ने. सं. ११४६ दिल्लाथ्व तृतीया -

मतय् भ्याट कायेगु व्यवस्था परिमार्जन जुइगु

येँ (नेपालभाषा टाइम्स) – सरकारं मतय् भ्याट कायेगु व्यवस्थाय् हिउपाः हइगु जूगु दु । थुकिया निंतिं म्हिगः सनिलय् तकं अन्तिम निर्णयया तयारी जुयाच्वंगु खःसा थौं न्हूगु व्यवस्था सार्वजनिक जुइगु खँ धाःगु दु ।

अर्थमन्त्री स्वर्णिम वाग्लें वंगु असार १ गते बजेट न्ह्यब्वयेगु झ्वलय् ५० युनिट स्वयां च्वय् मत वनकि ५ प्रतिशत भ्याट कायेगु घोषणा यानादीगु खः । सरकारया थ्व नीतियात कयाः व्यापाक आलोचना जुयाच्वंगुलिं मतय् भ्याट कायेगु व्यवस्थाय् परिमार्जन यायेत्यंगु खः । आः यायेत्यंगु परिमार्जनय् भ्याट हे चीकीगु खःकि छु याइगु खः धयागु सीमदुनि, तर थनिंनिसें हे लागु जुइकथं निर्णय जुइगु खँ अर्थ मन्त्रालयया अधिकारीतय्सं धाःगु दु । अर्थमन्त्री वाग्लें बजेटय् न्ह्यथनातःकथं भ्याट लागु जुल धाःसा नं थनिंनिसें हे लागु जुइगु खः ।

मतय् भ्याट कायेगु खँय् तःधंगु आलोचना जुइवं अर्थमन्त्री वाग्लें वंगु असार ११ गते हे प्रतिनिधि सभाय् न्ववासें अन्तिम उपभोक्तायात भार मलाइकथं समायोजन यायेगु धयादीगु खः । अर्थमन्त्रीया थ्व हे धापू कथं आः भ्याट व्यवस्थाय् परिमार्जन यायेत्यंगु खँ मन्त्रालयया अधिकारीतय्सं धाःगु दु ।

अर्थमन्त्रालयया प्रवक्ता अमृत लम्सालं अर्थमन्त्रीया धापू कथं भ्याट सहज यायेगु निंतिं आन्तरिक राजश्व विभागं निर्देशिका दयेकेधुंकूगु व थ्व निर्देशिका स्वीकृत जुइवं सार्वजनिक यायेगु जुइ धयादीगु दु । थ्व निर्देशिकाय् छु खँ दुथ्यानाच्वंगु दु धयागु धाःसा जानकारी बियामदी । आन्तरिक राजश्व विभागया छम्ह अधिकारीं नं बिबिसीलिसे खँ ल्हासें मन्त्रालयय् निर्देशिका छ्वये धुनागु व म्हिगः हे निर्देशिका स्वीकृति जुइफुगु खँ धयादीगु दुसां थ्व समाचार तयार यानाच्वनागु इलय् तक धाःसा थुकिया जानकारी सार्वजनिक जूगु मदुनि ।