विद्यालय तहया भर्ना छवाःया दुने क्वचायेकेत निर्देशन

येँ (नेपालभाषा टाइम्स) – शिक्षा, विज्ञान तथा प्रविधि मन्त्रालयं विद्यालय तहया भर्ना छवाःया दुने क्वचायेकेत निर्देशन बिउगु दु। शिक्षा मन्त्रालयं तयार याःगु विद्यालय शिक्षा सम्बन्धी आकस्मिक कार्ययोजनाय् विद्यालय भर्ना याये ल्यँ दुपिं व स्थानान्तरित विद्यार्थीयात असोज निगूगु वाया दुने भर्ना जुइमागु खँ न्ह्यथनातःगु दु ।

कार्ययोजना कथं असोज न्हापांगु वालय् शिक्षकपिं कार्यस्थलय् थ्यनेमाःगु, शिक्षकपिसं छेँय् छेँय् वनाः ज्याझ्वः यायेमाःगु व असोज निगूगु वा दुने विद्यार्थीया ल्हातय् सफू थ्यनेमाः । अथे हे निजी व संस्थागत विद्यालयं काइगु शुल्क नं असोज निगूगु वा तक पुनरावलोकन यायेगुमाःगु कार्ययोजना दु। मन्त्रालयं थ्व स्वयां न्ह्यः जारी याःगु विद्यार्थीयात स्यनेत सहजीकरण निर्देशिकाय् विद्यालयं काये दइगु शुल्क प्रचलित कानुनया अधिनय् च्वनाः स्थानीय तहं स्वीकृत जू कथं जुइ धकाः धयातःगु खः ।