किपुली पिसिआर ल्याब स्थापना

किपू – किपुली नं कोरोना भाइरसया परीक्षण यायेगु निंतिं पिसिआर ल्याब स्थापना जूगु दु । मंगलवाः छगू ज्याझ्वःया दथुइ किपु नगरपालिकाया मेयर रमेश महर्जनं पिसिआर परीक्षण कक्षया उलेज्या यानादीगु खः ।

नेपाल सरकार स्वास्थ्य मन्त्रालयया ग्वाहालिं त्रिभुवन विश्वविद्यालय बायोटकया सहकार्यय् किपु नगरपालिकां थुगु ल्याब स्थापना याःगु खः । ल्या त्रिवि परिसरय् च्वंगु त्रिवि लायन्स रक्त सञ्चार केन्द्रय् स्थापना याःगु खः ।

ज्याझ्वलय् न्ववासें मेयर महर्जनं किपू नगरया जनतायात प्राथमिकताय् तयाः थ्व ल्याब स्थापना यानागु खँ धयादिल । ‘नेपाल सरकारया ग्वाहालिं नीस्वनागु थ्व ल्याबय् नेपाःन्यंकंया जक मखु विदेशीतय्गु स्वाबया नं परीक्षण जुइ, तर प्राथमिकता किपु नगरपालिकाया जनतायात जुइ’ वय्कलं धयादीगु दु ।

किपू नगरपालिकाया जनताया स्वाब परीक्षण यायेगु निंतिं छन्हु निन्हु हे स्वाब संकलन ज्या नं न्ह्याइगु खँ वय्कलं धयादीगु दु । ‘नगरपालिकाया स्वास्थ्य विभागपाखें छन्हु निन्हु लिपा हे स्वाब संकलन ज्या जुइ । थथे स्वाब संकलन यायेबलय् विशेषतः ज्याथ जिथिपिं, ल्वगिपिंत प्राथमिकता बियाः स्वाब संकलन यायेगु जुइ’ वय्कलं धयादीगु दु ।

वय्कःया कथं आः थ्व ल्याबय् नमूना परीक्षण यानाः छन्हु निन्हुं हे स्वास्थ्य विभागपाखें प्रमाणित याकेगु ज्या जुइ । थ्व धुंकाः सर्वसाधारणया स्वाब परीक्षण ज्या न्ह्याइ । थ्व ल्याबय् छन्हुया म्होतिं नं निसःगू स्वाब परीक्षण जुइगु खँ वय्कलं धयादीगु दु ।