‘चीनया ल्याबं हे कोरोनाया उत्पत्ति जूगु खः’

येँ – अमेरिकी राष्ट्रपति डोनाल्ड ट्रम्पं चीनया ल्याबं हे कोरोना भाइरस (कोभिड-१९)या उत्पत्ति जूगु दावी यानादीगु दु ।

बिहीवाः ह्वाइट हाउसय् पत्रकारत नाप खँल्हाबंला यानादिसें राष्ट्रपति ट्रम्पं थःम्ह खनागु प्रमाणया आधारय् भाइरस वुहान इन्सटिच्युट अफ भायरोलोजीं शुरु जूगु धकाः थः विश्वस्त जूगु धयादिल । तर वय्कलं अज्याःगु प्रमाण छु खः धइगु बारे धाःसा धयामदी ।

वय्कलं धयादी, ‘जिं प्रमाण स्वयेधुन तर प्रमाण छु खः धकाः जिं धायेफइमखु, जितः उकीया बारे न्ववायेगु अनुमति मदु ।’

चीनया वुहान शहरय् दुगु उगु इन्सटिच्युटं धाःसा अमेरिकी अधिकारीतय्सं यानाच्वंगु दाबीयात पूर्ण रुपं अस्वीकार यानाच्वंगु दु । कोरोना भाइरसया कारणं चीन व अमेरिका दथुइ अप्वयाच्वंगु तनावया दथुइ ट्रम्पया थ्व धापु सार्वजनिक जूगु खः ।

अमेरिकी राष्ट्रपति ट्रम्पं छुं ई न्ह्यःनिसें कोरोना भाइरसया निराशा चीनयात प्वंकेगु यानाच्वंगु दु । भाइरसया कारणं विश्वय् दकलय् अप्व मनूत अमेरिकाय् सीगु दु ।