ने. सं. ११४३ तछलाथ्व द्वादशी -

राप्रपाय् निर्मल निवास बारे छानबिनया माग

येँ – थःत जुजुवादी पार्टी धकाः स्वघोषणा याना वयाच्वंगु राष्ट्रिय प्रजातन्त्र पार्टी दुने थःपिनि तःमुँज्याय् पुलांम्ह जुजु ज्ञानेन्द्र शाहं याःगु हस्तक्षेपयात कयाः छानबिन यायेमाःगु माग जूगु दु । म्हिगः जूगु पार्टीया न्हापांगु केन्द्रीय बैठकय् न्ववाःपिं छुं दुजःतय्सं थ्व छानबिनया माग याःगु खः । सूत्रतय्सं धाः कथं बैठकय् राजाराम बर्तौला, रीता माझी, केदार कोइराला, विजय खड्का लगायतया केन्द्रीय दुजःतय्सं पार्टीया आन्तरिक मामिलाय् निर्मल निवासं याःगु हस्तक्षेप बारे छानबिन याकेत माग याःगु खः ।

पार्टीया चुनावय् पराजित जुइवं पराजित जूम्ह पुलांम्ह नायः कमल थापां आक्रोशित जुयाः पुलांम्ह जुजु ज्ञानेन्द्र शाह विरुद्ध सामाजिक सञ्जाल मार्फत प्रहार याना हयाच्वंगु दु । पुलांम्ह जुजु ज्ञानेन्द्र शाहयात सार्वजनिक रुपं प्रहार यानादीम्ह कमल थापायात धाःसा म्हिगःया बैठकय् आमन्त्रण तकं मयाःगु खँ सीदुगु दु । उकिं बैठकय् पुलांपिं नायःपिं डा. प्रकाशचन्द्र लोहनी व पशुपति शम्शेर जबरापिं उपस्थित जुयादीगु खःसां थापा धाःसा मथ्यंगु खः ।

न्हू निर्वाचित जुयादीम्ह नायः राजेन्द्र लिङदेनं थापायात बैठकय् हे मसःतूगु कारणं वय्कः मथ्यंगु खँ धाःगु दु । नवनिर्वाचित लिङ्देनं थःगु न्हापांगु अध्यक्षीय सम्बोधनय् कमल थापायात समेत कःघानाः थःपिं न्ह्याः वनेगु धकाः न्ववानादीगु खः । उकिं वय्कलं पार्टी कार्यालयय् थापाया कुर्सीयात तकं गथे खः अथे हे तयाः थः महासचिवया क्वथाय् च्वंच्वनादीगु दु ।