फिफा विश्वकप-२०२६ : फाइनल कासा सुनां म्हितकी ?
एजेन्सी – फिफा विश्वकप २०२६ लिपांगु चरणय् थ्यनेधुंकूगु दु । आः लाक्कं निगू हे जक कासा ल्यं दनि । कन्हय् आइतवाः चान्हय् स्वंगूगु थाय्या निंतिं फ्रान्स व इंग्ल्याण्ड दथुइ कासा जुइ । थ्व कासा लिपा सोमवाः चान्हय् साविकया विजेता अर्जेन्टिना व पूर्व विजेता स्पेन दथुइ विश्वकप उपाधिया निंतिं फाइनल कासा जुइ ।
फाइनल सुनां त्याकी धइगु खँय् गुलि कौतुहलता व उत्सुकता दयाच्वनी, अथे हे फाइनल कासा संचालन याइम्ह वा म्हितकीम्ह रेफ्री सु जुइ धइगु खँय् नं कासा ह्यमितय् दथुइ चर्चा जुइगु याः । अथे खःसा अर्जेन्टिना व स्पेन दथुइ जुइगु फाइनल सुनां म्हितकी ले सा ?
विश्व फुटबलया सर्वोच्च निकाय फिफां अर्जेन्टिना व स्पेन दथुइ जुइगु फाइनल कासाया निंतिं रेफ्री क्वःछीधुंकूगु दु । फिफा विश्वकप २०२६ या फाइनल कासा म्हितकीगु जूगु दु स्लोभेनियाया रेफ्री स्लाभ्को भिन्चिचं । अमेरिकाया न्यूयोर्कय् च्वंगु न्यू जर्सी रंगशालाय् जुइगु फाइनल कासा मुुख्य रेफ्रीया जिम्मेवारी स्लोभेनियाया भिन्चिचयात बियागु फिफां न्ह्यथंगु दु ।
फिफाया प्रमुख रेफ्री अधिकृतलिसें फिफा रेफ्री कमिटीया अध्यक्ष पियरलुइगी कोलिनां फाइनल कासा संचालनया निंतिं स्लोभेनियाया ४६ दँ दुम्ह भिन्चिचयात मुख्य रेफ्रीया जिम्मेवारी बियागु धाःगु दु । न्यू जर्सीया मेटलाइफ स्टेडियमय् जुइगु फाइनलय् भिन्चिचयात स्लोभेनियाया हे टोमाज क्लान्चनिक व आन्द्राज कोभाचिचं एसिस्टेन्ट रेफ्रीया रुपय् ग्वाहालि याइगु जूगु दुसा जोर्डनया अधम मखादमेहयात प्यम्हम्ह रेफ्री (फोर्थ अफिसियल)या रुपय् नियुक्त याःगु दु ।
फाइनल म्हितकीम्ह रेफ्री भिन्चिच युरोपया हे दकलय् अनुभवी रेफ्रीमध्ये छम्ह खः । भिन्चिचया नियुक्तिलिसें विश्वकप फाइनल कासा म्हितकीम्ह २३ म्हम्ह व स्लोभेनियाया न्हापांम्ह रेफ्री नं जुइगु जूगु दु ।
युरोपेली लिसें अन्तर्राष्ट्रिय फुटबलया आपालं महत्वपूर्ण कासा म्हितकेधुंकूगु अनुभव भिन्चिचयाके दु । भिन्चिचं सन् २०२० या युरो कप, २०२२ या युरोपा कप लिग अन्तर्गत फाइनल कासा नं म्हितकेधुंकूगु दु । अथे हे युरोपया हे छगू प्रतिष्ठित कासा युइएफए च्याम्पियन्स लिगया फाइनल नं म्हितेधुंकूगु दु ।
बोरुसिया डर्टमुन्ड व रियल म्याड्रिड दथुइ जूगु युरोपियन च्याम्पियन्स लिगया फाइनल म्हितकूम्ह भिन्चिचं सन् २०२४ य् फ्रान्स व स्पेन दथुइ जूगु युरो कपया सेमीफाइनल नं म्हितकूगु खः ।
सन् २०२२ य् कतारय् जूगु विश्वकपय् निगू कासा म्हितकूम्ह भिन्चिचं जारी विश्वकपय् ब्राजिल व मोरक्को अथे हे जोर्डन व अल्जेरिया दथुइ जूगु समूह चरणया कासा नं म्हितकूगु खःसा राउण्ड अफ ३२ य् मेक्सिको व इक्वेडरया कासा नं म्हितकेधुंकूगु दु ।
थगुने जक अमेरिकाय् हे जूगु फिफा क्लब विश्वकप २०२५ या कासा नं म्हितकूम्ह भिन्चिचया थ्व निक्वःगु फिफा विश्वकप कासा खः ।
LEAVE YOUR COMMENTS