‘आवासया अधिकार सुनिश्चित मजूगु परिवारयात नं समान दृष्टि तयेमाः’

येँ (नेपालभाषा टाइम्स) – येँ महानगरपालिकाया कार्यवाहक प्रमुख सुनिता डंगोलं आवासया अधिकार सुनिश्चित मजूगु परिवारयात समान दृष्टि तयेमाःगु खँ धयादीगु दु । छगू हे इलय्, छगू हे संयन्त्र, छगू हे प्रक्रिया व व्यवस्थापाखें ‘भूमिहीन दलित’, ‘भूमिहीन सुकुम्बासी’ ‘अव्यवस्थित बसोबासी’ व ‘स्वबासी’या आवास सम्बन्धी अधिकार बीमाःगु खँय् नं वय्कलं बः बियादीगु दु ।

कार्यवाहक प्रमुख डंगोलं उगु खँ येँ महानगरपालिका व भूमि समस्या समाधान समितिया पदाधिकारीतय् दथुइ जूगु निगूगु बैठकय् धयादीगु खः । बैठकय् नवासें कार्यवाहक प्रमुख डंगोलं अवस्था न्ह्याःगु हे जूसां आवासया अधिकार सुनिश्चित मजूपिंत दक्वं परिवारयात समान दृष्टि तयेमाःगु व सुयातं विभेद याये फइमखु धयादिल ।
स

मितिया अध्यक्षलिसे दुजःपिं, अव्यवस्थित बसोबासया चाप अप्वः दुगु महानगरपालिकाया वडाया वडाअध्यक्ष सहितया बैडकय् वय्कलं धयादिल, ‘आः जग्गाय् अधिकार बीत्यंगु खः कि आवासया अधिकार सुनिश्चित यायेत स्वःगु खः, थ्व खँय् स्पष्ट जुइमाः ।’

‘गुम्हेसिया छुं मदु, वयात छेँ दनेत गाक्क जग्गा, जमिन बीवं समस्या ज्यनी ला ?’ थ्व संवेदनशील न्ह्यसः खः धासें कार्यवाहक प्रमुख डंगोलं धयादिल, ‘यदि थ्व समस्याया लिपा थ्यंकंया निंतिं समाधान मालेगु खःसा जमिन प्राप्त जुइधुंकाः इमिगु जीवनस्तर छु गथे जुइ ? थ्व खँय् नं विचाः यायेमाः ।’

ज्या नं मदु, कमे यायेगु वा आयया स्रोत मदुसा अज्याःगु परिवारयात जग्गा बीवं वं गथे यानाः छेँ दनी, न्हिथंया जीवन गुकथं न्ह्याकी थ्व खँय् नं विचाः यायेमाःगु वय्कःया धापू दु ।

छलफलय् समितिया अध्यक्ष बलभद्र बास्तोलालिसें दुजःपिं, येँ महानगरपालिकाया प्रमुख प्रशासकीय अधिकृत, वडाअध्यक्षपिं प्रेम थापा, आशामान संगत, रामकुमार केसी, हिरालाल तण्डुकार, सुमन श्रेष्ठ, ईश्वरमान डंगोल, रोजिना श्रेष्ठ, ख्यामराज तिवारी, कुश ढकाल, सरोज ढकाल, नवराज पराजुलीया सहभागिता दुगु खः ।