ओलीया नाडी छामे यायेत स्वराजया भ्रमण
येँ- म्हिगः सनिलय् नेपाः भ्रमणय् थ्यंकः झाःम्ह भारतीय विदेशमन्त्री सुषमा स्वराजं एमाले अध्यक्ष केपी ओलीयात नापलानादिसें भारत नेपाः नेपाःलिसे सहकार्य यानाः न्ह्याः वनेगु हे भारतीय प्रधानमन्त्री नरेन्द्र मोदीया स्पष्ट सन्देश धकाः धयादिउसां वय्कःया थ्व भ्रमण आः प्रधानमन्त्री जुइत्यंम्ह ओलीया नाडी छामे यायेत हे जूगु खँ परराष्ट्र विज्ञतय्सं धाःगु दु ।
विज्ञतय्सं भारतीय विदेशमन्त्री स्वराजया थ्व भ्रमण ‘अस्वभाविक’ धकाः धया वयाच्वंगु दु । मुख्यतः नेपालय् वाम गठबन्धनया सरकार वइगु पक्का जुइधुंकाः भारतं नेपाःपाखे तसकं ध्यान बियाः स्वयाच्वंगु दु । थ्वयां न्ह्यव ओली प्रधानमन्त्री जूबलय् भारतीय प्रधानमन्त्री मोदीलिसेया स्वापू स्यंगु व ओली थौंकन्हय् अप्वः थें चीनपाखे स्वयाच्वंगुलिं भारतं तसकं चासो तया वयाच्वंगु खः ।
विदेशमन्त्री स्वराजया थ्व भ्रमण ओलीया वर्तमान धारणा छु दु धयागु सिइकेत हे जूगु अनुमान विज्ञतय् दु । अस्वाभाविक रुपं नेपाः वःम्ह विदेशमन्त्री स्वराजं दकलय् न्हापां एमाले नेतायात हे नापलानादीगु खः ।
म्हिगः स्वराजं सोल्टी होटलय् एमाले अध्यक्ष ओलीलिसे याकःयाकः भेटवार्ता नं यानादीगु खः । थ्व भेटवार्ताय् छु खँ जुल धयागु खँ पिहां वःगु मदु । तर स्वराजं थौंकन्हय् नं ओली भारत खनाः तंम्वयाच्वंगु दु ला धयागु सिइकेगु व चीन प्रतिया झुकाव गुकथं दनि धयागु सिइकेगु कुतः याःगु जुइमाः धयागु विज्ञतय् धापु दु ।
वामगठबन्धनया निम्हं नेतात केपी ओली व माओवादी केन्द्रया अध्यक्ष पुष्पकमल दाहाल निम्हं थांैकन्हय् चीनपाखे स्वयाच्वंगुलिं भारत विशेष चिन्तित जुयाच्वंगु दु । न्हापांनिसें भारतया हे पक्षय् दुम्ह ओली प्रधानमन्त्री जूगु इलय् हे भारतं नेपाःयात नाकाबन्दी तःबलय् ओली चीनपाखे स्वःवंगु खः । भारतं आः ओलीयात हाकनं ह्ययेकेगु कुतः यानाच्वंगु दु । उकिं हे स्वराजयात विशेष विमानय् तयाः प्रधानमन्त्री हे मजूनिबलय् ओलीयात नापलाकेत छ्वयाहःगु खः ।
थुलि जक मखु न्हूगु सरकार गठन जुइधुंकाः प्रधानमन्त्री मोदी हे गुलि फु उलि याकनं नेपाः भ्रमणय् वयेफुगु खँ परराष्ट्र ख्यलय् चर्चाय् दु । न्हापा लिपा जूसा नेपालय् न्हूम्ह प्रधानमन्त्री वयेवं भारतया भ्रमणय् वनीगु खः, तर आः भारतीय प्रधानमन्त्री हे नेपाः वयेगु चाहना याःगुलिं नं भारतं वामगठबन्धन सरकारयात तसकं महत्व बियाच्वंगु व थ्व सरकार चीनपाखे स्वइ धयागु खँय् तसकं चिन्तित जुयाच्वंगु क्यं धाःगु दु ।
उकिं हे थ्वयां न्ह्यव ‘एमालें’ तकं हे प्रधानमन्त्री धकाः घोषणा मयाःनिम्ह अध्यक्ष ओलीयात भारतीय प्रधानमन्त्री मोदीं फोन यानाः बधाइ बीगु खः ।
LEAVE YOUR COMMENTS