ज्यापु समाजय् त्यःछिंत्यः हन

यल- यःमरि पुन्हि व ज्यापु दिवसया लसताय् ज्यापु समाज यलं त्यःछिंत्यः ज्याझ्वः याःगु दु । उर्जा, जलस्रोत तथा सिँचाइ मन्त्री पम्फा भुसालं त्वाःदेवाय् मत च्याकाः उलेज्या यानादीगु ज्याझ्वलय् यलया परम्परागत थीथी ज्यापु त्वालं किब्व लःल्हायेगु ज्या जूगु खः ।

दयँदसं ४० गु त्वाःलय् साँस्कृतिक बाजंसहित त्यःछिंत्यः फ्वं वनेगु परम्परा कोभिड– १९ या हुनि दिउगुलिं ज्यापु समाजया अडिटोरियम हलय् त्यःछिंत्यः ज्याझ्वः जुया वयाच्वंगु खः । थुगुसी नं यलया परम्परागत थीथी त्वालय् म्हयाहःगु जाकी, ध्यबा व यःमरिसहितया किब्व त्वाःपाखें लःल्हायेगु व ज्यापु समाजया पुलापिं नायःपिं नापं थीथी जातीय खलःपुचः पाखें प्याखं हुलाः हुलाः लःल्हाना कायेगु ज्याझ्वः तसकं न्ह्याइपुसे च्वंक जूगु खः।

समाजया नायः तीर्थलाल महर्जनया सभापतित्वय् जूगु ज्याझ्वलय् झायादीपिं पाहांपिंत ख्येँ सगं बियाः हनेज्या नंं याःगु खः । ज्याझ्वलय् उर्जा, जलस्रोत तथा सिँचाइ मन्त्री पम्फा भुसाल, भूमि व्यवस्था, सहकारी तथा गरिबी निवारण मन्त्री शशी श्रेष्ठ, श्रम, रोजगार तथा सामाजिक सुरक्षा मन्त्री कृष्णकुमार श्रेष्ठ यल महानगरपालिकाया मेयर चिरिबाबु महर्जनलिसें प्रदेश सांसद, सुरक्षा निकायया प्रमुखपिं पाहाँ कथं झायादीगु खः ।

त्यंछिंत्यः ज्याझ्वःया झ्वलय् साँस्कृतिक ज्याझ्वः नं न्ह्यब्वःगु खः । ज्याझ्वलय् नेवाः म्येँ न्यंकेगु, हुलाप्याखं न्ह्यब्वयेगु ज्या जूगु खः ।

सम्बन्धित बुखँ

LEAVE YOUR COMMENTS