ने. सं. ११४४ कछलागा षष्ठी -

विश्व कृषक अन्वेषण मेलाय् नेपाःया किसानत पाखें प्रस्तुति

येँ- वंगु फेब्रुअरी १० व ११ निन्हु यंकं प्रोलिन्नोभा व ए ग्रोइङ्ग कल्चरया ग्वसालय् विश्व कृषक अन्वेषण मेला जुल । मेलाय् नेपाः, भारत, दक्षिणअफ्रिका, बुरकिनो फासो, सेनेगल, क्यामरुन, केन्या, घाना, जिम्बावे, नेदरल्यान्ड्स व जर्मनीयापिं किसान व विज्ञपिंसं ब्वति काःगु खः । मेलाय् किसानपिंसं यानागु अन्वेषणया बारे कनादीगु खः ।

भर्चुअल माध्यम जूम पाखें जूगु ज्याझ्वलय् किसानतय्सं याःगु अन्वेषण व वय्कःपिंसं न्ववानादीगु भाय् हिलाः न्यनेगु निंतिं सहजकर्ताया व्यवस्था यानाः अंग्रेजी व फ्रेन्च भासं न्यनेफइगु व्यवस्था याःगु खः ।

ज्याझ्वःया न्हापांगु न्हि कुन्हु नेपाःपाखें चितवनया तुलसी ज्ञवालीं थःगु छेँया फोहर व्यवस्थापन यानाः दयेकागु साः व कसिक्यबय् ह्वयेकागु तरकारि, सि व स्वांया बारे खनादीगु खः । अथेहे येँया शेषनारायण महर्जनं कःसि क्यबयात माःगु याउँगु चा दयेकेगु तरिका व कःसियागु लः रसे मजुइक सुरक्षित यायेगु तरिका कनादीगु खः ।

कन्हय्कुन्हुया ज्याझ्वलय् नेपाःपाखें चितवनया हे चन्द्र प्रसाद अधिकारीं थःगु अन्वेषण विश्वविद्यालययापिं विद्यार्थी व प्राध्यापकपिंत कनागु, विद्यार्थीतय्त साः दयेकेगु विधि स्यनागु व वय्कःयागु फार्मय् विद्यार्थीत वयाः स्यनेकने याःवइगु खँ कनादीगु खः ।

नेपाःया किसानपिंसं कनादीगु कनेगु निंतिं सहजीकरण प्रा. डा. धर्मराज डंगोल, सुमन शेखर मानन्धर व शरद राईपिंसं यानादीगु खः । अथेहे डा. प्रतापकुमार श्रेष्ठं छगू सत्रया कार्यक्रम नं संचालन यानादीगु खः ।