सीके राउतया स्वास्थ्य स्यन

येँ- तराई लागाय् पृथकतावादी आन्दा–ेलन न्ह्याकाच्वंम्ह मधेसी नेता सीके राउतया अवस्था बारे एशियन ह्युमेन राइट्स कमिशन (एएचआरसी) पाखें चिउताः प्वंकूगु दु । थौंकन्हय् प्रहरीया हिरासतय् लानाच्वंम्ह डा राउतयात तत्काल हे वासः यायेमाःगु खँ न्ह्यथँसें कमिशनं हिरासत दुने राउतया स्वास्थ्ययात कयाः राज्यं वेवास्ता यानाच्वंगु द्वपं नं बिउगु दु । वंगु स्वला न्ह्यः रौतहटया जिल्ला अदालतय् वःम्ह डा. राउतयात प्रहरीं अदालत लागां हे ज्वना यंकूगु खः । उगु इलय् वय्कःलिसे प्यदँ दुम्ह म्ह्याय् नं नापं दुगु खँ नं धाःगु दु ।

कमिशनया रिपोर्टय् धयातः कथं डा. राउतयात नेपाःया राज्य पक्षं धुवांधू ज्वनेगु, मुद्दा तयेगु, कुनेगु ज्या यानाः अनावश्यक यातना बियाच्वंगु खँ नं धाःगु दु । वय्कःयात आः तक समेत यानाः १८ क्वः ज्वनेधुंकूगु खँ नं कमिशनं धाःगु दु । थ्व स्वयां न्ह्यः थीथी जिल्ला अदालत व सर्वोच्च अदालतं समेत डा. राउत विरुद्ध लगे यानातःगु न्यागू मुद्दाय् सफाई बीधुंकूगु खँ न्ह्यथँसें अथे खःसां नं वय्कःयात धाःसा बरोबर ज्वनाः दुःख बियाच्वंगु खँ धाःगु दु ।

नेपाःया संविधान व कानूनं बियातःगु वाक् स्वतन्त्रता, ल्वाभः मज्वँसे शान्तिपूर्ण भेला याये दइगु अधिकार प्रयोग यानाः डा. राउतं थःगु गतिविधि यानाच्वंगु खःसां वय्कःयात उलि नं मयासे मानव अधिकारया विश्वव्यापी घोषणाया समेत उल्लंघन यानाच्वंगु द्वपं नं कमिशनं बिउगु दु ।

नेपाःया थीथी विद्रोही पुचःलिसे वार्ता यायेगु लागिं सरकारं गठन याःगु वार्ता पुचलं डा. सीके राउतलिसे धाःसा वार्ता यायेत अस्वीकार याःगु खँ नं कमिशनं धाःगु दु । डा. राउतयात ज्वनाः कुनातःगु जुयाः वय्कःया कलाः लिसें स्वम्ह मस्तय् जीवन कष्टकर जुयाच्वंगु खँ नं धाःगु दु । थ्व इलय् डा. राउत थः हे नं निगलं किड्नी स्यनाः उकिया ल्वचं ग्रस्त जुयाच्वंगु दु । डाक्टरं वय्कःयात उपचार याकेमाः धकाः प्रेस्क्राइब यायेधुंकलं नं राज्यं धाःसा वास्ता मयाःगु खँ कमिशनं धाःगु दु ।

वंगु जनवरी २ कुन्हु वय्कःयात वासः याकेगु हे ताः तयाः गौर जेलं येँया भद्र जेलय् हःगु खःसां वासः याकेगु ज्याय् धाःसा राज्यं ध्यान मबिउ । बांलाक द्यने मखनाः वय्कःया स्वास्थ्य न्हियान्हिथं स्यना वनाच्वंगुलिं सरकारं मनूया उपचार याये दइगु मानव अधिकार समेत
राज्यं हनन यानाच्वंगु द्वपं नं कमिशनं बिउगु दु ।

सम्बन्धित बुखँ

LEAVE YOUR COMMENTS