गच्छेदार दोषी खःसा नेपाल छाःसा निर्दोषी?

नेपाःया इतिहासय् हे न्हापांखुसी जुइमाः, अर्बौं तका तूगु जग्गायात कयाः अख्तियार दुरुपयोग अनुसन्धान आयोगं मुद्दा दायर याःगुदु। नेपाःया प्रधानमन्त्री निवास दुने लाःगु सरकारी जग्गा व्यक्तिया नामय् हःगु खँयात कयाः अख्तियार दुरुपयोग अनुसन्धान आयोगं १७५ म्ह व्यक्तिया विरुद्ध मुद्दा दायर याःगुखः ।

ललिता निवास प्रकरणया नामं चर्चित थुगु प्रकरणयात कयाः थीथी कथंया प्रतिक्रिया जनमानसय् ब्वलनाच्वंगु दु। अले राजनीतिक शक्तिया आडय् भूमाफियातय्सं राजनीतिक पहुँचयात छ्यलाः छु तक यायेफु धइगु थ्व छगू नमूना नं खः । नेपालय् दकलय् तःधंगु जग्गा घोटाला काण्ड कथं ललिता निवास काण्डयात कयातःगु दु। लिसें भविष्यय् नं थुलि तःधंगु घोटाला सायद मजुइ धकाः विश्वास यायेगु आधार नं मदुनि । अथे खःसां नं थौं वयाः अख्तियारं गुगु पलाः ल्ह्वन थुकिं छखे अख्तियारया गुणगान यायेगु ज्या जुयाच्वंगु दुसा मेखे अख्तियारं मुद्दा दर्ता यायेगु झ्वलय् नालाकाःगु प्रक्रियां धाःसा अख्तियारयात विवादय् नं साला हःगु दु। अथे खःसां नं अख्तियारं ललिता निवास काण्डयात कयाः अदालतय् मुद्दा दर्ता याःगु दु। अले थुगु मुद्दा दायर यायेगु झ्वलय् अख्तियारं आः तक दकलय् अप्वः मन्त्री जुइधुंकूम्ह नेपाली कांग्रेसया उपसभापति विजयकुमार गच्छेदारयात नं अभियुक्त दयेकातःगु दु ।

कांग्रेसया उपसभापति गच्छेदार २०४७ सालया आन्दोलन लिपा निरन्तर रुपं मन्त्री पदय् च्वनाच्वंम्ह व्यक्ति खः । तर आः वयाः वय्कःयात अभियुक्त दयेकेवं नेपाली कांग्रेसं राजनीतिक प्रतिशोध कथं गच्छेदारयात मुद्दा दायर याःगु धासें निन्हु तक संसद अवरुद्ध यात। तर निन्हु संसद अवरुद्ध यायेधुंकाः कांग्रेसं थःपिंसं यानागु संसद अवरोध गलत जूगु धासें गच्छेदारया मुद्दा स्वय्म गच्छेदारं ल्वायेमाःगु ठहर सहित संसद सञ्चालन याके बीत सहमत जुल । थ्व कांग्रेसं क्यंगु छगू राजनीतिक परिपक्वता खः । कांग्रेसं गच्छेदारयात कयाः संसद अवरुद्ध यायेवं आपालं बुद्धिजीवी लिसें सामान्य मनूतय्सं नं भ्रष्टाचार प्रकरणय् गच्छेदारयात बचे यायेत स्वःगु द्वपं वयेवं कांग्रेस सदन अवरोध यायेगु प्रक्रियां लिचिउगु खः । लिसें पार्टीया केन्द्रीय समितिया बैठकय् नं युवा नेतातय्सं ललिता निवास प्रकरण बारे नेकपाया वरिष्ठ नेता एवं तत्कालीन प्रधानमन्त्री माधव कुमार नेपालयात कारबाही यायेमाः धायेगु व  मेखे गच्छेदारयात बचे यायेमाः धायेगु मिले मजूगु तर्क तसें गच्छेदारयात कयाः पार्टी मखुसें स्वयम् गच्छेदारं उकिया सामना यायेमाःगु व बरु अख्तियारं याःगु निर्णय बारे माःगु पलाः ल्ह्वनेगु निर्णय याःगु दु। निश्चित रुपं कांग्रेसया लिपांगु निर्णय स्वागत योग्य खः । लिसें थ्व छगू राजनीतिक परिपक्वतां जाःगु निर्णय नं धायेमाः ।

मेखे अख्तियारं मुद्दा दायर यायेगु झ्वलय् बालुवाटार प्रकरणय् जग्गा न्यानाकाःम्ह नेपाल कम्युनिष्ट पार्टी (नेकपा) या महासचिव विष्णु पौडेलया काय् नविन पौडेल व सर्वोच्च अदालतया न्यायाधीश कुमार रेग्मीया विरुद्ध मुद्दा दर्ता मयाःगुलिं अख्तियारं डबल स्टान्डर्ड भूमिका म्हितूगु धासें नेपाली कांग्रेसं अख्तियारया ज्यायात कयाः विरोध यायेगु निर्णय याःगु दु ।

यदि विजयकुमार गच्छदार दोषी खःसा तत्कालीन प्रधानमन्त्री माधवकुमार नेपाल नं स्वतः हे दोषी जुइ मालीगु खः । तर नेपालयात धाःसा छाय् उन्मुक्ति धइगु न्ह्यसः ब्वलंगु दु, गुगु स्वाभाविक खः ।

अथे ला ललिता निवास प्रकरणय् मुद्दा दायर यायेगु झ्वलय् अख्तियारं गुगु भूमिका म्हितल उकियात कयाः सर्वसाधारण जनता लिसें आम बुद्धिजीवी वर्गं नं न्ह्यसः तयेगु यानाच्वंगु दु। अख्तियारं पौडेल व रेग्मीयात उन्मुक्ति बीगु झ्वलय् निम्हेस्यां सरकारी जग्गा सरकारयात हे लित बीगु सहमित याःगुलिं मुद्दा मतयागु धकाः तर्क तयेगु यानाच्वंगु दु। थ्वहे खँयात कयाः सामाजिक सञ्जालय् नं आपालं चर्चा परिचर्चा जुयाच्वंगु खः । आपालं सर्वसाधारण मनूतय्सं ‘खुं खुयाकाःगु सामान लिपा वयाः लित बिल धाःसा उकियात कारबाही जुइ कि मजुइ?’ धकाः सरकारयात न्ह्यसः थनाहःगु दु ।

उकिं आम जनतां तकं अख्तियारया निर्णययात अपरिपक्व धायेगु यानाच्वंगु दु। खतुं अख्तियार दुरुपयोग अनुसन्धान आयोगय् थ्व मुद्दा आः जक लाःगु मखु। थ्व स्वयां न्ह्यः अख्तियारया स्वम्ह प्रमुख आयुक्तपिंसं उलि महत्व मबियाच्वंगु खःसा आः वयाः थुगु मुद्दायात कयाः अदालतय् मुद्दा तयेगु ज्या जुइधुंकूगु दु। थुकिं यानाः भ्रष्टाचार जूगु खःसा गुगुं नं इलय् उकिया भागिदार जुइमालीगु छगू नजिर कायम जुइगु खनेदु ।

तर अथे खःसां नं पौडेल व रेग्मीया नामय् वंगु जग्गाया बारे अख्तियारं नालाकाःगु नीतिं धाःसा स्वयम् अख्तियारयात हे अनावश्यक विवादय् साला काःगु दु। पौडेल व न्यायाधीश रेग्मीया नामय् लानाच्वंगु जग्गा सरकारया नामय् हयेगु झ्वलय् माःगु प्रक्रिया तकं पूमवंकू धासें उकियात कयाः थीथी न्ह्यसः ब्वलनाच्वंगु दु। अख्तियारं मुद्दा दर्ता याःगु निन्हु लिपा हे शुक्रवाः कुन्हु न्ह्याथे यानाः नं पौडेल व रेग्मीया नामय् दुगु जग्गा सरकारया नामय् हयेत थुकथं छाय् हथाय् चाल धइगु न्ह्यसः नं थन ब्वलनाच्वंगु दु। ललिता निवास प्रकरणयात कयाः अख्तियारपाखें गुगु मुद्दा दर्ता यायेगु ज्या जुल थ्व छगू च्वछायेबहःगु पलाः खः । तर मुद्दा दर्ता यायेधुनेवं अख्तियार थः हे विवादया घेराय् लाइकथं गुगु निर्णय जुल थ्व धाःसा आम जनतां पचे याये फयाच्वंगु मदुनि । थुकिं यानाः अख्तियारं बांलाःगु हे ज्या याःगु खःसां नं धाथें थ्व मुद्दायात स्वतन्त्र रुपं अनुसन्धान याये मफुगु धइगु नं प्रष्ट जूगु दु ।

उकथं हे ललिता निवासयात जग्गायात व्यक्तिया नामय् हयेगु निर्णय विजय गच्छेदारं जक मखु तत्कालीन प्रधानमन्त्री माधवकुमार नेपालया मन्त्रिपरिषदं याःगु खः । मन्त्रिपरिषदं याइगु छुं नं निर्णयया मुक्कं जिम्मेदार सम्बन्धित मन्त्री मखुसें प्रधानमन्त्री जुइमाःगु खः । उकिं यदि विजयकुमार गच्छदार दोषी खःसा तत्कालीन प्रधानमन्त्री माधवकुमार नेपाल नं स्वतः हे दोषी जुइ मालीगु खः । तर नेपालयात धाःसा छाय् उन्मुक्ति धइगु न्ह्यसः ब्वलंगु दु, गुगु स्वाभाविक खः ।

संविधान कथं कानून सकसितं बराबर जुइ । तर अख्तियारया निर्णयं धाःसा उकियात ध्यान मबिउगु खःला धइगु न्ह्यसः ब्वलनाच्वंगु दु। अथे ला अख्तियारया थ्व ज्यायात कयाः पुलांम्ह प्रधानमन्त्री बाबुराम भट्टराईं नं आपालं त्रुटि व अपूर्णता दु धासें मन्त्री दोषी जुइगु तर प्रधानमन्त्री धाःसा निर्दोष जुइगु अस्वाभाविक खः धयादीगु दु। थुकिं छुं खँ स्पष्ट याः धाःसा आः वयाः अख्तियारं गुगु पलाः ल्ह्वंगु दु थ्व गनं राजनीतिक प्रतिशोध जक खः धकाः कांग्रेसं बियाच्वंगु द्वपं हे सही साबित जुइगु मखु ला?

सम्बन्धित बुखँ

LEAVE YOUR COMMENTS