क्यानाडाया संसदय् कुमारि व लाखे प्याखं

येँ(नेपालभाषा टाइम्स)÷क्यानाडाय् च्वनाच्वंपिं नेपाःमितय्सं अनया संसद भवनय् विक्रम संवत् २०८० न्हूदँ थीथी ज्याझ्वः यासें हंगु दु । क्यानाडाय् च्वनाच्वंपिं नेपाःमितय्सं राजधानी ओट्टावास्थित संसद भवन दुने हे थुकथं थीथी ज्याझ्वः यानाः न्हूदँ हंगु क्यानाडा व नेपाःमि समुदायया इतिहासय् थ्व न्हापांखुसी खः ।

क्यानाडाया संसद भवनय् हे थुकथं विक्रम संवत् २०८०या न्हूदँ हनेगु ज्याझ्वः डफरीन–क्यालेडन क्षेत्रया सांसद माननीय कायल सीबाकं ग्वसाः ग्वःगु खःसा उकिया संयोजक फेडेरेसन अफ क्यानाडा नेपाल चेम्बर अफ कमर्सं याःगु खः ।

नेपाःया व क्यानाडाया राष्ट्रिय गान हायेकाः शुरु याःगु ज्याझ्वःया उलेज्या क्यानाडाया निंतिं नेपाःया राजदूत भृगु ढुंगाना, संसदय् विपक्षी दल कन्जरभेटिभ पार्टीया नेता पियरे पोलिएभं मंकाःकथं त्वाःदेवाय् मत च्याकाः यानादीगु खः ।

फेडेरेसन अफ क्यानाडा नेपाल चेम्बर अफ कमर्सया नायः विजय पौडेलं लसकुस यानादिसें नेपालय् क्यानाडाया राजदूतावास चायेकेत इनाप यानादिल । ज्याझ्वः ग्वसाः ग्वयादीम्ह सांसद सीबाकं सकसितं लसकुस याये खंगुलिं थः तसकं लय्ताःगु खँ कनादिसें वि.सं. २०८०या भिंतुना नं बियादीगु खः । लिसें वय्कलं आवंलिं दँय्दसं अप्रिल १४ तारिखकुन्हु संसदय् ‘नेपाल दिवस’ हनेगु नं जानकारी बियादीगु खः ।

मूपाहां राजदूत ढुंगानां नेपाःया विकास व विपद्या इलय् क्यानाडा सरकारपाखें जूगु ग्वाहालि यात कयाः च्वछायादिसें निगू देय्या सम्बन्ध तसकं सौहार्दपूर्ण जूगु खँ कनादिल ।

क्यानेडेली संसदय् विपक्षी दलया नेता पोलिएभं नेपाःमि समुदायया न्हापांगु प्रतिनिधिमूलक ज्याझ्वलय् लसकुस याये खंगुलिं लसता प्वंकादिसें आः संघीय संसदय् नं नेपाःमि समुदायया न्हापांम्ह प्रतिनिधियात लसकुस यायेत थः हथाय् चायाच्वनागु दु धयादिल ।

नेपाःया प्रधानमन्त्री पुष्पकमल दाहालया भिंतुना सन्देश नं प्रशारण याःगु ज्याझ्वलय् क्यानाडाया प्रधानमन्त्री जस्टीन ट्रुडो, ओन्टारियोया मुख्यमन्त्री डग फोर्ड लगायत राज्यया थीथी विशिष्ट व्यक्तिपिंसं ज्याझ्वःया सफलताया कामना यासे छ्वया हःगु भिंतुना सन्देश नं ब्वनाः न्यंकूगु खः ।

ज्याझ्वलय् टोरन्टोया निंतिं मानार्थ नेपाली वाणिज्य दूत डा. कुन्जर शर्मा, क्यानाडा सरकारया आवास, विविधता व समावेशीता मन्त्री अहमद हुसेन, सांसद ड्यान माइस, एनआरएनए आइसीसीया सचिव चिरञ्जीवी घिमिरे, एनआरएनए क्यानाडाया अध्यक्ष दीपक गौतम, नेप्लिज क्यानेडियन हेरिटेज सेन्टर एण्ड टेम्पल ओट्टावाया महासचिव दीपक श्रेष्ठ लगायतं भिंतुना न्वचुलिसें नेपाः व क्यानाडाया थीथी पक्षयात कयाः नुगःखँ तयादीगु खः ।

क्यानेडियन विपक्षी दलय उपनेता सांसद टिम उप्पल, सांसदपिं जसराज हल्लन, फिलिप लोरेन्स, सोनिया सिधु, चन्द्रा आर्य लगायत आपालं विशिष्ट व्यक्तित्वपिनिगु उपस्थिति दुगु ज्याझ्वलय् क्यानेडियन नेवाः गुथिपाखें लाखे, कुमारि प्याखं लिसे धिमे बाजंया प्रस्तुति बिउगु खः । अथे हे टोरन्टोस्थित हिमालय भाइब्स, ओट्टावाया रोधि ब्लूज थेंज्याःगु सांगीतिक पुचलं) नं थीथी नेपाल लोकधुनलिसें हुलाप्याखं न्ह्यब्वःगु खः ।