येँ मनपाया न्हापांगु बैठक प्रत्यक्ष प्रशारण

येँ (नेपालभाषा टाइम्स)- येँ महानगरपालिकाया न्हापांगु बोर्ड बैठक लाइभ प्रशारण जूगु दु । येँ मनपाया मेयर बालेन शाहं शपथ ग्रहण क्वचायेवं थःगु पदभार ग्रहण यासे नगरपालिकाया बैठक लाइभ यायेगु धकाः न्हापांगु निर्णयय् हस्ताक्षर यानादीगु खः । वयां लिपा न्ह्याःगु बैठकयात थीथी सञ्चार माध्यमतय्त अनलाइन याके बीगु अनुमति बियाः शुरु याःगु खः । मनपाया बैठक लाइभ शुरु जूगु थ्वहे न्हापांखुसी खः ।

बैठक न्ह्यायेवं सकलें वडा अध्यक्षपिनि म्हसीका तयेगु ज्या जूगु खःसा वयां लिपा मेयर साहं थःगु खुगू प्राथमिकता प्रस्तुत यानादीगु खः ।
निघौ स्वयां ताः ई न्ह्याःगु बैठकं सर्वसाधारण जनताया गुनासो न्यनेगु लागिं न्हय्न्हुया दुने कल सेन्टर चायेकेगु निर्णय याःगु दु । अथे हे सार्वजनिक शौचालय प्रयोग याके बीगु सवालय् येँय् च्वंगु रेष्टुरेन्ट पेट्रोल पम्पलिसे सहकार्य याना वनेगु निर्णय नं याःगु दु । उकिया लागिं उपिंलिसे वार्ता यायेगु सहमति जूगु दु ।

अथे हे येँय् तच्वयाच्वंगु फोहोरया समस्या समाधान याना वनेगु लागिं छगू कार्यदल दयेकेगु निर्णय नं बैठकं याःगु दु । कार्यदलय् एमाले व कांग्रेसया प्रतिनिधि मिले यानाः च्वने माली धकाः प्रमुख प्रशासकीय अधिकृत लोकनाथ पौड्यालं प्रस्ताव तयेवं वडा अध्यक्षतय्सं ‘थन पार्टीगत खँ छाय् हयागु ?’ धकाः बैठकय् सः तःगु खः । मनपा दुने पार्टीगत खँ ल्हाये मते धासें पौड्यालयात थम्हं तःगु प्रस्ताव लित कायेके बिउगु खः ।

अथे हे बैठकं न्हय्न्हुया दुने हे निगः ‘इन्फ्राइन्स्ट्रक्चर एम्बुलेन्स’ तयार यानाः चले यायेगु निर्णय नं याःगु दु । थ्व एम्बुलेन्सं येँय् गनं नं लँ, धलः, पेटी आदि छुं स्यनाच्वंगु खबर वल धाःसा अन तुरुन्त टोली हे ब्वाँय् वनाः मर्मत यायेगु ज्या याइ ।

थ्वहे झ्वलय् बैठकय् न्ववासें १५ वडाया वडाध्यक्ष ईश्वरमान डंगोलं येँय् फोहोरया समस्या समाधान मजूतले थम्हं बैठकय् वयागु भत्ता मकायेगु धकाः घोषणा यानादीगु खः । फोहोरया समस्या समाधान जुल कि जक बैठक भत्ता कायेगु धासें वय्कलं थःगु खाताय् बैठकया ध्यबा तये मते धकाः नं इनाप यानादिल ।

म्हिगः सुझाव बीगु झ्वलय् थीथी वडाया वडाध्यक्षपिसं नगरपालिकां वडायात बजेट बीगु झ्वलय् कन्जुस्याइँ यायेमजिउगु, सार्वजनिक शौचालय निःशुल्क यायेमाःगु, सार्वजनिक जग्गाया सुरक्षा यायेमाःगु सुझाव बिउगु खः ।

सम्बन्धित बुखँ

LEAVE YOUR COMMENTS