मरुसतः दयेकेत मनपां ५० लाख लःल्हात

येँ – येँ मनपाया मेयर विद्यासुन्दर शाक्यं थौंकन्हय् जनस्तरं दनेगु धकाः तयारी जुयाच्वंगु मरुसतः स्वदँया दुने दयेकेगु धकाः ताः तयातःगु खःसां उकियात स्वदँ मखु निदँया दुने हे दयेकाः क्यनेत इनाप यानादीगु दु । यदि मरुसतः इलय् दने मफुत धाःसा जनस्तरपाखें छुं हे ज्या याये मफइगु जुयाच्वन धइगु पुष्टि जुइ धासें वय्कलं ईयात ध्यान बीत नं इनाप यानादिल ।

मरुसतः दयेकेत जनस्तरपाखें नीस्वंगु काष्ठमण्डप पुनर्निर्माण समितियात म्हिगः ग्वाहालि कथं बिउगु ५० लाख तकाया चेक हस्तान्तरण यासें वय्कलं थ्व खँ कनादीगु खः । उगु हे इलय् मेयर शाक्य व पुनर्निर्माण समितिया अध्यक्ष लिसें ३ नं. प्रदेशया सांसद राजेश शाक्य दथुइ मरुसतः दयेकेगु ज्याय् ग्वाहालि यायेगु सम्बन्धी सम्झौताय् हस्ताक्षर यायेगु ज्या नं जूगु खः ।

उगु चेक लःल्हानाः कासें समितिया नायः लिसें सांसद राजेश शाक्यं मनपां बिउगु थ्व दांया खर्च पूर्ण रुपं पारदर्शी जुइ व मरुसतः नं इलय् हे दयेके सिधइ धयादिल । ज्याझ्वलय् समिति संरक्षण पुचःया जःपिं वाङ्मय शताब्दी पुरुष सत्यमोहन जोशी, जनकवि दुर्गालाल श्रेष्ठ, पुरातत्व विद् प्रा.डा. सुदर्शनराज तिवारी, मनपाया कार्यकारी अधिकारी लिसें आपालं विज्ञतय् उपस्थिति दुगु खः ।

ज्याझ्वलय् न्ववासें मनपाया हनुमानध्वाखा विकास कार्यक्रमया उदयमान पसखलं मनपाया ग्वाहालि लिपा आः मरुसतः निर्माणया ज्या तीव्र गतिं न्ह्याइगु खँ कनादिल । सम्झौताय् मरुसतःयात माःगु सिँ टिम्बर कर्पोरेशनपाखें हे न्यायेमाः धइगु खँ दुथ्यानाच्वंगु दु ।