ख्वपया सांस्कृतिक पर्यटन प्रवद्र्धनया निंतिं सहलह
ख्वप (नेपालभाषा टाइम्स) – ख्वप नगरपालिकां ख्वपया सांस्कृतिक पर्यटन उद्योगया विकासया निंतिं सरोकारवाला थीथी निकायलिसे सहलह, राय सुझाव संकलन याःगु दु । सहलहपाखें सांस्कृतिक नगरी ख्वपया आर्थिक, सामाजिक, सांस्कृतिक विकासय् छगू आधारया रुपय् दुगु सांस्कृतिक पर्यटन उद्योग प्रवद्र्धनया निंतिं अल्पकालीन व दीर्घकालीन योजना निर्माण याइगु जूगु दु । उकिया निंतिं इतिहास व सांस्कृतिक ख्यःया विज्ञ व सरोकारवाला थीथी निकाय, पुचःया प्रतिनिधित्व जुइकथं सम्भाव्यता अध्ययन समिति गठन यायेत ख्वप नगरपालिकायात इनाप यायेगु बैठकं निर्णय याःगु दु ।
सहलह ज्याझ्वलय् ख्वप नगरपालिकाया प्रमुख सुनिल प्रजापतिं मूर्त व अमूर्त सम्पदां जाःगु ख्वपया देय्या सम्पदा संरक्षण, संवद्र्धन व पर्यटन प्रवद्र्धनयात प्राथमिकतातय् तयाः नगरपालिकां ज्या याना वयाच्वंगु खँ कनादिल । आर्थिक दँ ०८३/८४ या नीति तथा कार्यक्रमय् पर्यटन ख्यःयात विशेष प्राथमिकचता बियागु खँ न्ह्यथनादिसें नगर प्रमुख प्रजापतिं पर्यटन ख्यःलिसे सम्बन्धित निकाय, विज्ञ व सरोकावालालिसे समन्वय यानाः दीर्घकालीन योजना न्ह्यःने न्ह्याकेगु जुइ धयादिल ।
सम्पदा स्थलया संरक्षण, आन्तरिक पर्यटन प्रवद्र्धन, मौलिक सम्पदाया डिजिटल अभिलेखीकरण नापं धार्मिक–सांस्कृतिक पर्यटनया विकासया निंतिं दक्वं पक्षया साथ व ग्वाहालि आवश्यक दु धासें सुझावसहित सहकार्य यायेत नं वय्कलं इनाप यानादिल ।
सहलहय् इतिहासविद् डा. पुरुषोत्तमलोचन श्रेष्ठं न्यय्न्यापाः झ्याः लाय्कू दुनेया अंगः किपात (भित्ते चित्र) एसियाया हे अनुपम सांस्कृतिक सम्पदाया रुपय् दुगु न्ह्यथनादिसें उकिया वैज्ञानिक संरक्षण, अभिलेखीकरण व नियमित रुपं मर्मत सम्भर यायेमाःगु खँय् बः बियादिल । मेम्ह इतिहासविद् विश्वमोहन जोशीं ख्वपया मौलिक वसः, परम्परागत संस्कार, संस्कृति, सम्पदाया व्यवस्थित डकुमेन्टेसन यायेमाःगु धारणा तयादिल ।
गुथि संस्थान ख्वपया प्रमुख आनन्दप्रसाद कर्माचार्यं विदेशी पर्यटकया निंतिं आकर्षक गन्तव्य ख्वपया लोपोन्मुख जुया वनाच्वंगु परम्परागत, सांस्कृतिक बजां, दाफा, प्याखं व मेमेगु सांस्कृतिक सम्पदाया संक्षण व प्रवद्र्धनय् ध्यान बीमाःगु खँ धयादिल ।
नगरपालिकां ख्वपया सांस्कृतिक पर्यटन प्रवद्र्धनया निंतिं दरवार हेरचाह व स्माकर संरक्षण ज्याकू, गुथि संस्थान ख्वप, कला संग्रहालय, भक्तपुर पर्यटन विकास समिति, होटल एशोसियसन अफ भक्तपुर, संस्कृतिविद्, इतिहासविद्, संरक्षण विद्, पुजारी लगायत सरोकारवालालिसे राय सुझाव संकलनया निंतिं उगु सहलह याःगु खः ।
LEAVE YOUR COMMENTS