बौद्ध सम्पदा संरक्षणय् ग्वाहालि याःपिंत हना

ख्वप(नेपालभाषा टाइम्स)- थनया जयकीर्ति महाविहार (थथुबही)या बौद्ध सम्पदा संरक्षणय् ग्वाहालि यानादीपिंत वंगु शनिवाः छगू ज्याझ्वःया दथुइ हनेज्या याःगु दु । मैत्रेय युवा संघ व थथुबही सम्पदा संरक्षण समितिया मंकाः ग्वसालय् ख्वप लागाया छगू जक मौलिक स्रम्पदाया रुपय् दयाच्वंगु थथुबहीया बौद्ध सम्पदा संरक्षण यायेगु ल्याखं बहीया चाकःछिं फः दयेकेगु ज्याय् थीथी कथं ग्वाहालि यानादीपिंत हनेज्या याःगु खः ।

संघया नायः लक्ष्मीचन्द्र वज्राचार्यया सभापतित्वय् जूगु ज्याझ्वलय् ख्वप नगरपालिकाया उपप्रमुख रजनी जोशी मूपाहांकथं झायादीगु खः । मुनि विहारया अर्जुन भन्तेपाखें पंचशील प्रदान यासें न्ह्याःगु ज्याझ्वलय् फः दयेके ज्याया संयोजक तीर्थराज वज्राचार्यं लसकुस यानादीगु खः । मूपाहां उपप्रमुख जोशीं थथुबहीया हक कामय यायेगु नापं बौद्ध सम्पदा व संस्कृतिया संरक्षण यायेगु ज्याय् ख्वप नगरपालिका प्रतिवद्ध दुगु खँ कनादिल ।

समितिया दुजः संचित बुद्धाचार्यं फः दयेकेगु ज्याया आय ब्यय न्ह्यब्वयादीगु ज्याझ्वलय् नरेश वज्राचार्यं थथुबहीया म्हसीका बियादीगु खः । ज्याझ्वलय् थथुबही सम्पदा संरक्षण समितिया सल्लाहकारपिं प्रा. सिद्धिरत्न शाक्य, सप्तचन्द्र वज्राचार्य, श्रीमहामञ्जुश्री गुथि संस्थाया सचिव पद्मसुन्दर शाक्य व इतिहासविद् प्राध्यापक डा.पुरुषोत्तम लोचन श्रेष्ठपिंसं बहीया सम्पदा बहीया नामय् मदुगु खँय् दुःख प्वंकुसे ख्वपया बौद्ध संस्कृति व सम्पदाया संरक्षण यायेमाःगु खँय् बः बियादिल ।

उगु ज्याझ्वलय् बहीया छचाःखेरं फः दयेकेत थीथीकथं ग्वाहालि यानादीपिं श्रद्धालु दातापिंत मूपाहांपाखें हनापौ लःल्हासे हनेज्या याःगु खः । संयोजक वज्राचार्यं पाहांपिं सकसित लुमन्ति चिंकथं तारा द्यः लःल्हनादीगु खःसा संघया नायः वज्राचार्यं मूपाहां जोशीयात भैलःखःया प्रतीक लुमन्ति चिंकथं लःल्हानादीगु खः । समितिया दुजः देवचन्द्र वज्राचार्यं सुभाय् देछानादीगु खः ।