अन्नपूर्ण पदमार्गय् कोरोनाया प्रभाव

येँ – विश्वन्यंकं न्यना वनाच्वंगु कोरोना भाइरसया कारणं अन्नपूर्ण पदमार्ग नं सुनसान जुयाच्वंगु दु । लमजुङया सदरमुकाम बेंसीसहर निसें सुरु जुइगु अन्नपूर्ण पदमार्ग कास्कीया पोखरा थ्यनेवं क्वचाइगु खः । न्हापा न्हापाया दँय् विदेशी पर्यटकतय् हुल जुइगु थ्व इलय् आः धाःसा पर्यटकत हे खने मदयाच्वंगु दु ।

लमजुङ बेंशीशहर जुयाः खुदीभुलभुले, बाहुनडाँडा, जगतच्याम्चे, जगत जुयाः पर्यटनत मनाङ थ्यंकःवनीगु क्रम पूवंक हे ठप्प जुयाच्वंगु दु ।
पर्यटनया हे भरय् दुपिं पर्यटन व्यवसायी व होटल व्यवसायीत पर्यटक मवःगुलिं निराश जुयाच्वंगु दु । पर्यटन व्यवसायी विनोद गुरुङया कथं थगुने थ्व इलय् होटलया क्वथा मगानाः टेन्टय् पर्यटकतय्त तयेमाःगु खः, थुगुसी फुक्क हे खाली जुयाच्वंगु दु ।

थज्याःगु हे समस्या मेमेगु फुक्क धयाथें होटलथुवाःतय् दु । गुबलें हिमपात व गुबलें महामारी ल्वचं यानाः पदमार्गय् वइपिं पर्यटकत न्हियान्हिथं म्हो जुया वनाच्वंगु खँ होटल व्यवसायी मिङमर लामां कनादिल । वय्कःया कथं निन्हु स्वन्हु न्ह्य छम्ह निम्ह छम्ह निम्ह पर्यटक खनेदुगु खःसां आः धाःसा पूवंक हे सुनसान जुयाच्वंगु दु ।

वय्कलं धयादिल, ‘पर्यटक वये न्ह्यः हे ल्वय् पुनीला धयागु ग्याःचिकु जुयाच्वंगु दु ।’ जिल्ला प्रशासन कार्यालय मनाङं विदेशी पर्यटकत लिसे सचेत जुयाः च्वनेत व कोरोना भाइरसया बारे सतर्क जुइत इनाप याःगु दु । अथेहे अन्नपूर्ण संरक्षण क्षेत्र मनाङं नं पर्यटक क्षेत्रय् वइपिं विदेशी पर्यटकतलिसे सचेत जुइत नं इनाप याःगु दु ।

सम्बन्धित बुखँ

LEAVE YOUR COMMENTS