राजेन्द्र श्रेष्ठ नायः जूगु न्हूगु जसपायात दलया मान्यता
येँ (नेपालभाषा टाइम्स)÷जनता समाजवादी पार्टी (जसपा) नेपाल विभा–जन जुयाः बने जूगु अशोक राई व राजेन्द्र श्रेष्ठ नेतृत्वया ‘जनता समाजवादी पार्टी’ यात निर्वाचन आयोगं मान्यता बिउगु दु । उपेन्द्र यादवया जसपा नेपाल विभाजन जुयाः राईया नेतृत्वय् न्हूगु दल दर्ता जूगु खः । न्हूगु जसपां म्हीग निर्वाचन आयोगय् दल दर्ताया निंतिं निवेदन बिउगु खः ।
उगु निवेदनयात कयाः म्हिगः आयोगं राजनीतिक दल सम्बन्धी ऐन व नियमावलीया आधारय् जनता समा–जवादी पार्टी दर्ता यानाः अभिलेखीकरण यायेगु निर्णय याःगु खँ आयोगया सूचना अधिकारी सुमन घिमिरें कनादीगु दु ।
आयोगय् लाःगु निवेदन कथं राज–नीतिक दल सम्बन्धी ऐन, २०७३ या दफा ३३ व राजनीतिक दल सम्बन्धी नियमा–वली, २०७४ या नियम ५ कथं जनता समाजवादी पार्टीया अभिलेखिकरण यायेगु निर्णय आयोगं याःगु खः ।
थ्वहे झ्वलय् जनता समाजवादी पार्टी नेपालया अध्यक्ष उपेन्द्र यादवं संसदया अधिवेशन आह्वान जुइधुंकूगु व दल विभाजन सम्बन्धी अध्यादेश खारेज जुइधुंकूगुलिं थःगु दल विभाजन जुइ मफइगु दाबी यानादीगु दु । यादवं म्हिगः स्वदेश लिहां वयेवं थःगु पक्षया नेतातय्गु बैठक सःतादीगु खः । २०७८ भदौ २ गते तत्कालीन सरकारं हःगु दल सम्बन्धी अध्यादेशय् २० प्रतिशत सांसदया समर्थनय् दल विभाजन जुइफइगु व्यवस्था यानातःगु खः । उगु व्यवस्था कथं एमाले विभाजन जुयाः नेकपा (एस) नीस्वंगु खः । आः उगु अध्यादेश खारेज जुइधुंकूगुलिं थःगु दल विभाजन जुइ मफइगु दावी यादवं याःगु खः ।
उपेन्द्र यादव वर्तमान गठबन्धनयात त्वाःथलाः कांग्रेस सहितया मेगु गठबन्धन दयेकाः पिहां वनेगु तयारी यानाच्वंगुलिं वर्तमान गठबन्धनयात बचे यायेगु लागिं जसपा–नेपाल विभाजन यायेमाःगु दावी न्हूगु जसपाया नेतातय्सं याःगु दु । न्हूगु जसपाया अध्यक्ष राजेन्द्र श्रेष्ठं उपेन्द्र यादवयाके संघवाद व समाजवादया वैचारिक विचलन वःगु कारणं थःपिं अलग्ग च्वनेमाःगु खँ कनादीगु दु ।
LEAVE YOUR COMMENTS