मांया ख्वाः स्वयेकुन्हु मातातीर्थ वःपिंत सछि तका जरिवाना

येँ –मांया ख्वाः स्वयेकुन्हु मातातीर्थय् जुइगु मेला नं बन्द याःगु दु । चन्द्रागिरि नगरपालिकां मांया ख्वाः स्वयेगु कुन्हु मदयेम्ह धुंकूम्ह मांयात लुमंकाः मातातीर्थ जुइगु श्राद्ध, पिण्ड दान, तर्पण लिसें म्वःल्हुइगु मेला बन्द याःगु खः ।
कोरोना भाइरसया संक्रमण पाखें बचे जुइत सरकारं तयातःगु लकडाउनया कारणं मेला बन्द यायेमाःगु खँ चन्द्रागिरी नगरपालिकाया मेयर घनश्याम गिरीं धयादीगु दु ।

थुगुसी मांया ख्वाः स्वयेगु वइगु बिहिवाः वैशाख ११ गते कुन्हु लाः ।

स्थानीयवासीयात नं थुकुन्हु मातातीर्थय् वनाः हूलमूल मयायेत धयागु खँ मेयर गिरीं कनादीगु दु । लकडाउनयात अवज्ञा यानाः वन धाःसा अन हे सछितका जरिवाना कायेगु खँ नं मेयर गिरीं कनादीगु दु । चन्द्रागिरी नगरपालिकां लकडाउनबलय् पिहां वःपिंके जरिवाना जक कयाः ७० हजार तका मुंकेधुंकूगु दु ।