादविवाद जुल । ४ बजेनिसें च्वंगु बैठक ७ः३० जुलं नं निष्कर्षय् वये मफुसेंलि अन्तिम निर्णयकथं शाक्य महाविहार संघं श्री गणेश व श्री भैरवया लागि यानागु सिफारिस नांया जातः पञ्चाङ्ग निर्णायक समितिइ छ्वयेगु वय्कःपिंसं मिले जू धालकि आः वइगु चैत्रया १७ गते द्यःपिं हिलेगु निर्णय यासे बैठक क्वचाःगु जुल ।
सिफारिस जूपिं श्री गणेश व श्री भैरवया नां व मयअगmभलत फाइल पञ्चाङ्ग निर्णायक समितिइ थ्यनाच्वंगु दु । निर्णय मवःनि ।
(च्वमि शाक्य महाविहार संघया महासचिव खः)
LEAVE YOUR COMMENTS