कलाःया कचकचं लाःगु चिठ्ठा

थ्व संसार हे अजू चायापु । उकिं थन मनूतय् जीवनय् नं अजू अजू चायापुगु घटना जुयाच्वनी । छम्ह मनुखं थम्हं न्यानाकाःगु सामान लितः बिउबलय् उकिं यानाः अर्बपति जूगु दु ।
झ्वाट्ट न्यनेबलय् पत्याः याये थाकु कि लित बिउगु सामानं नं लखपति वा अर्बपति जुइ । थ्व ख्याः खँ मखु न त काल्पनिक हे खः । अमेरिकाया न्यू जर्सी सहरय् च्वंम्ह ५५ दँ दुम्ह तैयब सुमी नांया छम्ह मनुखं ५ डलर पुलाः सन्त्रासिया जूस छगः न्याना यंकूगु जुयाच्वन । जूसया बोटल ज्वनाः छेँय् थ्यनेवं वया कलातं कचकच यायेगु शुरु यात । वया कलाःया धापू थिकेक जूस न्याना हल धइगु खँय् खः । कलाःम्हेसिनं व स्वयां वछि भावं मेगु हे पसलं व हे जूस न्याना हःगु जुयाच्वन । थ्व हे कारणं कलाःम्हं कचकच याःगु खः ।
वयां लिपा कलाःया कचकच न्यने मफयाः सुमीं थम्हं न्यानाहःगु जूस लित तयेत व हे पसलय् वन अले वं अन जूस लित बियाः ध्यबा कयाहल । संयोगबश व हे पसलय् ‘पावरबल ज्याकपट’ अर्थात छगू चिट्ठा नं खुले जुयाच्वंगु जुयाच्वन । कलाःया कचकच हीमी चाःम्ह सुमीं व ध्यबां चिट्ठाया छपाः टिकट न्यानाः छेँय् लिहां वल । ज्याकपट त्याकूम्हेसित ३०६ मिलियन डलर दइगु चिठ्ठाय् न्ह्यथनातःगु खःसां सुमीं थःत हे लाइ धकाः ला विश्वास याःगु ला मखु ।
कन्हय्कुन्हु व हे लँपु जुनाः वनाच्वंम्ह सुमी व हे स्टोरं वनाच्वंगु जुयाच्वन । स्टोर न्ह्यःने थ्यनेवं वं थम्हं न्यानागु चिठ्ठाया लिच्वः स्वयेत अन लिक्कसं च्वंगु मेसिनय् स्क्यान यात । मेसिनं उगु टिकट विक्रेतायात क्यनेत सुचः बिल । वं तायेकल कि मेशीनय् छुं समस्या वःगु दयेमाः । थ्व हे विचाः यानाः सुमी टिकट क्यनेत पसः थुवाःयाथाय् वन ।
जब पसल्यां टिकट जांच यात, अबलय् पसःथुवाः छझाःया निंतिं होस हे तंम्ह थें जुल । छाय्कि चिठ्ठा सुमीयात हे लाःगु जुयाच्वन । सुमीं चिट्ठाय् घोषणा यानातःगु ज्याकपट वापत ३१ करोड ५३ लाख डलर पुरस्कार त्याकूगु खः ।