प्रधानमन्त्रीया घोषणा अस्पतालतय्सं मन्यं
व्यक्तिगत खाताय् सुचं तयाः प्रधानमन्त्रीं नीतिगत भ्रष्टाचार याःगु द्वपं
येँ (नेपालभाषा टाइम्स) – प्रधानमन्त्री बालेन शाहं शिक्षा व स्वास्थ्यय् तयातःगु समता कर चिकेगु घोषणा याःसां अस्पताल अस्पतालय् समता कर कयाच्वंगु दु । प्रधानमन्त्री शाहं म्हीग थःगु फेसबुकय् छगू पोस्ट यासें समता कर लित कयागु घोषणा याःगु खः । तर म्हिगः नं फुक्क धयाथें निजी अस्पतालया बिल समता कर सहित वःगु खँ अस्पतालय् उपचार याकःवंपिंसं धाःगु दु ।
ह्याम्स, बयोधा लगायतया फुक्क धयाथें अस्पतालय् समता कर कया हे च्वंगु दु । अस्पताल प्रशासनं थःपिंत थुकिया आधिकारिक जानकारी मवःनिगुलिं कर कायेमाःगु खँ धाःगु दु ।
प्रधानमन्त्री शाहं फेसबुकपाखें कर लित कयागु घोषणा याःसां थुकिं कानुनी रुप मकाःनिगु खँ करविज्ञतय्सं धाःगु दु । बजेटय् हे समता कर कायेगु खँ दुथ्याकाः संसदं पारित यानातयेधुंकूगुलिं थ्व कर लित कायेगु निंतिं कानुनी प्रक्रिया न्ह्याकेमाः । संसदं पारित जूसां कर लित कायेगु निंतिं संसदय् हे यंकेम्वाःसां सम्बन्धीत मन्त्रालयं मन्त्रिपरिषद्या बैठकय् यंकाः पारित याकेमाः, अले जक कानुनी रुपं कर लितकाःगु जुइ ।
प्रधानमन्त्री शाह व अर्थमन्त्री स्वर्णिम वाग्ले दथुइ द्वन्द्व जुयाच्वंगु इलय् शाहं थःगु फेसबुकपाखें कर लित कायेगु घोषणा याःगुलिं नं मनूतय्सं थुकियात आधिकारिक खः कि मखु धयागु शंका यानाच्वंगु खनेदु । तर अर्थमन्त्री वाग्लें म्हिगः छगू पत्रिकालिसे खँ ल्हासें थःपिनि सल्लाहं हे कर तयागु व आः नं सल्लाहं हे लित कयागु खँ धासें अर्थमन्त्रालयय् मन्त्रिपरिषद्य् यंकेगु निंतिं प्रस्ताव तयार जुइधुंकूगु खँ धयादीगु दु ।
थ्वहे दथुइ प्रधानमन्त्री शाहं थःगु फेसबुक मार्फत सुचं सार्वजनिक यानाः नैतिक भ्रष्टाचार याःगु द्वपं नं वयेगु सुरु जूगु दु । प्रधानमन्त्री शाहं देय्या महत्वपूर्ण सुचं थःगु व्यक्तिगत खातां सार्वजनिक यानाः ध्यबा कमे यायेत स्वःगु धासें थ्व नैतिक भ्रष्टाचार जूगु खँ पिहां वःगु खः ।
शाहं थः प्रधानमन्त्री जुइधुंकाः सम्पत्ति विवरण बुझे याःबलय् थःगु १ करोड ४६ लाख तका दां सामाजिक सञ्जालमार्फत् जूगु धकाः क्यंगु खः । आः नं प्रधानमन्त्री थःगु व्यक्तिगत आम्दानीया निंतिं थःगु व्यक्तिगत खार्ता सरकारी सुचं सार्वजनिक याःगु धासें भ्रष्टाचारया द्वपं बिउगु खः ।
थौंकन्हय् प्रधानमन्त्री शाहया व्यक्तिगत फेसबुक पेजय् ४३ लाख फलोअर्स दु । प्रधानमन्त्रीया थ्व पोस्टय् २४ घन्टा दुने स्वंगू लाख स्वयां अप्वः रियाक्सन व ४४ हजार स्वयां अप्वः कमेन्ट वःगु दु । फेसबुकं गुलि मनूतय्सं पोस्ट स्वल धयागु ल्याखं ध्यबा बीगु याइ । थ्व ल्याखं थ्व सुचं छगुलिं हजारौं तका दां मोनिटाइज्ड जुइगु खनेदु ।
जेनजी अभियानकर्मी मोनिका निरौलां थथे व्यक्तिगत पेजय् सरकारी सुचं तयाः ध्यबा कमे याःगु धयागु नं भ्रष्टाचारया हे छगू रुप जूगु तर्क तयादिसें थ्व नीतिगत भ्रष्टाचार हे जूगु द्वपं बियादीगु दु । निरौलां धयादी, ‘प्रधानमन्त्री कार्यालयया थःगु हे फेसबुक पेज दु । सरकारी सुचं आधिकारिक सरकारी ज्याकूपाखें पिहां वयेमाः, सुयांगु व्यक्तिगत खातां मखु । व्यक्तिगत खाताय् सुचं तयाः उकियात मोनिटाइज्ड यायेगु धयागु ध्यबा कमे यायेत स्वःगु हे खः धायेमाः ।’
वय्कलं न्ह्यसः तयादीगु दु, ‘सार्वजनिक पदय् च्वनीपिंसं उपहार ला कायेमजिउ धाःसा सार्वजनिक सुचं प्रकाशित यानाः व्यक्तिगत रुपं ध्यबा कमे यायेगु गुलितक ठीक खः ?’
LEAVE YOUR COMMENTS