विद्यालयय् स्थानीय तह वयेवं शिक्षकत त्रसित

येँ- नेपाली शिक्षकतय् मंकाः संगठन नेपाल शिक्षक महासंघया न्हापांगु राष्ट्रिय महाधिवेशनया बन्द सत्रं स्पष्ट कानुनी आधार मदयेकं विद्यालय शिक्षाय् स्थानीय तहं अधिकार छ्यःगु धासें उकिया आलोचना याःगु दु ।स्थानीय तहं दयेकेगु सुरु यानाहःगु शिक्षा सम्बन्धी ऐन, नियम व कार्यविधिइ थःपिनिगु ट्रेड युनियन अधिकारया बेवास्ता याःगु व शिक्षाय् थप अराजकता हयेत स्वःगु द्वपं उमिसं बिउगु दु ।नेपाःया न्हूगु संविधानं विद्यालय शिक्षा संचालनया अधिकार स्थानीय तहयात बिउगु दु । तर शिक्षक संगठनतय्सं संघीय शिक्षा ऐन व प्रोदशिक शिक्षा ऐन जारी मजुइतले न्हापा थें हे अभ्यास व कानुनी आधारय् विद्यालय संचालन यायेमाःगु माग याना वयाच्वंगु दु ।शिक्षाविद् व स्थानीय विकास मन्त्रालयया अधिकारीतय्सं धाःसा संविधान कथं स्थानीय तहया अधिकार कार्यान्वयन जुल धकाः शिक्षकत ग्यायेमाःगु मदु धाःगु दु ।

ख्वपया सुर्यविनायक नगरपालिका, सिन्धुपाल्चोकया सुनकोशी गाउँपालिका लगायतया स्थानीय तहं अनया सामुदायिक विद्यालयया व्यवस्थापन समिति विघटन यानाः वडा अध्यक्षया हे अध्यक्षताय् व्यवस्थापन समिति पुनर्गठन यायेवं शिक्षकत ग्यानाच्वंगु खः । शुक्रवाः निसें येँया भृकुटीमण्डपय् जुयाच्वंगु महासंघया महाधिवेशनया बन्द सत्रय् महासचिव तिलक कुँवरं न्ह्यब्वःगु सांगठनिक प्रतिवेदनय् ‘विद्यालय शिक्षा संचालनया स्पष्ट ऐन कानुनया अभावया कारणं स्थानीय तह मनोमानी ढंगं न्ह्यावनकि शिक्षाय् अराजकता न्यनीगु खतरा दुगु खँ न्ह्यथनातःगु दु ।नेपालया संविधानया धारा ३४ य् श्रमया हक स्थापित यानातःगु व प्रत्येक श्रमिकयात कानुन कथं टे«ड युनियन चायेकेगु, उकी सहभागि जुइगु व सौदाबाजी यायेगु हक बियातःसां स्थानीय तहय् लागू जूगु कार्यविधिं टे«ड युनियन अधिकारया कटौती याःगु खँ प्रतिवेदनय् न्ह्यथनातःगु दु । थौंकन्हय् देन्यंकं छगू लाख ७ हजार ८६० म्ह शिक्षक दरबन्दी दु ।

आः ज्या यानाच्वंपिं शिक्षकतय् पद समायोजन, अनुदान, वृद्धि व विकास संघीय सरकारपाखें हे सुनिश्चित यायेमाःगु, शिक्षकया स्थायीत्व व बढुवा शिक्षक सेवा आयोग मार्फत यायेमाःगु, शिक्षक दरबन्दी, सेवा सर्त व सुविधाया न्यूनतम मापदण्ड संघीय कानुनय् दुथ्याकेमाःगु माग महासंघं याःगु दु । अथेहे स्थानीय तहया शिक्षा समितिइ समन्य व सहकार्य यायेत जिल्ला समन्वय समितिइ शिक्षा शाखाया प्रबन्ध यायेमाःगु माग नं महासंघया दु ।
थौंकन्हय् संघीय मामिला तथा स्थानीय विकास मन्त्रालयं तयार याःगु नमूना कानुनया आधारय् च्वनाः स्थानीय तहं कानुन जारी यानाहःगु खः । शिक्षा मन्त्रालयया प्रवक्ता डा. हरि लम्सालं विधि व प्रक्रिया कथं कानुन दयेकाः स्थानीय तहं विद्यालय शिक्षा संचालन यायेफइगु धासें सकलें जानाः गुणस्तरीय सार्वजनिक शिक्षाय् केन्द्रीत जुइमाःगु खँ धयादिल ।

महासंघया अध्यक्ष केशव निरौलां प्रदेश सरकारं शिक्षाया कानुन दयेकेधुंकाः उगु कानुनीलिसे मल्वाइकथं जक स्थानीय तहं कानुन व कार्यविधि दयेकेमाःगु बिचाः प्वंकादीगु दु । वय्कलं धयादीगु दु ‘जिमिसं स्थानीय तहया अधिकार बारे सिउ, तर शिक्षकतय्त बेवास्ता यानाः छुं नं सरकारं कानुन हयेबलय् कार्यान्वयनय् समस्या जुयाः शैक्षिक अव्यवस्थापन अप्वयेफु धयागु खँ जक सचेत यानागु खः ।’सूर्य विनायक नगरपालिकाया उपप्रमुख जुना बस्नेतं स्थानीय तहयात जनतां विश्वास व संविधानं अधिकार बिउगुलिं हे शिक्षाया अवस्था सुधार यायेत कानुन दयेकाः हे ज्या सुरु यानागु खँ धयादीगु दु ।महासंघया स्वन्हुयंकं न्ह्याइगु महाधिवेशन थौं क्वचायेत्यंगु दु । थौं हे महासंघया न्हूगु नेतृत्व नं ल्यइगु ज्याझ्वः दु ।