वाम गठबन्धनय् फोरमया प्रवेश
एमाले माओवादी केन्द्र दथुया एकता लिहां वये मफइगु प्रक्रियाय् न्ह्याः वनेधुंकल । एमालेया नायः केपी ओलीया नेतृत्वय् न्ह्यानाच्वंगु सरकार वाम गठबन्धनया मखु कि एमाले व माओवादी एकता धुंकाः तःधंगु वाम पार्टीया सरकार जुइ । थ्व सरकार आः हे नं झण्डै दुई तिहाइ सतिक दुगु सरकार खः । तर केपी व पुष्पकमल दाहाल थ्व सरकारयात दुई तिहाइया सरकार दयेकेगु कुतलय् दु । थुकथं दुई तिहाइ दयेकेगु नितिं संघीय समाजवादी फोरमयात नं सरकारय् हयेत थीथी चरणया वार्ता जुयाः सकारात्मक जुयाच्वंगु खँ एमाले व संघीय समाजवादीया नेतातय्सं धया हे च्वंगु दु । संघीय समाजवादीयात सरकारय् यंकीन धकाः मेगु मधेसवादी दल राजपा नं सरकारय् वयेत लालायित जुयाच्वंगु फुकसिनं हे सिउ । सत्तालिप्सा संघीय समाजवादीयाके स्वयां राजपाया नेतातय्के यक्व दु ।
एमाले व माओवादीं वामगठबन्धन जक मखु चुनाव धुंकाः पार्टी एकता हे यायेगु प्रतिवद्धता बियाः प्रतिनिधिसभा व प्रदेश सभाया चुनावय् वंगु खः । चुनावी लिच्वः नं एमाले साधारण बहुमतया लिक्क व माओवादी नं जायेबलय् दुई तिहाइया न्ह्यःने थ्यनी कथं मतादेश जनतां बिल । चुनाव लिच्वः वयाः नं प्रधानमन्त्री शेरबहादुरं प्राविधिक पंगः थनाः न्हूगु सरकार दयेकेत लँपु त्वःता मबिल । थ्व दथुइ पार्टी एकता यानाः वने धाःगु निगू दल एमाले व माओवादी केन्द्रया दथुइ छुं शंका उपशंका नं ब्वलंगु खः । थुकथंया शंका माओवादी केन्द्रया नायः स्वयम् पुष्पकमल दाहालं थीथी सभाय् न्ववात । एमाले नायः केपी ओलीया नेतृत्वय् सरकार दयेकेगु पक्का पक्की खने दयेवं ओलीं संघीय समाजवादी फोरमयात सरकारय् हयेगु कथं वार्ताया शुरुवात यायेवं दाहालयात नं शंका वंगु खः । केपी ओली साधारण बहुमतया जक मखु दुई तिहाइ नेतृत्व यानाः सरकार दयेकेगु योजना कथं संघीय समाजवादीयात नं सरकारय् दुथ्याकेगु कुतः याःगु खः ।
थुगुसीया सरकार मात्र सरकार न्ह्याकेगु योजनाय् जक सीमित मजुसे मुलुकयात धात्थें हिउपाःया अनुभूति लिसें समृद्धि व विकास महसुस जुइगु कथं सरकार न्ह्याकेगु भिजन ज्वनाः केपी प्रधानमन्त्री जूगु खः । उकिं साधारण बहुमत जक मखुकि दुई तिहाइ हे खाकाः बल्लाःगु सरकार दयेकेगु अभियान खः । मुलुकया हितया निंतिं सरकारं छुं निर्णय यायेबलय् अदालत वा छुं संवैधानिक निकाय पंगः जू वल धाःसा उकियात हीकाःसां देय्या पक्षय् निर्णय यायेगु मुडय् नायः व प्रधानमन्त्री ओली खनेदु । थ्व अवस्थाय् संविधान संशोधन यायेमाःसां याये फयेक जक मखु कि संवैधानिक प्रमुखयात महाभियोग तयेमाःसां दुई तिहाइ खाका तयेगु नितिं नं केपी ओलीया सरकारय् संघीय समाजवादी वा राजपा छगू नं दुथ्यानाच्वनेमाःगु खः ।
पुष्पकमलया शंका माओवादीयात लाइनय् हयेत उपेन्द्र यादवया पार्टीयात सरकारय् हयाः साधारण बहुमत सुनिश्चित यायेगु केपी ओलिया योजना जकं खःला ?
संसदय् एमालेनाप संघीय समाजवादी वा राजपा छगू जक दल नापं च्वंवंसा केपी ओलीया सरकारया नितिं बहुमत खाइगुलिं उपेन्द्र यादव नाप केपीं छाय् सतिकाच्वन धइगु शंका ब्वलंगु जुइफु तर राजनीतिक विकास क्रमय् एमालेया नायः व माओवादी केन्द्रया नायः नं सार्वजनिक रुपं हे पार्टी एकता जूगु घोषणा जुइ धुंकाः उपेन्द्रया संघीय फोरमयात सरकारय् हयाः माओवादीयात बाइपास यायेत्यंगु आशंकाया निवारण जुल । एमाले माओवादी नेतृत्वं सरकारयाके दुई तिहाइ खाकेगु नितिं संघीय समाजवादी फोरम वा राजपाया साथ कायेमाः । तर एमाले माओवादी नेतृत्वं राजपा स्वयां संघीय समाजवादी फोरमयात सरकारय् हये फइगु खनाः हे संघीय फोरमनापया वार्तायात सघनता बिउगु खः । संघीय फोरमं माग यानाच्वंगु संविधान संशोधनया मुद्दायात तार्किक निष्कर्षय् थ्यंकेगु खःसा एमाले माओवादी गठबन्धननाप स्वापू क्वातु मजुइकं सम्भव नं मदु । संविधान संशोधन हे याये मफइगु धकाः एमाले माओवादीं धयाच्वंगु नं मदु ।
माओवादी केन्द्र न्हापा हे नं संशोधनप्रति सकारात्मक खः। तर वंगु चुनाव न्ह्यः फोरम व राजपा एमालेयात संशोधन विरोधी क्यनाः मधेसय् एमालेयात काकेगु रणनीतिइ तक्यनाच्वंगुलिं नं एमाले उबलेया संशोधनय् सहमतिइ मवंगु खः । तर फुक्क तहया चुनाव क्वचायेधुंकाः सुया हैसियत छु धइगु स्पष्ट जुल उकिं नं मधेसय् सरकारया नेतृत्व यानाच्वंगु संघीय फोरम प्रदेश नं. २ या सरकारयात सफल याकेगु खःसा संघया केपी ओली सरकारनाप त्वहः जक मालाः सफल जुइगु अवस्था मदु । हानं मधेस प्रदेशय् नापं जानाच्वंगु संघीय फोरम व राजपाया गठबन्धन न्यादँ तक न्ह्याइ धइगु खँय् स्वयम् मधेसया नेतात हे ढुक्क मदु । व अवस्थाय् एमाले माओवादी गठबन्धनया ग्वाहालि मदयेकं फोरमया सरकार मधेस प्रदेशय् म्वानाच्वनेत थाकु । संघीय फोरमयात सरकारय् हयाः सहकार्य यानाः वने फत धाःसा मधेसय् तुलनात्मक रुपय् लिउने लाःगु थःगु हैसियतय् कमब्याक यायेत नं एमालें संघीय फोरमयात संघय् सहकार्य यानाः एमालेया हैसियत मधेसय् थकायेगु लिपा तकया रणनीति म्हितेमाःगु दु ।
थ्व फुक्क रणनीति ताः लाकेत एमाले माओवादी गठबन्धनयात संघय् संघीय फोरमनाप सहकार्य यायेगु व संघीय फोरमयात नं संघया सरकारनाप सम्बन्ध बांलाकाः संशोधनया मुद्दाय् एमालेयात हये फत धकाः जस कयाः मधेसया पावरफुल दल जुयाच्वनेगु दृष्टिकोण संघीय फोरमया रणनीति खः । थुकथंया खेल थुइकाः हे राजपां नं वाम गठबन्धन सरकारय् वयेत राजपाया नेतात गठबन्धननाप वार्ताय् वःगु खः । एमाले माओवादी गठबन्धनयात संघीय फोरम जक मखु राजपा नं सरकारय् वल धाःसा आपत्ति जुइगु खँ हे मखु तर राजपा अझ नं पूर्ण पार्टीया रुपय् विकास मजूनिगु व खुम्ह अध्यक्षत खुथाय् हे स्वइपिं जूगुलिं सरकारय् यक्व सीट बियाः राजपायात लय्तायेकेगु सुविधा प्रधानमन्त्री केपि ओलीयाके मदु । थुगुसी प्रधानमन्त्री ओली उपप्रधानमन्त्री जक मखु कि यक्व मन्त्रीत दयेका मवनेगु स्पष्ट कार्यनीति ज्वनाः सरकार न्ह्याकेगु अभियानय् दुगुलिं राजपा सरकारय् वये धाःसां अन दुनेया आन्तरिक खिचातानीं राजपा तत्काल हे सरकारय् वइ मखु । मेखे संघीय फोरमया यक्व नेता कार्यकर्तात छगू इलय् एमाले माओवादीया हे उत्पादन जूगुलिं एमाले माओवादी गठबन्धनया नेतात संघीय फोरमया नेतातनाप सहकार्य यायेत वेभलेन्थ ज्वःलाके अःपुथें राजपा नाप जुइ मखु । हानं एमाले, माओवादी व संघीय फोरम पार्टी निर्माणया मुहान स्वल धाःसा छगू हे मुहानया लः नं खत ।
LEAVE YOUR COMMENTS