पश्चिम सेती सुनां दयेकीगु ?

येँ – नेपाल सरकारं थुगुसीया बजेटय् थम्हं हे दयेकेगु धकाः न्ह्यथनातःगु पश्चिम सेती जलविद्युत आयोजना सुनां दयेकेगु धइगु बारे न्ह्यसः दंगु दु । ७५० मेगावाटया उगु आयोजना न्हापा चाइन थ्री गर्जेज इन्टरनेशनल कर्पोरेशन (सीटीजीआई) यात बिउगु खःसा लिपा मतया भाः चित्त बुझे मजुयाः नेपाल सरकार थम्हं हे दयेकेगु धकाः निर्णय याःगु खः ।

तर आः प्रधानमन्त्री केपी ओली चीनया भ्रमणय् वनेगु ई सतिनाच्वंगु इलय् लाक्क लगानी बोर्डं छगू विज्ञप्ति जारी यासें पश्चिम सेती थ्री गर्जेजपाखें लित कयागु मदुनि धकाः स्पष्ट याःगु दु । तर सम्बन्धित विज्ञतय्सं धाःसा लगानी बोर्डया थुुगु विज्ञप्तियात न्ह्यसः थंगु दु ।

सरकारं बजेटय् थम्हं दयेकेगु धकाः न्ह्यथनेगु अले लगानी बोर्डं धाःसा लित कयागु मदु धकाः विज्ञप्ति बीगु धइगु सरकारी निकाय दथुइ हे समन्वय मजूगुया दसि खँ विज्ञतय्सं धापू दु । लगानी बोर्डया अध्यक्ष प्रधानमन्त्री हे जूगुलिं आयोजना थ्री गर्जेजयात हे दयेके बीगु कथं लगानी बोर्डं निर्णय यायेफइगु खँ धाःगु दु ।

नेपाल विद्युत प्राधिकरण व थ्री गर्जेज दथुइ वंगु कार्तिक ३० गते पश्चिम सेती बारे सम्झौता जूगु खः । तर मत न्यायेगु दर (पीपी) चित्त बुझे मजू धासें थ्री गर्जेज लिचिउगु खः । आयोजना दयेकेगु निंतिं थ्री गर्जेजं ६५ प्रतिशत, नेपाल विद्युत प्राधिकरणं २५ प्रतिशत व आयोजन प्रभावित स्थानीय जनतायात १० प्रतिशत शेयर बीगु संरचना तयार याःगु खःसा थ्री गर्जेजयात दइगु ६५ प्रतिशत मध्ये १४ प्रतिशत स्थानीय साझेदारीयात मी फइगु व्यवस्था नं याःगु खः ।

आयोजना दयेकेगु निंतिं १ खर्ब ६० अर्ब तका तुइगु अनुमान यानातःगु खःसा उगु ध्यबा चिनियाँ बैंकं लगानी यायेगु सहमति नं जुयाच्वंगु खः ।