अमेरिकी चुनावय् नेवाः भोट गुखे ?

येँ (नेपालभाषा टाइम्स) – अमेरिकाय् म्हीग क्वचाःगु चुनावय् मतदाता जुयाच्वंपिं ‘अमेरिकी नेवाः’ तय्गु भोट गन कुतुं वन ? नेपाः लगायत विश्वया थीथी देशय् च्वनाच्वंपिं नेवाःतय्गु लागिं थ्व छगू रोचक न्ह्यसः जुयाच्वंगु दु ।

मतदानय् थःगु भोट कुर्का वयेवं हलिं नेवाः दबू (वर्ल्ड नेवाः अर्गनाइजेशन) या नायः सिजन श्रेष्ठं फेसबुकय् पोष्ट हे यानादिल- का सा पासापिं, जिं ला जो बाइडेनयात भोट कुर्का वया न्हिं !

भाजु श्रेष्ठं थें हे अमेरिकाय् च्वनाच्वंपिं अधिकांश नेवाःतय्सं डेमोक्रेटिक उम्मेदवार जो बाइडेनयात हे भोट बिउगु अनुमान दु । नेवाः जक मखु अमेरिकाय् च्वनाच्वंपिं अधिकांश एशियालीमूलया मतदातातय्गु मत हे डेमोक्रेटिक उम्मेदवार बाइडेनयात वंगु अनुमान नं जुयाच्वंगु दु । पिनेया विश्वं वयाः अमेरिकाय् बसोवास यानाच्वंपिं नागरिक प्रति डेमोक्रेट्तय्गु रवैया नरम जू । रिपब्लिकन उम्मेदवार डोनाल्ड ट्रम्पं पिनें वयाच्वंपिंत थःगु देशय् तयेगु मखु धासें उमिगु बारे अनुदार नीति ज्वंगु कारणं वय्कःयात पिने देशं वयाच्वंपिं नागरिकतय्सं ययेकेगु मयाः ।

छगू अनुमान कथं पिने देशं वयाः च्वनाच्वंपिं ८० प्रतिशत आप्रवासीतय्सं डेमोक्रेटिक उम्मेदवार बाइडे नयात भोट बिउगु दयेमाः । अथे खःसां थ्व चुनावय् आः तक वःगु लिच्वः कथं ट्रम्पया अवस्था नं उलि कमजोर जुयाच्वंगु मदुनि ।