डेलावेयर नेवाः पुचःया यःमरि पुन्हि ज्याझ्वः

येँ(नेपालभाषा टाइम्स)- मध्य एटलान्टिक अमेरिकी राज्य डेलावेयरय् च्वंपिं नेवाःतय्सं नं यःमरि पुन्हि ज्याझ्वः हंगु दु । डेलावेयर भ्याली नेवाः पुचःया ग्वसालय् मिडलटाइउन डेलावेयरय् यःमरि उत्सवया नामं यःमरि पुन्हि ज्याझ्वः याःगु खः ।

पुचःया ग्वसालय् स्वक्वःखुसी जूगु यःमरि उत्सवय् मचांनिसें ज्याथःपिंसं तकं तसकं उत्साहित जुयाः ब्वति काःगु खः । छगू हे परिवारया स्वंगू पुस्तायापिंसं तकं तसकं उत्साहित जुयाः ब्वति काःगु यःमरि उत्सवय् यःमरि दयेकेगु तालिम नं बिउगु खः ।

ज्याझ्वलय् वल्र्ड नेवाः अर्गनाइजेसन (डब्लुएनओ)या पुलांम्ह नायः सिजन श्रेष्ठ, नेवाः संस्कृतिया ज्ञाता वासव राजोपाध्यायलिसें विशिष्ट व्यक्तित्वपिनिगु उपस्थिति दुगु ज्याझ्वलय् स्थानीय ज्येष्ठ नागरिक विश्वराम श्रेष्ठ व चमेली श्रेष्ठयात हनेज्या नं याःगु खः ।

ज्याझ्वलय् उपस्थित सकसितं यःमरि नकेगु नापं नेवाः नसाज्वलंया नं सवाः काये दइगु व्यवस्था यानातःगु खः । अथे हे सांगीतिक ज्याझ्वः नं न्ह्यब्वःगु खः । डेलावेयर उपत्यका व उगु लागां पिनेच्वंपिं थीथी समुदायलिसे स्वापू क्वातुका यंकेगु व नेवाः कला, संस्कृति, परम्परायत जीवन्त याना तयेत थुकथंया ज्याझ्वलं तःधंगु तिबः बीगु डेलावेयर भ्याली नेवाः पुचलं विश्वास याःगु दु ।