ब्वनेकुथियात सम्पदा व बाखं सफू लःल्हात

किपू- किपू नगरपालिकां नगरया थीथी ब्वनेकुथियात सम्पदा व बाखं मुना सफू लःल्हाःगु दु । किपू नगरपालिकाया प्रमुख रमेश महर्जनं किपू नगरया ब्वनेकुथियात पर्य–सम्पदा परियोजना अन्तर्गत उगु सफूत लःल्हाःगु खः ।

नगर प्रमुख महर्जनं मंगल मा.वि.इ जूगु छगू ज्याझ्वःया दथुइ परियोजना अन्तर्गत युएन ह्याबिटाट व लुमन्ति आवासया निंतिं सहयोग समूहं तयार याःगु बाखं मुना सफू लःल्हानादीगु खः ।

नगरपालिकां ब्वनेकुथियात लःल्हाःगु सम्पदा सम्बन्धी सफू किपू नगरपालिकालिसें महालक्ष्मी नगरपालिका, गोदावरी नगरपालिका व चन्द्रागिरि नगरपालिकाया झिगू सम्पदा वस्तीया बारे जानकारीबीगु ल्याखं किपा सहितया बाखं मुनाः तयार यानातःगु खः ।
उगु इलय् पर्य–सम्पदा परियोजनापाखें तयार यानातःगु सम्पदा यात्रा नक्सा (हेरिटेज वाकिङ म्याप) नगर प्रमुखलिसें वडाअध्यक्षपिंत लःल्हाःगु खः ।

ज्याझ्वलय् नवासें किपू नगर प्रमुख महर्जनं लुमन्ति संस्थां समुदाय व सरोकारवालालिसेया सहकार्यय् मूर्त व अमूर्त सम्पदाया अभिलेखीकरण यानाच्वंगु ज्यायात कयाः लसता प्वंकादिसें सुभाय् देछानादिल । लिसें वय्कलं किपूया सम्पदा वस्तीत पांगा, किपू, च्वबहाःया सम्पदा संरक्षण योजनाकथं हे ज्या याना वयाच्वनागु नं जानकारी बियादिल ।

किपा सहितया बाखं मुनाः सफू ब्वनेकुथि व ब्वँमिपिनिगु निंतिं अतिकं महत्वपूर्ण जूगु खँय् बः बियादिसें उगु सफू स्थानीय पाठ्यक्रमया निंतिं नं उपयोगी जुइगु विचाः तयादिल ।

वडा नं. ६या वडाअध्यक्ष न्हुछेबहादुर महर्जनं थःगु वडाय् पर्य–सम्पदा परियोजना अन्तर्गत लुमन्तिपाखें तयार याःगु डिजाइनयात वडा, नगरपालिका व लुमन्तिलिसेया सहकार्यय् मन्दः फल्चा, सतः, बहाः बही आदि निर्माणया ज्या जुयाच्वंगु जानकारी बियादिल ।
युएन ह्याबिटटया सूचना संचार संयोजक सुमन गिरीं परियोजना अन्तर्गत अमूर्त सम्पदाया संरक्षण यायेगु उद्देश्यकथं हे संस्थापाखें उगु बाखं सफू तयार यानाः पिथनागु जानकारी बियादिल ।

ज्याझ्वलय् २ वडाअध्यक्ष रमेशमान डंगोल, ६ वडाअध्यक्ष महर्जन, १० वडाअध्यक्ष अमन महर्जन लगायता कर्मचारी व ब्वनेकुथिया प्रतिनिधितय् उपस्थिति दुगु खः ।