ने. सं. ११४४ ञलाथ्व दशमी -

आः मनपाया अनुदानय् कडाइ

येँ – येँ महानगरपालिकाया आर्थिक विधेयक म्हिगः पारित जूगु दु । महानगरपालिकाया सकलें दुजःतय् दथुइ निन्हु तक जूगु घनिभूत सहलहपाखें विधेयक पारित जूगु खः । थुकी न्हापा पेश याःगु प्रस्तावय् छुं भचा संशोधन नं जूगु दु । म्हिगः राष्ट्रिय सभागृहय् च्वंगु नगरसभाया बैठकं बजेट पारित याःगु खः ।

बैठकय् महानगरपालिकाय् कर पुलीपिं करदातायात छुं भचा सुविधा बीमाःगु प्रस्ताव वःगु खःसा मेयर बालेन्द्र साहं उकिया लागिं कर विशेषज्ञतलिसे सल्लाह यायेगु खँ कनादीगु खः । आः तयार याःगु बजेटय् महानगर दुने घरबहाल कर, सम्पत्ति कर, विज्ञापन कर, मनोरञ्जन कर, विभाज्य कोष आदि समेत यानाः १७ ताजिया कर कायेगु व्यवस्था यानातःगु दु ।

आः न्हूगु करया दर कथं छेँयागु कर न्हापा स्वयां छुं भचा अप्वः जुइगु खँ धाःगु दु । घरबहाल कर धाःसा दँय् १ लाख आय मजुइपिं व आयया मेगु स्रोत मदुपिं मनूतय्त धाःसा वडाया तजबिजय् कर मिनाहा याये फइगु व्यवस्था याःगु दु । आकिवं मंसिर महिना तक कर पुलीपिंत नं १० प्रतिशत छुट बीगु व्यवस्था याःगु दु ।

येँ देय्या थीथी स्थानीय खलः पुचः लगायत थीथी ज्याखँ याइगु संस्थायात बीगु अनुदानय् धाःसा कडाइ याःगु दु । थ्व स्वयां न्ह्यः येँय् च्वनाः जाति, भाषा लगायत सांस्कृतिक, सामाजिक ज्या याइगु संस्थातय्त कार्यक्रमया आधारय् दां बीगु यानातःगु खःसा आः उकी कडाइ यायेगु व्यवस्था याःगु दु । अज्याःगु ज्याया लागिं मनपां बजेट धाःसा फ्याःगु दु । तर अज्याःगु बजेट कायेगु लागिं आः ताःहाकः प्रक्रियाय् दुहां वने मालीगु अवस्था दुगु खँ धाःगु दु ।