ने. सं. ११४४ कछलागा षष्ठी -

पुलांम्ह अख्तियार प्रमुखया काय ठगी धन्दाय्

येँ- अख्तियार दुरुपयोग अनुसन्धान आयोगया पुलांम्ह प्रमुख आयुक्त दीप बस्न्यातया काययात प्रहरीं म्यानपावर ठगी मामिलाय मालाच्वंगु खँ सीदुगु दु । बस्न्यातया काय कमल बस्न्यातं संचालन यानाच्वंगु याक्खा ओभरसिज पाखें वैदेशिक रोजगारय् वने चाहे जूपिं ल्याय्म्हतय्त ठगे याःगु खँ महानगरीय अपराध अनुसन्धान महाशाखाया प्रमुख एसएसपी धिरजप्रताप सिंहं धयादीगु दु ।

प्रहरीं बुधवाः हे महाराजगञ्जय् च्वंगु ओभरसिजय् छापा मारे याःगु खःसां कमल बस्न्यातयात धाःसा ज्वनेमफुत । उगु इलय् कमलया मेम्ह पार्टनर भीमबहादुर रोक्कायात धाःसा ज्वंगु खः । छापा मारे याःगु इलय् उगु ओभरसिजपाखें प्रहरीं मलेसियाय् वनीपिं खुसः व छम्हेसिया पासपोर्ट नं बरामद याःगु खः ।

स्वम्हेसिया लगानी दुगु थ्व म्यानपावरया सञ्चालकपिं मध्ये प्रमुख आयुक्तया काय कमल व मेम्ह सञ्चालक अमित रोक्का बिसिउँ वनाच्वंगु खँ धाःगु दु । प्रहरीं ज्वंम्ह रोक्कायात जिल्ला अदालतं झिन्हुया निंतिं थुनाय् तयाः अनुसन्धान यायेत म्याद बियाहयेधुंकूगु दु ।

कमल बस्न्यातं मेमेगु वैदेशिक रोजगार कम्पनीं नं चायेकातःगु खँ सीदुगु दु । उकी मध्ये याक्खा ओभरसिजय् बस्न्यातया दकलय् अप्वः लगानी दुगु खँ प्रहरीं धाःगु दु । मलेसियाय् वनीपिं ल्याय्म्हतय्सं थःपिंत १ लाख ३० हजार ध्यबा कयाः झिद्वःया जक रसिद बीगु यानाच्वंगु खँ प्रहरीयात धाःगु दु । २०७२ जेठ २६ गते राज्यमन्त्रीस्तरीय बैठकं न्हय्गू खाडी देशय् वनीपिंके झिद्वलं अप्वः शुल्क कायेमदुगु निर्णय याःगु खः ।