भारत जःलाखःला देय्या निंतिं खतरा : पाकिस्तानी प्रधानमन्त्री

येँ – पाकिस्तानी प्रधानमन्त्री इमरान खानं जःलाखःला देय्या निंतिं भारत खतरा जुयावनाच्वंगु खँ धयादीगु दु । वय्कलं नेपाः नापं बंगलादेश, चीन व पाकिस्तान थज्याःगु जःलाखःला देय्या निंतिं भारत खतरा जुयावनाच्वंगु धयादीगु खः ।

बुधवाः छगू ट्वीट यानादिसें प्रधानमन्त्री खानं नेपाः व चीननाप सीमा विवाद, बांगलादेशयात नागरिकता कानून व पाकिस्तानयात मखूगु सैन्य अपरेशनया यायेत्यंगु धकाः धम्की बियाः भारतं जःलाखःला देय् नापया स्वापु स्यंकाच्वंगु धयादिल ।

वय्कलं भारतया नरेन्द्र मोदीया सरकारयात जर्मनया हिटरया नाजीतय् विचारधारानाप ज्वःलागु द्ववपं नं बियादिल । वय्कलं धयादिल, ‘हिन्दु अतिवादी मोदी सरकारया अहंकारपूर्ण विस्तारवादी नीति व नाजीतय् विचारधारा समान खनेदु ।’

नेपालं लिम्पियाधुरा, कालापानी व लिपुलेक सीमाया विवाद जुयाच्वंगु दुसा उखे चीन नाप लद्दाख क्षेत्रय् सीमा विवाद जुयाच्वंगु दु ।