लानिपुखुली झिंस्वंगू खुसिया लः तये हइगु

येँ – तःभुखाचं स्यंगु लानिपुखूया पुनर्निर्माण ज्या निवाः दुने क्वचाइगु खँ पुनर्निर्माण प्राधिकरणया विज्ञ राजुमान मानन्धरं कनादीगु दु। ‘नेपालभाषा टाइम्स’ लिसे खँ ल्हासें वय्कलं वंगु असोज ३ गते हे पुनर्निर्माण क्वचायेकाः उलेज्या यायेगु ताः तःगु खःसां छुं भचा ज्या ल्यं दनिगुलिं निवाः थप याःगु जानकारी बियादिल ।

लानिपुखुली लः जायेकेत सुन्दरीजलं लः छ्वया हःगु खः । सुन्दरीजलं २ करोड लिटर लः हःगु खःसा वा वःगु १ करोड लिटर तयेवं पुखू जाःगु खः । लानिपुखुली डीप बोरिङया लः तल धकाः स्थानीय मनूतपाखें विरोध वयेवं सुन्दरीजलया लः हयाः पुखू जायेकेगु ज्या जूगु खः । बोरिङया लः तत्काल ब्याकअप कथं जक तयागु खःसा भविष्यय् पुखू सुना वन धाःसा तिंख्यलय् च्वंगु बोरिङया लः तये फइगु सम्भावना दुगु खँ मानन्धरं कनादिल ।

लानिपुखूया दथुइ च्वंगु देगः नं दने सिधयेधुंकूगु दु। आः उकिया गजुली लुं सीगु ज्या नं छन्हु निन्हुं न्ह्याइ । गजुली लुं सीत ३८ तोला लुँ मालीगु जुयाः उकिया लागिं सुरक्षा व्यवस्था समेत मिले यायेमाःगु खँ नं वय्कलं कनादिल । देगः दनेगु ज्या क्वचायेवं अन च्वनीम्ह द्यःयात विधिपूर्वक न्यासः पुजा यानाः देगलय् प्रतिष्ठापन याइ ।

लानिपुखू आः वइगु स्वन्तिनिसें खुल्ला यायेगु ताः तयातःगु दु । लानिपुखू पुनर्निर्माण समितिया छ्यांज्ये रोशनकाजी तुलाधरं नं थःपिनि ज्या क्वचायेधुंकूगु जानकारी बियादिल । थःपिनिगु जिम्मेवारी पुखुली लः थाकेगु कथं पुनर्निर्माण यायेगु जक जूगुलिं आः थ्व ज्या क्वचायेधुंकूगु कारणं ल्याःचाः जक ल्यं दनि धयादिल ।

लानिपुखू निर्माण यानादीम्ह प्रताप मल्लं थ्व पुखुली नेपाः व भारतया ५५ गू तिर्थं लः हयाः जायेकूगु खँ इतिहासय् च्वयातःगु दु। आः नं अन थथे हे थीथी तिर्थया लः हयाः तयेगु ग्वसाः दु कि धकाः न्यनागु न्ह्यसलय् तुलाधरं प्राधिकरण दुने थुकिया बारे नं सहलह जूगु खँ कनादिल । आः अन झिंस्वंगू पवित्र खुसिया लः तयेगु बार खँ वयाच्वंगु जानकारी वय्कलं बियादिल ।

वय्कलं धयादी, ‘प्राधिकरण कार्यकारी प्रमुख सुशील ज्ञवालीं जनतां थःगु नं अपनत्व महसूस यायेफइ कथं ज्या जुइमाः धकाः उकिया उलेज्या जूबलय् हे थीथी खुसिया लः हयाः तयेगु जुइ धकाः कनादीगु खः ।’

सम्बन्धित बुखँ

LEAVE YOUR COMMENTS