आखः ब्वनाच्वंथाय् गोलीं कयेका हल

येँ – कलंकीइ पुलांम्ह उपसचिवया छेँय् गोलीं कयेका हःगु दु । पिनें कयेका हःगु उगु गोली छेँय् दुहां वयाः म्ह्याय्म्ह आखः ब्वनाच्वंगु क्वथाय् लाःगु खः । तर उकिं म्ह्याय्म्हेसित मलाःगुलिं छुं घटना धाःसा मजुल । अथेसां गोली सुनां व छाय् कयेका हल धइगु न्ह्यसः धाःसा ब्वलंगु दु ।
म्हीग बहनी कलंकीमाइ देगःस्थित सामाजिक मार्गय् च्वंगु पुलांम्ह उपसचिव बिष्णुप्रसाद शर्माया छेँय् अथे गोलीं कयेका हःगु खः ।

उगु क्वथां गोली समेत बरामद जूगु खँ प्रहरीं धाःगु दु । गोलीं कयेकूगु द्वपनय् जःलाखःला पुलांम्ह इञ्जिनीयर शुभांकर खनालयात प्रहरीं ज्वंगु दु । खनालयात महानगरीय अपराध अनुसन्धान महाशाखां टेकुइ हयाः बयान कयाच्वंगु खँ धाःगु दु । प्रहरीं न्यनेकने यायेगु निंतिं खनालयात यंकूगु खः ।

प्रहरीं खनालपाखें निपु बन्दूक व ५० राउन्ड गोली नं बरामद याःगु दु । खनालयाके थ्व बन्दूकया लाइसेन्स दुगु खँ नं प्रहरीं धाःगु दु । प्रारम्भिक अनुसन्धान कथं दुर्घटनावश गोली चले जूगु खनेदु । अथे खःसां अन बरामद जूगु गोली खनालया बन्दूकं हे पिहां वःगु खः वा मखु धइगु खँ धाःसा वैज्ञानिक जाँच लिपा जक सीदइगु खँ प्रहरीं धाःगु दु ।