भारतीय च्यानलयात बेलायतय् जरिवाना

एजेन्सी – बेलायतया अफिस अफ कम्युनिके शनं भारतया टेलिभिजन च्यानल रिपब्लिक भार तया छगू कार्यक्रमयात कयाः जरिवाना पुइकूगु दु । भारतया तसकं विवादीत पत्रकार अर्नब गोस्वामीया थ्व टेलिभिजन च्यानलया कार्यक्रमं असहिष्णुता व घृणा ब्वलंकीगु ज्या याःगु धासें बेलायतया अफिस अफ कम्युनिकेशनं थ्व न्यूज च्यानलया बेलायतय् ब्रोडकास्ट यायेगु अधिकार कयातःगु कम्पनी वर्ल्डवाइड मिडिया नेटवर्कयात २० हजार पाउण्ड (३६ लाख तका) जरिवाना याःगु खः ।

रिपब्लिक भारत च्यानलय् ६ सेप्टेम्बर २०१९ य् प्रसारण जूगु ‘पुछता है भारत’ धयागु ज्याझ्वःयात कयाः थ्व जरिवाना पुइकूगु खः । लिसें अफिस अफ कम्युनिकेशनं थ्व ज्याझ्वः लिपा हाकनं गुबलें प्रशारण यायेदइमखु धकाः नं आदेश बिउगु दु । थ्व ज्याझ्वः टेलिभिजन च्यानलया थुवाः अर्नब गोस्वामी हे चले याइगु खः । ६ सेप्टेम्बर २०१९ य् प्रशारण जूगु ज्याझ्वःया झ्वलय् अपमानजनक भाय् छ्यःगु, घृणा न्यंकीगु लिसें व्यक्ति, समुदाय, धर्म व जातिया विरुद्ध आपत्तिजनक टिप्पणी याःगु द्वपं बिउगु खः । आदेशय् थ्व ज्याझ्वलय् पाकिस्तान व पाकिस्तानीतय् विरुद्ध आपत्तिजनक टिप्पणी याःगु खँ नं न्ह्यथनातःगु दु ।

भारतया चन्द्रमा मिशन चन्द्रयान-२ यात कयाः चर्चा जूगु ज्याझ्वलय् स्वम्ह भारतीय व स्वम्ह पाकिस्तानीत पाहाँ कथं ब्वनातःगु खः । ज्याझ्वःया इलय् हे पाकिस्तानं भारतय् आतंकवाद न्यंकाच्वंगु द्वपं बिउगु खः । आदेशय् धयातःगु दु, ‘थ्व कार्यक्रम न्ह्यब्वयाच्वंम्ह व ज्याझ्वलय् सहभागी छुं पाहाँतय्सं पाकिस्तानपिं सकलें हे चरमपन्थी जूगु, अनया वैज्ञानिक, डाक्टर, नेता, खेलाडी फुक्क हे चर मपन्थी जूगु, मस्त नं चरमपन्थी हे जूगु धयागु क्यनेगु स्वःगु दु । अथेहे ज्याझ्वलय् सहभागी छम्हेसिनं ला पाकिस्तानया वैज्ञानिकतय्त खुँ तकं धाःगु खः ।’