ने. सं. ११४६ बछलागा तृतीया -

‘बजारय् खाद्यान्न अभाव मदु’

येँ -कोरोना भाइरसया हल्लां यानाः स्वनिगलय् खाद्यान्न भण्डारण याइपिं अप्वया वःसां व्यवसायीतय्सं धाःसा बजारय् खाद्यान्न अभाव मदुगु खँ धाःगु दु । खाद्यान्न भण्डारण शुरु जुइवं आपूर्ति मन्त्रालयं व्यवसायीतय्त सःताः न्यनेकेन समेत याःगु खःसा अन व्यवसायीतय्सं प्यला न्यालायात गाक्क सामान दुगुलिं चिन्ता कायेमाःगु आवश्यक मदु धकाः जानकारी याःगु खः ।

नेपाल खुद्रा व्यापार संघया पुलांम्ह नायः पवित्र वज्राचार्यं ‘नेपालभाषा टाइम्स’ यात कनादीकथं शुक्रवाः च्वंगु आपूर्ति मन्त्रालयया बैठकय् व्यापारीतय्सं सामान स्टक दुगु जानकारी बिउगु खः । बैठकय् नेपाल आयल निगमं नं ग्यासया स्टक दुगु कारणं अभाव मजुइगु खँ धाःगु खः ।

वज्राचार्यं गुलिखे सञ्चार माध्यमं हे गलत कथं समाचार सम्प्रेषण याःगु कारणं बजारय् खाद्यान्नया अभाव जूवंगु खःसां थ्व कृत्रिम अभाव जक जूगु धासें व्यापारीतय्सं छुं नं सामान सुचुकेगु ज्या मयाःगु खँ नं कनादिल ।

उपभोक्तातय्सं ग्यानाः हे सामान मुंकाच्वंगु कारणं नं थ्व अभाव जुयाच्वंगु खः । न्हापा लछिया छगू दर्जन हे स्यानेटाइजर मी म्वाःगु पसलं नं आः न्हिं सछिगू स्यानेटाइजर मी मालाच्वंगु दु, अज्याःगु पसलं थःथाय् स्यानेटाइजर मंत धायेवं बजारय् अभाव जुल धकाः हल्ला न्यना वनेगु ज्या नं जुयाच्वंगु दु ।

भाइरसया संक्रमण लिपा खुद्रा पसलय् ग्याँसंनिसें चिनी, चि व जाकि तकं स्टक तयेत सर्वसाधारण लगे जुयाच्वंगु दु । वज्राचार्यं मिडियाया कारणं नं सर्वसाधारण जनता अप्वः पीडित जुइ मालाच्वंगु बिचाः तयादी । धयादी, ‘मिडियां सुं छम्ह व्यापारीतय्के ग्वःन्हुया निंतिं सामान दु धकाः न्यनी । व्यापारीं न्हय्न्हुया निंतिं स्टक दु धायेवं मिडियां उकियात हे हाइलाइट यानाः समाचार दयेका बी । छम्ह व्यापारीयाके न्हय्न्हुया निंतिं स्टक दु धइगुया अर्थ फुकसिकें न्हय्न्हुया लागिं जक सामान स्टक दुगु जुइ मखु । जनतायात थुकिं त्रास ब्वलंकाच्वंगु दु ।’

थ्वहे झ्वलय् नेपाल आयल निगमं बजारय् ग्यासया अभाव मजुइगु खँ धाःगु दु । सर्वसाधारण जनतां धाःसा आः हे थःत माःगु स्वयां अप्वः ग्यास भण्डारण यानाच्वंगु खँ व्यापारीतय्सं धाःगु दु ।

उकथं हे बजारय् चिनीया अभाव नं शुरु जूगु दु । बजारय् चिनी न्याये मदुगुलिं मनूत साल्ट ट्रेडिङय् वनाः माक्व स्वयां अप्वः चिनी न्याः वनाच्वंगु सीदुगु दु । उकथं हे थःगु उपभोक्तातय्सं चि तकं माक्व स्वयां अप्वः स्टकय् तयेगु यानाच्वंगु नं लूगु दु ।

हल्लाया लिउने मवनेत इनाप

सरकारं कोरोना भाइरस (कोभिड-१९) या सम्बन्धय् न्यनाच्वंगु हल्ला व प्रचारबाजीया लिउने ब्वाँय् मवनेत इनाप याःगु दु । शनिवाः छगू विज्ञप्ति जारी यासें गृह मन्त्रालयं कोरोना भाइरस बारे स्वास्थ्य तथा जनसंख्या मन्त्रालयं बिया वयाच्वंगु सुचंयात ध्यान बीत नं इनाप याःगु खः ।

मन्त्रालयया सहप्रवक्ता केदारनाथ शर्मां म्हिगः छगू विज्ञप्ति जारी यासें अनावश्यक भ्रमय् च्वनाः उपभोग्य वस्तु न्यायेत व भण्डारण यायेत हथाय् मचायेत इनाप याःगु खः । उकथं हे विज्ञप्तिइ गुगुं नं थासय् हाकुबन्जाः, मुल्यवृद्धि व कृत्रिम अभाव जुल धाःसा तत्काल सम्बन्धित निकायय् खबर यायेत नं इनाप यानातःगु दु ।